කොළඹ නගරසභාවේ බහුතර බලයක් ලබාගෙන සභාව පිහිටුවන්නට සැලසුම් කර ඇත්තේ දේශපාලන බලය අල්ලා ගැනීමේ පටු අරමුණ මත පිහිටා නොවන බව අග්රාමාත්ය හරිනී අමරසුරිය අද පැවසුවාය.
ජාතික ජන බලවේගයට දේශපාලනයක් ඇති බවත්, දේශපාලන දැක්මක් ඇති බවත් කී අගමැතිවරිය කොළඹ නගරය සහ කොළඹ නගරය පිළිබඳව ද දැක්මක් ඇති බව ප්රකාශ කළාය. කොළඹ නගරසභාවේ බලය පිහිටුවා ගෙන වැඩ කරන්නට පටන් ගන්නේ කොළඹ නගරය මොන ආකාරයේ නරගයක් විය යුතු ද යන අදහසත් සමග බව ද අගමැතිවරිය කීවාය. ඇය පෙන්වා දුන්නේ ලංකාවේ අනන්යතාවයේ සියලුම ලක්ෂණ කොළඹ නගරය තුළ පවතින බවය.
ඇය මේ බව ප්රකාශ කළේ ජාතික අද (13) ජාතික ජන බලවේගයේ කොළඹ මහ නගර සභා මන්ත්රී කණ්ඩායම දිවුරුම් දුන් අවස්ථාවට එක් වෙමිනි.
පැලවත්ත ජනතා විමුක්ති පෙරමුණු පක්ෂ මූලස්ථානයේ දී අගමැතිවරිය සහ නියෝජ්ය ඇමති සුනිල් වටගල ඉදිරියේ දී අද කණ්ඩායම් නායිකාව සහ පුරපති අපේක්ෂිකාව වු ව්රායි කැලී බල්තසාර් ප්රමුඛ මාලිමාවෙන් කොළඹ නගරසභාවට තේරී පත් වුන නාගරික මන්ත්රීවරු 48ක කණඩායමක් දිවුරුම් දුන්හ.
මන්ත්රීවරු පිරිස අමතමින් අගමැතිවරිය මෙසේ ද ප්රකාශ කළාය.
” මේ ලස්සන කොළඹ නගරය සියලුම ජනතාවට ලස්සන තැනක් කරන්නේ කොහොම ද කියන දැක්ම අපට තියනවා. ඒ දැක්ම ක්රියාත්මක කිරීමේ නොඉවසිල්ලෙන් අපි සියලුම දෙනා ඉන්නේ. ඒ දැක්මත් එක්ක තමයි අපි කණ්ඩායමක් ලෙස කොළඹ නගර සභාවට තරග වැදුනේ. කොළඹ නගරසභාවට අයත් ජනතාවගේ ප්රසාදය දිනාගෙන මේ විදිහට කොළඹ නගර සභාවේ ජනතා බහුතර ප්රසාදය කණ්ඩායමක් ලෙස ලබා ගත්තේ.”
ඒ නිසා ප්රජාතන්ත්රවාදී තරගයක් තුළ කොළඹ නගරයේ නායකත්වය ලබා ගන්න අපි සුදානම්. ඒ ජනවරම අපට තියනවා. ඒ ජනවරම තමයි වැදගත්. අපට රටේ නායකත්වයටත්, ජනාධිපති තුමාටත් පාර්ලිමේන්තුවටත්, ලැබුණ ජනවරම තමයි කොළඹ නගරසභාවටත් තියෙන්නේ. අපි දන්නවා මේ රටේ ජනතාව වෙනසක් බලාපොරොත්තු වෙනවා. ඒ වෙනස කියන්නේ ජනතාවාදී දේශපාලන අධිකාරියක් මේ ආයතන තුළ බලය ලබාගනී කියන බලාපොරොත්තුවෙන් තමයි පළාත් සභා මැතිවරණයට මැදිහත් වුනේ. ඒ අරමුණෙන් තමයි කොළඹ නගරසභාවටත් ඔබ සියලු දෙනා පත් කරලා යවලා තියෙන්නෙ.
ඒ ජන වරම සහ දේශපාලන දැක්මත් එක්කයි අප එකතු වෙලා ඉන්නේ. කොළඹ නගරයට වෙනසක් කරන්න පුලුවන්. කොළඹ නගරය ගැන ඔබ හොඳින් දන්නවා. මෙතන කවුරුවත් කොහෙන් හෝ පාත්වුන අය නොවෙයි. ඔබ දිනා ගත්තේ මහන්සි වෙලා වැඩ කරලා, මිනිස්සු අතරට ගිහිල්ලා, මිනිස්සුන්ගේ ප්රශ්න මොනවද කියලා හොයලා බලලා, දැනගෙන මිනිස්සු එක්ක සංවාදයක් ඇති කරගෙන ඒ මිනිස්සුන්ට වග වෙනවා කියලා පොරොන්දු වෙමින් ඔබ මෙතෙන්ට ඇවිත් තියෙන්නේ. ඒ ජනවරමත් එක්ක තමයි ඔබ අද දිවුරුම් දෙන්නේ. ඒ ජන වරමත් එක්ක තමයි ඔබ 16 වැනිදා ඉඳන් වැඩ පටන් ගන්න යන්නේ.
අගමැතිවරිය කීවේ කොළඹ නගරයේ සිටින්නේ සම අයිතිවාසිකම් සහිත පුරවැසියන් බවත් එහෙත් එම ජනතාවට සමානව සැලකීමට පසුගිය දේශපාලන අධිකාරීන් කටයුතු කර නැති බවත්ය. ජාතික ජන බලවේගයට මෙවර කොළඹ ජනතාව ඡන්දය ලබා දුන්නේ ඒ වෙනස සිදුකිරීමට බව අගමැතිවරිය කීවාය.
” ඔබ නගරයක බලාපොරොත්තු හොබවන, ඒ බලාපොරොත්තු වෙනුවෙන් පත්වුන පිරිසක්. කොළඹට සිද්ධ වෙන දේ රටටම බලපානවා. රට තුළ බලාපොරොත්තුවන සමගිය, විවිධත්වයට ගරුකිරීම, සමානාත්මතාවය, ජනතාවාදි සංවර්ධනය සියලු දෙනාටම සාධාරණව ජීවත්වීමේ අවස්ථාව ලබාදීම ජනතා සේවයක් ලබා දීමට සභිකයින් හැටියට අපේ කැපවීම… මේ සියල්ලම අපට පෙන්වන්න පුලුවන්. ඒ සඳහා හැකියාව තියන කණ්ඩායමක් අප ඉදිරියේ ඉන්නේ…”
” ඔබ සූදානම්. නගරය සූදානම්. ඔබ බලය නිල වශයෙන් ලබාගෙන වැඩ කරනකම් නගරයක්ම බලාගෙන ඉන්නවා. රටේම ජනතාව බලාගෙන ඉන්නවා. ” අගමැතිවරිය ප්රකාශ කළාය.
