පසුගිය දා අමාත්යවරයෙක් සහ ඔහුගේ බිරිය අත් අඩංගුවට ගත් බවට මාධ්යවල පලවූ වාර්තාව අමාත්යවරයා සහ ඔහුගේ පෞද්ගලික ලේකම්වරිය අත් අඩංගුවට ගත් බවට නිවැරදි විය යුතු යැයි ද පසුගිය කාලයේ පවුල් පිටින් ආණ්ඩු කළ ආකාරය සම්බන්ධව එම අත් අඩංගුවට ගැනීමේ දී යළිත් අනාවරණය වී ඇති බවද ජනාධිපති අනුර කුමාර දිසානාය පැවසුවේය.
පැමිණිල්ල පිළිබඳ ලිපි ගොනුව 2015 සිට ඉතා ප්රමාද සහිතව මෙහෙයවා තිබු බවත්, අදාළ පරීක්ෂණ සඳහා ආණ්ඩුවක් ලෙස ස්ථාවරත්වයක් සකසා දිය හැකි නමුත් එම පරීක්ෂණයේදී දඬුවම් ලබාදිය හැක්කේ අධිකරණයෙන් පමණක් බැවින් අධිකරණයෙන් ඇප ලබාදීම සම්බන්ධයෙන් ජනතාව සැකයක් තබාගත යුතු නැති බවත් ජනාධිපතිවරයා පැවසුවේය.
ජනාධිපති අනුර කුමාර දිසානායක මේ බව සඳහන් කර සිටියේ ඊයේ ඊයේ (25) පස්වරුවේ හෝමාගම ප්රදේශයේ පැවති සුහද හමුවකට එක් වෙමිනි.
මෙහිදී ජනතාව ඇමතූ ජනාධිපතිවරයා වැඩිදුරටත් මෙසේද පැවසීය.
දූෂිතයන් පිළිබඳ ගන්නාවූ ඉදිරි ක්රියාමාර්ග පිළිබඳ ජනතාව නිරන්තර අවධානයෙන් පසු වන බව අප දන්නවා. මා පරීක්ෂකයාවත් , නඩු ගොනුකරන්නා හෝ නඩු විභාග කරන්නාවත් නෙමෙයි. නමුත් එම පරීක්ෂණ සිදු කරන රාජ්ය ආයතන ශක්තිමත් කිරීම ආණ්ඩුවේ වගකීමයි. ඒ වෙනුවෙන් ආණ්ඩුව කැපවී සිටිනවා.
පසුගියදා හිටපු අමාත්යවරයෙකු සහ ඔහුගේ බිරිඳ අත්අඩංගුවට ගත් බව මාධ්ය වාර්තා කර තිබුණා. නමුත් එය හිටපු ඇමතිවරයෙකු සහ ඇමතිවරයාගේ පුද්ගලික ලේකම්වරිය ලෙස නිවැරදි විය යුතුයි. පසුගිය පාලන සමයේ ආණ්ඩු කර තිබෙනුයේ පවුල් විසින් බව ඉන් පැහැදිලි වනවා. අත්අඩංගුවට ගැනීමේදී පමණක් ඇමති ස්වාමිපුරුෂයා සහ බිරිඳ අත්අඩංගුවට ගැනීමක් ලෙස හුවා දැක්වීම නිවැරදි වන්නේ නැහැ.
කෙසේ වුවද මෙම පැමිණිල්ලට අදාළ විමර්ශන ලිපි ගොණුව 2015 වසරේ සිට ඉතා ප්රමාද වෙමින් අදාළ ආයතන මගින් මෙහෙයවා තිබුණා. මේ වන විට මෙම පරීක්ෂණ අවසන් කිරීම කඩිනම් කර තිබෙනවා.
ලසන්ත වික්රමතුංග මහතා මීට වසර 16කට කලින් ඝාතනයට ලක් වුණා. තාජුඩින්ගේ ඝාතනය සම්බන්ධයෙන් ක්රියාකළ අධිකරණ වෛද්යවරයා මෙන්ම ඒ පිළිබඳ විමර්ශනය කළ නියෝජ්ය පොලිස්පතිවරයාත් මේ වන විට මියගොස් තිබෙනවා. මේ පරීක්ෂණ යටපත් වී සාක්ෂි දිරා පත්වී තිබෙන අවස්ථාවක් වුවත් එම පරීක්ෂණ පවා කඩිනම් කිරීමට අදාළ අංශ අප විසින් ශක්තිමත් කර තිබෙනවා. ඒ සඳහා නීතිපති දෙපාර්තමේන්තුවට සහ අපරාධ පරීක්ෂණ දෙපාර්තමේන්තුවට අප විසින් පූර්ණ නිදහස ලබා දී තිබෙනවා.
අදාළ පරීක්ෂණ සඳහා ආණ්ඩුවක් ලෙස ස්ථාවරත්වයක් සකසා දිය හැකියි. නමුත් එම පරීක්ෂණයේදී දඬුවම් ලබාදිය හැක්කේ අධිකරණයෙන් පමණයි. අධිකරණයෙන් ඇප ලබාදීම සම්බන්ධයෙන් ජනතාව සැකයක් තබාගත යුතු නැහැ. දූෂිත පාලකයින්ට අධිකරණයේ නඩු පැවරීම වත්මන් රජයේ අරමුණයි. ඊට ශක්තිමත් සාක්ෂි එකතු කිරීම අදාළ ආයතන වලින් සිදු කළ යුතුයි. ඇතැම් නිලධාරීන් දූෂිතයන්ට අදාළ ලිපිගොනු සඟවාගෙන සිටිනවා. ඔවුන් එම ලිපිගොනු කලින් පාලකයන්ට ලබා දුන්නේ නම් ඔවුන්ගේ රැකියාව අහිමි වේය යන බියෙන් පසු වුණා. එම නිලධාරින් මෙවැනි ආණ්ඩුවක් පැමිණෙන තෙක් බලාපොරොත්තුවෙන් පසු වී තිබුණා.
පොලිස් දෙපාර්තමේන්තුව සතුව විමර්ශන ලිපිගොනු 29,000ක් පවතිනවා. අපරාධ පරීක්ෂණ දෙපාර්තමේන්තුව යටතේ කොටස් කිහිපයකට අදාළ විමර්ශන ආරම්භ කිරීමට සැලසුම් කර තිබෙනවා. මූල්ය අපරාධ පිළිබඳ ඒකකයක්, මිනී මැරුම් විමර්ශනය සඳහා ඒකකයක්, මත්ද්රව්ය පිළිබඳ ඒකකයක් ලෙස නව ඒකකයන් නිර්මාණය කර තිබෙනවා. දිනපතා වැටලීම් සිදුකරමින් මත්ද්රව්ය ව්යාපාරිකයන් අත්අඩංගුවට ගැනීම්, ආයුධ ළඟ තබා ගන්නන් අත්අඩංගුවට ගැනීම් කඩිනම් කර තිබෙනවා.
කිසිදු ඇමතිවරයකු රජයෙන් නිල නිවසක් ලබා ගෙන නැහැ. කොළඹ ජනාධිපති මන්දිරය සහ මහනුවර ජනාධිපති මන්දිරය හැර සියලුම ජනාධිපති මන්දිර, ඇමති නිල නිවාස රජයට පවරාගෙන ආර්ථිකයට දායක කර ගත හැකි ආකාරයෙන් පරිහරණය කිරීම සඳහා සැලසුම් කර තිබෙනවා.
රටේ ජනාධිපතිවරයාට හෝ කිසිදු ඇමතිවරයෙකුට නිල නිවසක් නොමැති විට වර්ග අඩි 30,000කට වඩා විශාල නිවාස ඉල්ලා සිටීමට තරම් හිටපු පාලකයින් කටයුතු කරමින් සිටිනවා. පැල්පත් නිවාස ඉවත් කර එම නිවාසවල සිටි පවුල් ඒකකයට ලබා දුන් නිවසක වර්ග අඩි ප්රමාණය වර්ග අඩි 450ක්. කොළඹ නගරය මධ්යයේ අක්කරයයි පර්චස් තුනක් වන රුපියල් කෝටි 350ක වටිනාකමින් යුත් නිවසක හිටපු පාලකයෙක් සිටිය යුතුද? තනි කෙනෙකුට වර්ග අඩි පහළොස් දහසක නිවසක සිටිය හැකිද? රටම වෙනස් වීම සඳහා බලකර සිටියදී එසේ වෙනස් නොවන්නේ ඇයි? අගමැති ලෙස අරලියගහ මන්දිරයද, හිටපු ජනාධිපති ලෙස විජයරාම නිවසද එකම අවස්ථාවක භාවිත කළ හිටපු පාලකයින් අද එම නිවස භාරදීමට පසුගාමී වී සිටිනවා.
ජාතික ජන බලවේගයේ ආණ්ඩුව යහපත් සම්ප්රදායන් ඔස්සේ මේ රට මීට වඩා ඉහළට ඔසවා තැබීම සඳහා කැප වී සිටිනවා. මීට පෙර ජනාධිපතිවරයාට අමාත්යාංශ තිබුණේ නම් ඒ ඒ අමාත්යාංශ සඳහා අයවැය මගින් ඇමතිවරයාට අදාළ මුදල් වෙන් කිරීම සිදුකර තිබෙනවා. නමුත් මෙවර අයවැයේදී ඒ වෙනුවෙන් මුදල් වෙන් කිරීමක් සිදුවන්නේ නැහැ. වත්මන් ආණ්ඩුව ගනු ලබන තීන්දු තීරණ පිළිබඳ නිරන්තර අවධානයෙන් කටයුතු කරනවා. යම් අතපසුවීමක් වුවහොත් එය නිවැරදි කිරීමට තරම් නම්යශීලීව කටයුතු කිරීමට ආණ්ඩුව අපේක්ෂා කරනවා. රටක් ලෙස පිරිසුදු වීමට නම් මීට වඩා හොඳ අවස්ථාවක් ඉදිරියේදී ලැබෙනු ඇත්තේ නැහැ. මහජනතාවගේ දේපළට අත තැබීම සාංඝික දේපළට අත තැබීමක් යන හැඟීම සෑම පාලකයෙකුටම තිබිය යුතු යැයි අපි සිතනවා. එබැවින් අපි මෙම නව පරිවර්තනය අද සිට හෝ ආරම්භ කරමු.”
