කීර්ති ප්රනාන්දු –
“අයන් මෑන් “ ලෙස හැඳින්වෙන කොළඹ කෝටිපතින්ගේ ඕෆ් රෝඩ් වාහන කල්ලිය යාල ජාතික වනෝද්යානයට පෙරේදා (23) සිදුකළ හානිය සම්බන්ධව වන සතුන්ට බාධා කිරීම, වාසස්ථානවලට හානි කිරීම සහ යාල ජාතික වනෝද්යානයේ නීති රීති උල්ලංඝණය කිරීමේ චෝදනා යටතේ අද තිස්සමහාරාම අධිකරණයට කරුණු වාර්තා කරන බව යාල වනෝද්යාන පාලක මනෝජ් විද්යාරත්න ලංකාසරට පැවසීය.
මේ ආකාරයෙන් හඳුනාගත් වාහන පහක් සහ එම වාහන පහේ හිමිකරුවන් සඳහා මෙම චෝදනා ගොනු කරන බව උද්යාන පාලකවරයා වැඩිදුරටත් කීවේය.
සිද්ධිය සම්බන්ධව පැහැදිලිකිරීමක් කළ යාල ජාතික වනෝද්යානයේ උද්යාන භාරකරු මනෝජ විද්යාරත්න මෙසේ ද පැවසීය.
“ අද මෙම සිද්ධිය සම්බන්ධව හඳුනාගත් වාහන පහක් සහ අයිතිකරුවන් සම්බන්ධව තිස්සමහාරමා අධිකරණයට කරුණු වාර්තා කරනවා. ඒ සමගම අභ්යන්තර විමර්ශනයක් කරලා මේ සිද්ධියට යම් ආකාරයකින් හෝ සම්බන්ධයක් ඇති නිලධාරියෙක් ඉන්නවා නම් ඔවුන්ට තරාතිරම නොබලා දඬුවම් කරන්න දෙපාරත්මේන්තුව පැත්තෙන් විශේෂ වැඩපිළිවෙළක් දැන් දියත් වෙලා තියනවා. “
“ මේ සිද්ධිය සිදුවන්නෙ මෙහෙමයි. යාල ජාතික වනෝද්යානයට වාහන 35ක් ඇතුළු වෙනවා. ඒ වාහන සියල්ලටම අවසර පත්ර නිශ්චිත මුදල් ගෙවා තමයි ලබා දෙන්නනෙ.“
“ ඒත් අපට මේ වාහන 35ටම මාර්ගෝපදේශකයන් ලබා දෙන්න ප්රමාණවත් මාර්ගෝපදේශකයන් නෑ. ඒ නිසා වාහන 05කට එක් මාර්ගෝපදේශකයා බැගින් මාර්ගෝපදේශකයන් 07ක් අපි ඔවුන්ට ලබා දෙනවා.“
මෙතනදි වෙන්නේ මේ කණ්ඩායම් අපේ මග පෙන්වගෙන්ගෙන් මිදිලා ඔවුන් පාරෙන් පිට වාහන ඇතුළු කීරීම. මේ ස්ථානයේ දි විතරක් නෙමෙයි, යාල කිලෝමීටර 125ක දුර ඇතුළෙ විවිධ තැන්වල දී ඔවුන් පාරෙන් පිට වාහන යොමුකරවලා තියනවා. මේ සිද්ධිය වන ස්ථානයේ විනාඩි 10ක් විතර කාලයක් තමයි ඔවුන් රැඳිලා තියෙන්නෙ.“
“ මේ තත්ත්වය නිරීක්ෂණය වූ වහාම අපේ මගපෙන්වන්නන් නියෝජ්ය උද්යාන පාලකවරයාට දැනුම් දී තියනවා මේ කණ්ඩායම පාලනයෙන් තොර බව. ඔවුන් එළියට ගන්න අවශ්යයයි කියලා දන්වලා තියනවා. ඒ වනවිටත් ඔවුන් ඒ නීති විරෝධී කටයුත්ත කරලා ඉවරයි.
අපේ මාර්ගෝපදේශකයන් ගිය එක් වාහනයක්වත් මාර්ගයෙන් පිට ධාවනය කරන්න ඉඩ දීලා නෑ. ඔවුන්ව පාලනය කරගෙන ආපහු රැගෙන ඇවිත් තියනවා. මේ කණ්ඩායම කිසිම සංයමක් නොතිබුණ කණ්ඩායමක්.“
“ දැනට මේ සිද්ධියට සම්බන්ධව හඳුනාගත් වාහන 05ක් සම්බන්ධයෙන් අද තිස්සමහාරාම අධිකරණයට කරුණු වාර්තා කරනවා. “
ලංකාසර – යාල පැහැරූ මේ පුද්ගලයින් කවුද?
පිළිතුර – අයන් මෑන් නමින් හඳුන්වා ගන්න ඕෆ් රෝඩ් වාහන සහිත කණ්ඩායමක්.
ලංකාසර – ඔබගේ කාර්යාලයට නුදුරින් මේ සිදුවීම වෙලා තියන බව චෝදනා එල්ල වෙනවා. ඔබ දැනගෙන මේක වෙන්න ඉඩ හැරිය ද?
පිළිතුර – මේ සිදුවීම වාර්තාවන කලාපයෙ පාරෙන් පිට මේ වාහන ධාවනය කරවන්නෙ විනාඩි 10ක් 15ක් විතර කාලයක්. මා මුලින් කී විදිහට මාර්ගෝපදේශකයන්ගෙන් කැඩිලා වෙනුවුන ධාවකයින් කණ්ඩායමක් තමයි මේ නීති විරෝධී කටයුත්ත කරලා තියෙන්නේ. අපි කවුරුහරි මේ සිද්ධිය යන්තම් හෝ දැනගත්තා නම් එය වෙන්න තියන්නෙ නෑ. මේ සම්බන්ධව පූර්ණ විමර්ශනයක් සිද්ධ වෙනවා.
ලංකාසර – මේ පුද්ගලයින්ගෙ හැසිරීම නිසා වන සතුන් බිය වී පලාගොස් ඇති බව කියනවා?
පිළිතුර – ඔව්… ඒක තමයි මෙතන තියන ප්රශ්නය. වාහන ගණනක් මේ විදිහට පාරෙන් පිට ඇවිත් මේ විදිහට නීති විරෝධීව හැසිරෙද්දි එන ඝෝෂාව ඇතුළු අනාරක්ෂිත හැඟීම වනතුන්ගේ චර්යාවන්ට විශාල බාධාවක් ඇති කරනවා.
ලංකාසර – ඒ භූමියත් විනාශ වෙලා ද?
පිළිතුර – මේ වනවිට ඒ ස්ථානයේ වාහන පැදවූ බවට සලකුණක්වත් නෑ. ඒත් ඔවුන් කළ විනාශය තමයි වනසතුන්ට බාධා කිරීම. ඔවුන්ගේ වාසස්ථානවලට හානි කිරීම. උද්යානයේ නීති රීති කඩකිරීම.
ඊට එරෙහිව අධිකරණයේ නඩුවක් ගොනු කරන්න සූදානම් වන්නේ ඒ නිසා. හඳුනාගත් වාහන පහකට එරෙහිව අද තිස්සමහාරාම අධිකරණයට කරුණු වාර්තා කරනවා.
