මනම්පිටිය නිමල් ජයරත්න –
වී මිලදී ගැනීමට රජය විසින් සුළු හා මධ්යපරිමාණ වී මෝල් හිමියන්ට ණය ලබා දීම ඉතාම ප්රශස්ථ තීරණයක් නමුත් බිඳ වැටුන ව්යාපාර සහිත අතිමහත් වූ මෝල් හිමියන් පිරිසක් බැංකුවල ණය ගෙවා ගත නොහැකිව අසාධු ලේඛණගතව සිටිනා බැවින් එම ණය මුදල ලබා ගැනීමට නොහැකි අභාග්ය සම්පන්න තත්ත්වයකට පත් වී ඇතැයි පොලොන්නරුවේ සුළු හා මධ්ය පරිමාණ වී මෝල් හිමියෝ අද (12) මාධ්ය සාකච්ඡාවක් කැඳවමින් ප්රකාශ කළහ.
ඔවුන් පවසන්නේ රජයේ ප්රවේශය ඉතාම නිවැරදි බවය. සහල් අර්බුදය විසඳීම සඳහා එකම විසදුම සුළු හා මධ්ය පරිමාණ වී මෝල් හිමියන් යලි නගා සිටුවීම පමණක් බවය. එහෙත් බිඳ වැටුණ ව්යාපාර සහිත සුළු හා මධ්යපරිමාන සහල් මෝල් හිමියන් යළි ගොඩගැනීම සඳහා බැංකු විසින් අසාධුලේඛණගත කර සිටින පිරිසටත් පත්ව ඇති ව්යසනයෙන් ගොඩඒම සඳහාවත් ජනාධිපතිවරයා මැදිහත් වී මෙම ණය මුදල ලබා දීමට කටයුතු කරන ලෙසය.
පොලොන්නරුවේ පැවති මාධ්ය හමුව අමතමින්
පොළොන්නරුව දිස්ත්රීක් සුළු හා මධ්ය පරිමාණ වී මෝල් හිමියන්ගේ සංගමයේ ලේකම්, ආර්.එම්.එම්. අබේසිංහ බණ්ඩාර රාජපක්ෂ මෙලෙස කීවේය.
“රජය විසින් අපේ රටේ මේ පැන නැගිලා තියෙන සහල් අර්බුදය විසදීම සඳහාත් අපේ රටේ තියෙන සුළු හා මධ්ය පරිමාණ වී මෝල් නගා සිටුවීම සදහාත් ඉතාම ප්රශංසනීය පියවර රැසක් අරගෙන තියෙනවා. ඒ පිලිබදව අපි සතුටු වෙනවා,
මොකද මේ රටේ මේ ඇති වෙලා තියෙන සහල් අර්බුදයට විසඳුම් ලබාගත හැක්කේ අපේ රටේ තියෙන සුළු හා මධ්ය පරිමාණ වී මෝල් හිමියන් නගා සිටුවමින් ඔවුන් මේ රටේ සහල් නිෂ්පාදනයට වැඩිපුර දායකත්වයක් ලබා ගත්තොත් පමණයි.
එහෙම නැතිවුනොත් හැමදාම සහල් මාෆියාවන් ගැන කතා කර, කර ඉදිමින් පිටරටින් සහල් අරන් ඇවිත් අපේ රටේ ජනතාවට කන්න දෙන්න තමයි වෙන්නෙ. ඒ නිසා මේ සහල් ගැටලුවට විසදුම් තියෙන්නෙ කුඩා හා මධ්ය පරිමාණ වී මෝල් හිමියන් ළඟ පමණයි.
ඒ නිසා සුළු හා මධ්ය පර්මාණ වී මෝල් හිමියන්ගේ ව්යාපාර කඩා වැටීමට හේතු හා ඔවුන්ට තමන්ගෙ ව්යාපාර කරගෙන යන්න බලපා ඇති ප්රශ්න පිලිබවද පසුගිය කාලය පුරාවට ජනාධිපතිවරයා සමග මෙන්ම ඒ සම්බන්ධයෙන් කටයුතු කරනු ලබන අමාත්යවරුන් හා රජයේනිළධාරීන් එක්ක සාකච්ඡා ගණනාවක් කලා.
ඒවායේ මතුවුනු ගැටලුත් එක්ක කඩා වැටී ඇති සුළු හා මධ්ය පරිමාණ වී මෝල් හිමියන් යලි නගා සිටිවීම සදහා මේවනවිට පියවර අරගෙන තියෙනවා.
ඒකෙ එක් දෙයක් විදිහට මේ 2024/2025 යල් කන්නයේ ගොවීන්ගෙන් වී මිළදී ගැනීම සඳහා රජය විසින් 7%ක් වැනි අඩු පොලියකට සුළු හා මධ්ය පරිමාණ වී මෝල් හිමියන් වෙත ඔඩපන ණය ලබා දෙන්න කටයුතු යොදල තියෙනවා.
නමුත් ඒ ණය ලබා දීමට බලාපොරොත්තුවන සුළු හා මධ්ය පරිමාණ වී මෝල් හිමියන් බොහෝ දෙනෙකුගෙ ව්යාපාර තියෙන්නේ අර්බුදයක. පසුගිය වකවානුවේ සිද්ධ වෙච්චි අසාධාරණ හැසිරීම් එක්ක ව්යාපාර කඩාගෙන වැටිලා බැංකු සමග සාධනීය ගනුදෙනු කරන්න බැරි වෙලා හිටියේ ඒ නිසා ගොඩ දෙනෙක් බැංකුවල ක්රිබ් එකට අහුවෙලා ඉන්නෙ.
ඒ ක්රිබ් එකේ ඉන්න කිසිම කෙනෙකුට බැංකුවලින් ණය දෙන්නේ නෑ. ඒකනෙ රෙගුලාසිය. ඒ තත්ත්ව ඇතුළෙ රජය විසින් අඩු පොලියට ගොවීන්ගේ ව් මිළදි ගන්න දෙන ණය අපි බොහෝ දෙනෙකුට ගන්න බෑ. මේ ණය දෙනවා නම් අපට අපි වැටිලා ඉන්න අගාධයෙන් ගොඩ එන්න පුලුවන්. බැංකුවල ණය ගෙවා ගන්න හැකි ආර්ථිකයක් හදා ගන්න, විශ්වාසනීය ව්යාපාරිකයින් ලෙස කටයුතු කරන්න බැරි වෙලා තියනවා. මේ වෙනකොටත් අපි බොහෝ දෙනෙකුට බැංකුවලින් දන්වලා එවලා තියනවා මේ ණය ගන්න බෑ කියලා.
ඒ නිසා බැංකුවක ක්රිබ් එකට අහුවෙලාද කියල බලන්නෙ නැතුව අපේ ව්යාපාර කරගෙන යන දිහා හරි බලලා අපිට යම් සහනයක් ලබා දීලා මේ යල් කන්නයේ ගොවීන්ගෙන් වී අස්වනු මිලදී ගන්න අපිට අවස්ථාව සලසා දෙන්න කියල ජනාධිපතිතුමාගෙන් හා රජයෙන් අපි ගෞරවයෙන් ඉල්ලා සිටිනවා.
අපි හිතනවා ජනාධිපතිතුමා අපි පත්වෙලා තියෙන අසරණ තත්වය පිලිබඳව වටහා ගනී කියලා. මේ ප්රශ්ණ විසඳන්න කටයුතු කරාවි කියලා.
