අද (18) ගාල්ලේදී ආරම්භවන නවසීලන්ත ශ්රි ලංකා පළමු ටෙස්ට් තරගය ශ්රි ලංකා ක්රිකට් අනාගතය වෙනුවෙන් සිදුකරන කැපකිරීම් සහ අත්හදාබැලීම් රැසක් සහිත ප්රයාමයක් වන ආකාරය පෙනෙමින් ඇත.
දිනේෂ් චන්දිමාල් කඩුලු රකින්නේ නැත. ඒ වෙනුවට ඔහු අංක තුන ස්ථානයේ ක්රීඩා කිරීම භාරගෙන තිබේ. ඔහු පහළට ඇවිත් මේ කරගසන්නේ රට වෙනුවෙන් සහ අනාගත ක්රිකට් වෙනුවෙන් සිය ක්රිකට් ජීවිතය පරදුවට තබා කරන කැපකිරීමකටය. බොහෝ විට කඩුළු රකිනු ඇත්තේ කුසල් මෙන්ඩිස්ය. ආරම්භක පිතිකරුවෙක් ලෙසත්, අංක තුන පිතිකරු ලෙසත් අසාර්ථක වූ කුසල් මෙන්ඩිස් කඩුළු රැකීමෙන් පසු පහළ මැද පෙළ පිතිකරුවෙක් ලෙස ක්රීඩා කරනු ඇත.
කණ්ඩායමේ සමතුලිත තාවය රැකදීම සඳහා ශ්රී ලංකා කණ්ඩායමේ බලාපොරොත්තු සහගත තුන්වන වේගපන්දු යවන්නා ලෙස තේරූ මිලාන් රත්නායක විශිෂ්ට පන්දු යැවීමක්, ලෝක වාර්තාවක් සහිත පිතිකරණයක් වාර්තා කළ සිය සාර්ථක මංගල සංචාරයෙන් පසු කණ්ඩායමේ සමතුලිතතාවය වෙනුවෙන් කණ්ඩායමෙන් බැහැරවී තිබේ. ගාල්ලේ දී විශේෂඥ දඟ පන්දු යවන්නා ප්රභාත් ජයසූරිය බලාපොරොත්තු සහගතව කණ්ඩායමට එක් වී සිටී.
ගාල්ල දෙවනත්කළ මුරලිට පමණක් දෙවැනි වූ ලංකාවේ සිටි ප්රභූ දඟපන්දු යවන්නාවන රංගන හේරත් දඟපන්දු යැවීමේ පුහුණුකරු ලෙස නවසීලන්ත කණ්ඩායම සමග එක් වී ඇත. සනත් ප්රධාන පුහුණුකරු ලෙස රංගනගේ විශිෂ්ඨත්වය අවතක්සේරු නොකර ප්රති උත්තර ලබා දීමේ සැලසුමකය.
මේ සම්බන්ධව ඊයේ (17) මාධ්ය හමුවේ කදිම විග්රහයක් ශ්රී ලංකා කණ්ඩායමේ ප්රධාන පුහුණුකරු සනත් ජයසූරිය විසින් සිදුකළේය.
අංක 3 කමිඳු ද?. මාධ්ය විමසුවේය.
නෑ… කමිඳු අංක 3 ගහන්නෙ නෑ. ඒක කරන්න බෑ, එයා මැදපෙළ පිතිකරුවෙක් විදිහට එයාගෙ සුපුරුදු භූමිකාව කරයි.
මිලාන්ට මොකද වෙන්නෙ?. තවත් ප්රශ්නයකි.
ඔව්.. කණ්ඩායම තෝරද්දි ලොකු ප්රශ්නයක් එනවා. අපේ තුන්වැනි වේග පන්දු යවන්නා කියන්නෙ හොඳම වේගපන්දු යවන්නා. ඔහු හොඳටම පන්දු යැව්වා. හොඳට පන්දුවටත් පහර දුන්නා. ඒත් අපි කණ්ඩායමක් බැලන්ස් කරන්න යනකොට දඟ පන්දු යවන්නෙක් ගේන්න ඕන ගාල්ලේ ක්රීඩාංගනයේ හැටියට. එතනදි මිලාන් රත්නායක විශේෂයෙන් මතක් කරන්න ඕන. පළවෙනි ටුවර් එකේ එයා කරපු දේ ගැන අපිට විශාල අගය කිරීමක් තියනවා. ඔහු පරිනත ක්රීඩකයෙක් ලෙසයි ක්රීඩා කළේ.
ඒත් මේ තරගයේ අවාසනාවට වගේ මිලාන් රත්නායක 11ට ගේන්න බෑ. වේග පන්දු යන්නන් දෙන්නයි ක්රීඩා කරන්න පුලුවන් ගාල්ලේ තණතීරුවේ. හොඳම වේග පන්දු යන්නො දෙන්නෙක් ඉන්නවා. අසිත ප්රනාන්දුයි ලහිරු කුමාරයි. මිලාන් එලියට යන්නේ වැරද්දක් කරලා නෙමෙයි. මේ කණ්ඩායම සමතුලිත කරන්න තමයි ඔහු එළියට යන්නේ.
මම මිලාන් එක්ක මේ ගැන ගොඩක් කතා කළා. ඒ ළමයට කියලා දෙන්න ඕන මේක. මම පෞද්ගලිකවත් කතා කරලා තේරුම් කළා මේ රට වෙනුවෙන් කළ දෙයක් කියලා. එතකොට ඒක එයා දන්නවා මේ වෙන්නේ මොකක්ද කියලා. අනික් ප්ලේයර්ස්ලත් දන්නවා හොඳට කරලා තමයි මිලාන් මේ කණ්ඩායමෙන් ඉවත ඉන්නේ කියලා. හැබැයි මිලාන් යන්නේ ටීම් එකේ බැලන්ස් එක වෙනුවෙන්.
චන්දිමාල් කඩුලු රකිනව ද ?
චන්දිමාල් කඩුළු රකින්නේ නෑ. එතන කල්පනා කරන්නේ නොම්බර 3 ක්රීඩා කරන්නේ කවුද කියලා. ඒ වගකීම චන්දිමාල් ගන්නවා නම් ඒක ලොකු දෙයක්.
චන්දි ඒක කරන්නේ රට වෙනුවෙන්. අපි ඔහුට අවශ්ය විශ්වාසය දෙන්න ඕන. ඔහුව බලා ගන්න ඕන. මොකද අපේ ක්රිකට් එක ඉස්සරහට හදාගන්න අනාගතය වෙනුවෙන් තමයි චන්දි පහළට ඇවිත් එහෙම දෙයක් කරන්නේ.
දඟ පන්දු යවන්නන්ගේ සංයුතිය මොකක් ද?
මේ තණතිල්ලේ හැටියට අපිට දඟ පන්දු යන්නන් ලෙස ධනංජය සහ කමිඳු මෙන්ඩිස් ඉන්නවා. ප්රභාත් ජයසූරිය සහ රමේෂ් මෙන්ඩිස් ඉන්නවා. අවශ්යතාවයේ හැටියට තණතිල්ලේ හැටියට පවතින තත්ත්වයේ හැටියට මද වේග පන්දු යවන්නෙක් විදිහට ඈන්ජලෝට බෝල් කරන්න පුලුවන්.
සනත් කියන්නේ හෙට කවුරු කඩුළු රැක්කත් ඔහු ක්රීඩා කරනු ඇත්තේ පිතිකරණයෙ දී පහළ මැද පෙළ බවය. එතැන කුසල් මෙන්ඩිස්ව අත්හදා බලන්නට අවස්ථාව තිබේ.
දැන් අපට ක්රමයෙන් පෙනෙමින් ඇත්තේ සනාගේ පරිනත කළමනාකරණය ය. අවිනීත ගොබ්බයින් සේ හැසිරෙමින් සිටි කණ්ඩායමේ විනය මෙන්ම තරුණ ක්රීඩකයින් මෙහෙයවිය හැකි පෞරුෂය පමණක් ශාස්ත්රීය අත්දැකීම් සහිත පුහුණුකරුවෙක් ඉක්මවා ගිය ප්රභාවක් ඇතිකිරීමට සමත් වී තිබේ. ක්රිකට් ගැන ඇතිවන හොඳම බලාපොරොත්තුව එයය.
