දිනසේන රතුගමගේ –
-
බෝට්ටුව දවස් 11ක් විතර ආවට පස්සේ කෑම ඉවරයි කිව්වා… මාලු කකා ලුණු වතුර බිබී ආවෙ… බාගයක් ලෙඩ වුනා..
-
අපි හොරු නෙමෙයි… මියන්මාරයෙ ඉන්න බෑ… ජීවිතයත් මරණයත් අතර සටනක් කරලා ඉන්දුනීසියාවට යන්නයි ආවෙ… බෝට්ටුව මගදි කැඩුනා…
-
නාවික හමුදාව කෑම බීම දුන්නා. වෛද්ය ප්රතිකාර කළා…
” අපිත් එක්ක තවත් මගීන් 170 ක් විතර පටව ගත්ත බෝටුවක් බංග්ලාදේශයේ සිට ඉන්දුනිසියාව බලා පිටත් වුනා. අපි මුහුද මැදට අවට පස්සේ දැක්කා ඒ බෝට්ටුව ගිලෙනවා. ඊට පස්සේ මොනා වුනාද දන්නේ නෑ. අපේ බෝට්ටුවේ අය ගමන පිටත් වුණා. ඒත් අතරමගදී අපේ බෝට්ටුවත් ක්රියා විරහිත වෙලා මහ මුහුදේ නතර වුණා. අපේ අය උදව් ඉල්ලන කොට තමයි ශ්රී ලංකා නාවික හමුදාවේ අය ඇවිත් අපිව බේර ගත්තේ.”
මියන්මාරයේ සිට ඉන්දුනීසියාව දක්වා මියන්මාර් ජාතිකයින් 104 ක් ප්රවාහනය කරමින් තිබූ මගී ප්රවාහන යාත්රාවක් එහි ඇති වූ යාන්ත්රික දෝෂයක් හේතුවෙන් ආපදාවට පත්වී, වෙත්තලකේනි ප්රදේශයට නාවික සැතපුම් 3.5 ක් පමණ උතුරු දෙසින් වූ මෙරට මුහුදු ප්රදේශයට පාවෙමින් තිබියදී එහි සිටි මගීන් නිදහස් කර ගැනීමෙන් පසුව ඔවුන් මෙසේ කියා සිටියහ.
දවස් 11කින් පස්සෙ කෑම ඉවරයි කිව්වා..
” අපිව බේර ගත්ත නාවික හමුදාව අපිට බීම දුන්නා… පස්සේ කෑමත් දුන්නා. අපේ අය ගොඩාක් දෙනෙක් අසනීප තත්වයෙන් ඉන්නේ. අපි පිටත් වෙලා දින එකොළහක් යන කල් බෝට්ටුවේ අය අපිට කෑම දුන්නා. පස්සේ කෑම ඉවරයි කිව්වා… “
“මාලු කකා මුහුදු වතුර බොමින් එන අතරතුර අපේ අය ලෙඩ වුණා. ඇඟ කසන්නට වුණා තුවාල බිබිලි හැදුණා ඒවා වන වෙලා තුවාල හැදුණා. හරීම අමාරුවෙන් තමයි අපි ආවේ.නාවික හමුදාවෙන් අපේ ඒ ලෙඩ්ඩුන්ට බෙහෙත් ලබා දුන්නා. “
“අපි හොරු නෙමෙයි.. සංක්රමණිකයින් විදිහට අපි ඉන්දුනිසියාව බලා යමින් හිටියේ. අපිට මියන්මාරයේ ඉන්න බැහැ. අපේ අය මීට පෙර දහස් ගනනක් වෙනත් රටවලට ගියා. අපිත් එහෙම යන්නයි උත්සහ කළේ. අපේ බලාපොරොත්තුව කොහොම හරි ඉන්දුනිසියාවට යන්නයි” ඔවුහු කීහ.
දරුවෙක් සහ වැඩිහිටියෙක් දැඩි ලෙස ගිලන් වෙයි
මේ අතර අනතුරට පත් මියන්මාර් බෝට්ටුවේ සිටි මියන්මාර් ජාතිකයින් දෙදෙනෙකු දැඩි ලෙස රෝගී වීම හේතුවෙන් ඔවුන්ව ඊයේ 18 දා යාපනය තෙලිප්පලෙයි රෝහලට ඇතුළත් කොට තිබිණි.
මෙසේ රෝගී වී ඇත්තේ වයස අවුරුදු 41 ක පිරිමියෙකු හා අවුරුදු 02ක ළමයෙකුයි.
අධික කාලයක් මහ මුහුදේ කුසගින්නේ සිටීම නිසා මියන්මාර් බෝට්ටුවේ සිටි මගීන් 104 දෙනාගෙන් හරි අඩක් පමණ රෝගී වී සිටියහ.
ඔවුන් අතරින් බරපතල ලෙස රෝගී වූ හතර දෙනෙකු සිටින අතර රෝහල් ගත කොට ඇත්තේ ඉන් දෙදෙනෙකි.
මෙම මියන්මාර් ජාතිකයින්ට විවේකය හා නින්ද මෙන්ම පෝෂ්යදායී ආහාර ලැබිය යුතු බවට වෛද්යවර් නිර්දේශ කොට ඇත.
බෝට්ටුවේ සිටි රෝගීන්ගෙන් විශාල පිරිසකට නාවික හමුදාවේ වෛද්ය බලකායේ නිලධාරීන් විසින් මූලක ප්රතිකාර ලබා දී තිබිණි.