-
අධිවේගයට ඇතුළුවන වාහනවල අමතර කොටස් පිළිබඳ අධ්යනයක කර ලකුණු දීමේ වැඩ පිළිවෙළක්…
-
වාහනවල ටයර් නියමිත ප්රමිතියට නැතිනම් අධිවේගී මාර්ගවලට ඇතුළු වීම තහනම් කිරීමට නීතියක්…
-
අධිවේගී මාර්ගයේ ගමන් ගන්නා පාසල් සේවා බස් රථ, විනෝද චාරිකා බස් රථ, කාර්යාල සේවා බස් රථ, සහ සියලුම ආකාරයේ දුර ගමන් සේවා බස් රථවලට ආසන පටි අනිවාර්ය කිරීමේ නීති…
අධිවේගී මාර්ගයේ ගමන් ගන්නා මගී ප්රවාහන බස් රථවල මගීන්ට ආසන පටි පැළදීම අනිවාර්ය කිරීමේ විධිවිධාන ඇතුළත් ගැසට් නිවේදනය මේ මස 31 වැනිදා නිකුත් කිරීමට නියමිත බව ප්රවාහන, මහාමාර්ග, වරාය සහ සිවිල් ගුවන් සේවා අමාත්ය සහ පාර්ලිමේන්තුවේ සභානායක බිමල් රත්නායක පැවසීය.
අමාත්යවරයා මේ බව පැවසුවේ ප්රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්යාංශයීය උපදේශක කාරක සභාව අමාත්යවරයාගේ සභාපතිත්වයෙන් පසුගියදා පාර්ලිමේන්තුවේ දී රැස් වූ අවස්ථවේදීය.
මෙහි දී වැඩිදුරටත් අදහස් දක්වමින් අමාත්යවරයා පෙන්වා දුන්නේ “ක්ලීන් ශ්රී ලංකා” වැඩසටහනේ ප්රධාන අංශයක් ලෙස මෙය ක්රියාත්මක කරන බවයි.
එසේම අධිවේගී මාර්ගවල ගමන් කරන පාසැල් බස් රථ, කාර්යාල සේවා ප්රවාහන බස්රථ, විනෝද චාරිකා බස් රථ සහ අනෙකුත් බස් රථ සඳහා ද ආසන පටි සැකසීමට මාස 3 ක පමණ කාලයක් ලබාදෙන බව ද හෙතෙම පෙන්වා දුන්නේය.
විශේෂයෙන්ම රු. 2000 පමණ මිලකට පැවති ආසන පටි මිල රු. 5000 ත් 7000ත් අතර මිලක් දක්වා මේ වන විට ඉහළ ගොස් ඇති බවත් මෙය පාරිභෝගික කටයුතු පිළිබඳ අධිකාරියෙන් පරීක්ෂා කර බැලිය යුතු බවත් අමාත්යවරයා සඳහන් කළේය.
දුර ගමන් සේවා බස් රථ සඳහාද ආසන පටි පැළදීම අනිවාර්ය කිරීම සම්බන්ධයෙන් ජනතාවගේ මතය විමසූ බවත් මේ සම්බන්ධයෙන් සියලුම දෙනා පාහේ සිය කැමැත්ත පළ කළ බවත් මෙහිදී අමාත්යවරයා පෙන්වා දුන්නේය.
එබැවින් ඉදිරියේදී දුරගමන් සේවා බස් රථ සඳහා ද ආසන පටි පැළදීම අනිවාර්ය කිරීමට සැලසුම් කර ඇති බවත් හෙතෙම කීවේය. විශේෂයෙන්ම Citra Innovation Lab ආයතනය මේ පිළිබඳව ම සමීක්ෂණයක් සිදු කර ඇති අතර මෙහිදී මගීන්, රියදුරන් හා පෞද්ගලික බස් රථ හිමියන් 2100කගෙන් පමණ දත්ත රැස්කර ඇති බවත් අදාළ වාර්තාවක්ද එම ආයතනය මගින් ලබාදුන් බවත් අමාත්යවරයා මෙහිදී වැඩිදුරටත් පැවසීය.
තවද අවශ්ය නීතිමය සංශෝධන සිදු කරමින් අධිවේගී මාර්ගයට වාහන ඇතුළත් කිරීමේදී වාහන අමතර කොටස්වල තත්ත්වය පරීක්ෂා කරමින් ලකුණු ලබාදීමේ ක්රමයක් ආරම්භ කරන බවද මෙහිදී මාත්යවරයා ප්රකාශ කළ අතර ඊට අදාළ ගැසට් නිවේදනය ඉදිරියේදී නිකුත් කරන බව ද පැවසීය.
එසේම වාහනවල ටයර් අවශ්ය නියමිත තත්ත්වයන් සහ ප්රමිතියෙන් නොපවතී නම් එවැනි වාහන අධිවේගී මාර්ගයට ඇතුළත් කිරීමට අවසර ලබා නොදෙන බව ද හෙතෙම සඳහන් කළේය.
