සියලුම ජාතික අධ්යාපන විද්යා පීඨ වෙත අනිද්දා හමුදාව කැඳවීමට අධ්යාපන අමාත්යාංශ ලේකම් තිලකා ජයසුන්දර තීරණය කර තිබේ.
එම කැඳවීම සිදුකරනු ලබන්නේ 18 වැනිදා අධ්යාපන විද්යාපීඨ කථිකාචාර්යවරු විසින් සිසුන් බඳවා ගැනීම අත්හිටුවීමට තීරණය කිරීමත් සමගය.
බඳවා ගැනීම් ක්රමවේදයේ ඇති අවිධිමත් බව මෙන්ම ස්වකීය වෘත්තීය ගැටලුවලට මෙතෙක් පිළිතුරු ලබා නොදීම හේතුවෙන් අනිද්දා (18) නවක සිසුන් බඳවා ගැනීමේ ක්රියාවලියෙන් සම්පූර්ණයෙන් ඉවත්වන බවට ශ්රී ලංකා ගුරු අධ්යාපනඥයින්ගේ ඒකාබද්ධ වෘත්තීය සංගමය අධ්යාපන අමාත්යාංශ ලේකම්වරිය වෙත ලිඛිතව දැනුම් දී තිබිණි.
ඇතැම් විද්යාපීඨවල මේ වනතුරුත් සම්මුඛ පරීක්ෂණ සිදුවෙමින් පවතින පරිසරයක් තුළ කැමැත්ත මත දරුවන්ගේ තෝරා ගැනීම් ද අවහිර කරමින් කඩිමුඩියේ සිසුන් බඳවා ගැනීමට කරන බලපෑම මැතිවරණය ඉලක්ක කරගනිමින් සිදුකරන දේශපාලන උත්සාහයක් ලෙස නිරීක්ෂණය වන අයුරුත් වැදගත් ජාතික කර්තව්යයක් ඒ ආකාරයෙන් සිල්ලර කිරීම අපරාධයක් බවත් එය තමුන්ගේ වෘත්තීය ගැටලුවලට ද වඩා ඔබ්බෙන් ඇති සිද්ධියක් බවත් මේ සම්බන්ධව අදහස් දක්වන වෘත්තිකයෝ පවසති.
මෙම තත්ත්වය තුළ අධ්යාපන විද්යාපීඨ කථිකාචාර්යවරු අනිද්දා සිදුවන බඳවා ගැනීම් කටයුතුවලින් ඉවත් වීමට තීන්දු කිරිමත් සමග අධ්යාපන අමාත්යාංශ ලේකම්වරිය 18 වැනිදා විද්යාපීඨ වෙත හමුදාව කැඳවීමටත් තීන්දු කර තිබේ.
ඉන් පසු , කලාප අධ්යාපන කාර්යාලවල සමග එක්වී සිසුන් බඳවා ගැනීම් සිදුකිරීමට ද ඇය නියෝග කර ඇත. කලාප අධ්යාපන කාර්යාලවලට කිසිසේත් අදාල නොවන මේ වගකීම මේ වනවිට සම්පූර්ණ කරමින් සිටින්නේ ගුරු අධ්යාපනඥයින් බව ද අතරමග දී පැමිණ එම ක්රියාවලිය අවසන් කිරීමට කටයුතු කළ හැකි යැයි යමෙක් සිතන්නේ නම් එය ප්රායෝගික යථාර්ථයක් නොවන බව ද ගුරු අධ්යාපනඥයෝ පෙන්වා දෙති.
නවක වදය සංකල්පයක කවදාවත් නොතිබුණු විද්යාපීඨ තුළ නවක වදය ඇති කිරීමටත් සිසු ගැටුම් නිර්මාණය කිරීමටත් පිරිසක් කටයුතු කරන බව ඇය හමුදාවට දන්වා සිටින්නේ විද්යාපීඨ සංස්කෘතිය තුළ කිසිම දවසක එවැනි වාතාවරණයක් නිර්මාණය වී නොතිබුන පරිසරයක වීම අතිශය කළකිරවනසුළු බවත්, ඉහළම රාජ්ය පරිපාලන කටයුතුවල නියැලෙන කාන්තාවක් මෙවැනි බොරු රටේ ආරක්ෂක අංශ වෙත ලිඛිතව දැන්වීමේ අපරාධයට එක් වීම කණගාටුවට කරුණක් බව ඔවුහු පෙන්වා දෙති.
