දිනසේන රතුගමගේ
උණ රෝගයට ප්රතිකාර ලබා ගැනීමට යාපනය ශික්ෂණ රෝහලට ඇතුළත් වූ අට හැවිරිදි පාසල් ශිෂ්යාවගේ අතක් කපා ඉවත් කිරීමට සිදු වීමේ සිද්ධිය සම්බන්ධයෙන් චෝදනා ලැබ සිටින එම වාට්ටුව බාර හෙදියගේ විදෙස් ගමන් තහනම් කිරීමට යාපනය මහේස්ත්රාත්වරයා 7 දා නියෝග කළේය.
මහේස්ත්රාත්වරයා එම නියෝගය නිකුත් කලේ දැරියගේ පියා ඇතුළු පිරිසක් එම හෙදියට එරෙහිව යාපනය අධිකරණය වෙත ගොනු කරන ලද නඩුවක් සලකා බැලීමෙන් අනතුරුවය.
යාපනය ශික්ෂණ රෝහලේ ළමා වාට්ටුවේ හෙදියක් වන ජනනි රමේෂ් නැමැත්තිය මේ සම්බන්ධයෙන් චෝදනා ලැබ සිටින අතර ඇයගේ නොසැලකිල්ල හා වැරදි ලෙස එන්නතක් ලබා දීම හේතුවෙන් දැරියගේ අත කපා ඉවත් කිරීමට සිදු වූ බව මූලික පරීක්ෂණ වලදී හෙළි වී තිබේ.
මේ සම්බන්ධයෙන් කරුණු සොයා බැලීමට උතුරු පළාත් සෞඛ්ය සේවා අධ්යක්ෂවරයා විසින් වෛද්යවරු දෙදෙනෙකුගෙන් සමන්විත පරීක්ෂණ මණ්ඩලයක් කැඳවා ඇති අතර ඔවුන්ගේ වාර්තාව මේ වන විට ලබා දී අවසන්ව ඇතත් වරදකරුවන් සම්බන්ධයෙන් උතුරු පළාත් සෞඛ්ය සේවා අධ්යක්ෂවරයා තොරතුරු හෙළි නොකිරීම නිසා යාපනය රෝහල ඉදිරිපිට විරෝධතා කීපයක්ම සංවිධානය කොට තිබුණි.
උතුරු පළාත් සෞඛ්ය සේවා අධ්යක්ෂවරයා ආණ්ඩුකාරවරියගේ සහාය ඇතිව එම විරෝධී කණ්ඩායම් පොලිසිය යොදවා ඉවත් කිරීමෙන් පසුව ජනාධිපතිවරයාගෙන් මේ ප්රශ්නයට සාධාරණයක් ඉල්ලා යාපනයේ වැසියන්ගෙන් පෙත්සමක් අත්සන් කිරීමේ කටයුතු ආරම්භ කොට තිබේ.
පොලීසිය විරෝධතාකරුවන් ඉවත් කළද ඔවුන් යාපනය නගරයේ කෑ කෝ ගසමින් සාධාරණයක් ඉල්ලා පෙලපාලි ගියහ.
පොලිසියේ මැදිහත්වීම මත එයද අසාර්ථක වීමෙන් පසුව යාපනයේ පිරිසක් දැරියගේ පියා හා ඥාතීන් කීප දෙනෙකු කැටුව යාපනය අධිකරණය වෙත ගොස් අධිකරණයේ ගොනු කළ නඩුවක් හේතුවෙන් හෙදියගේ විදෙස් ගමන් තහනම් කොට ඇති අතර ඒ සම්බන්ධයෙන් වූ නඩුව නඩුව මේ මස 18 වැනිදාට විභාග කිරීමටද යාපනය අධිකරණය පියවර ගෙන තිබේ.
