අනුරාධපුර – පර්සි කුරුනේරු –
අනුරාධපුර ශික්ෂණ රෝහලේ සේවයෙහි නියුතු වෛද්යවරියකට නාදුනන පුද්ගලයෙකු විසින් තියුණු ආයුධයක් පෙන්වා මරණ බවට තර්ජනය කොට සිය නේවාසිකාගාරයේ කාමරය තුළ දී බරපතළ ලිංගික අතවර කිරීමේ සිද්ධියක් සම්බන්ධයෙන් අනුරාධපුර ළමා හා කාන්තා කාර්යංශය මගින් විමර්ශනයක් ආරම්භ කොට ඇත.
ඊයේ (10) සවස 6.30.ත් 7.00 ත් අතර කාලයේ ඇය තමා සේවය කරන වාට්ටුවේ රාජකාරිය හමාර කොට අනුරාධපුර ශික්ෂණ රෝහල ඉදිරිපිට පිහිටි වෛද්ය නේවාසිකාගාරයේ කාමරයට ගිය අවස්ථාවේ ඇය පසුපසින් පැමිණ ඇති පුද්ගලයෙකු ඇය නවාතැන් ගෙන සිටින කාමරය තුළදී මෙලෙස ලිංගික අතවර සිදු කිරීමෙන් පසුව අගේ ජංගම දුරකථනයත් රැගෙන පලාගොස් ඇත.
වින්දිත වෛද්යවරිය බස්නාහිර පළාතේ පදිංචිකාරියකි.
ඇය සිය නේවාසික කාමරයේ දොර විවෘත කොට ඇතුළුවීමට උත්සාහ දරනවාත් සමග ඇය පසුපසින් උල් පිහියක් අතැතිව පැමිණ ඇති සැකකරු එකවරම වෛද්යවරිය කාමරය තුළට තල්ලුකර ඇයට උල් පිහිය පෙන්වා බිය ගන්වා කාමරයේ දොර වසා ඇත.
පසුව ඔහු වෛද්යවරියගේ අත් පා ගැට ගසා අතවර කළ බව ඇය විසින් අනුරාධපුර පොලීසියට පැමිණිලි කොට ඇත.
එම සිද්ධියෙන් පසු ඇයව දූෂණය කළ බව කියන පුද්ගලයා ඇයව ඇද මත ගැට ගසා තිබියදීම පලාගොස් ඇත.
අනතුරුව ඇය මහත් වෙහෙසක් දරා ගැට ගසා තිබූ අත් පා ලිහා ගැනීමෙන් පසුව සිය ඇගපත සෝදාගෙන අනුරාධපුර පොලීසිය වෙත ගොස් ඊයේ (10) රාත්රි 11.00 ට පමණ අදාළ සිද්ධිය සම්බන්ධයෙන් පැමිණිලි කොට තිබිණි
