එෂාමා කාරියකරවන
ජ්යෙෂ්ඨ මනෝ උපදේශිකා –
දේව වන්දනාව ශිෂ්ඨාචාරවත් මනුෂ්යයා සමාජය මූලාරම්භයේ දක්වා දිවෙන්නකි. එම සංකල්ප බිහිවී වැඩි වර්ධනය වන්නේ ශිෂ්ඨාචාරයේ පරිනතියත් සමගය. මනුෂ්ය සමාජය අධ්යාත්මිකව සංවර්ධනයට සහ සදාචාරාත්මක පාලනයට දේව සංකල්පය බෙහෙවින්ම බලපැවේය.
ආගම් අනුව දෙවියන්ගේ ස්වභාව වෙනස්වේ.
බෞද්ධයන් විශ්වාස කරන දෙවියන් සම්යක් දෘෂ්ටිකය. ඔවුන් බුදුරජාණන් වහන්සේ සරණගිය අයය. සදෙව් ලොව ඔවුහු වාසය කරති. සක්දෙවිඳු ඔවුන්ගේ ප්රධානියාය.බෞද්ධයෝ කුසලකර්ම සිදුකර ඔවුන්ට පින් අනුමෝදන් කරති.
මෙයට අමතරව හින්දු සහ බෞද්ධ දෙගොල්ලන්ම වඳින පුදන දේව කොට්ඨාසයක් සිටිති. විෂ්ණු, කතරගම, ගණ, පත්තිනි, දෙවියෝ සිංහල හින්දු අය අදහන දෙවිවරුය. කතරගම, දැඩිමුණ්ඩ, කඩවර, අලුත්නුවර, ගම්බාර ආදී දෙවියන් සහ ප්රාදේශීය දෙවිවරු රාශියක්ද බෞද්ධ වන්දනා ලයිස්තුවේ සිටිති.
හින්දූන්ගේ දෙවිවරු රාශියකි. විෂ්ණු, ඊෂ්වර, ශිව, ස්කන්ධ , ගණ, කාලී, රාම, ක්රිෂණ ආදියට අමතරව තවත් දෙවියන් දේවතාවියන් රාශියක් ඔවුන්ට වෙති
කිතුනු අයගේ දෙවියන් මැවුම්කරුවෙකි. සමස්ත ලෝකය ඉරහඳ තාරුකා මැවුම් කරුවා ඔහුය. පෘථිවියේ සියලු ජීවී අජීවී දේවල මැවුම්කරුවා දෙවියන් වහන්සේය. එමනිසා කිතුනුවෝ දැඩි භක්තියකින් දෙවියන්වහන්සේ පුදති. ඔවුන්ට අනුව ඇත්තේ එකම දෙවියකු පමණි
ඉස්ලාමයේ අල්ලා දෙවියන් වහන්සේ ඔවුන්ගේ දෙවියන් වේ. ඉස්ලාම් බැතිමතුන්ද දෙවියන් විෂයෙහි දැඩි භක්තියකින් හැසිරෙති.
කාන්තා දෙවිවරු අතර මිනිස්සුන්ට ඉතාම සමීප දේවතාවිය වන්නේ පත්තිනි දෙවියෝය. දෙවියන් කාන්තාවක් වුවද දෙවියන්ගේ ආවතේව සියල්ල පුරුෂයන් විසින් කරනු ලබයි.
සම්මතය අනුව මිනිස්සුන්ට දෙවියන්ට සමීපව ඍජුව පිහිට පැතීමට නොහැකිය . එය සිදුවන්නේ මේ කපුවන්ගේ මාර්ගයෙනි.
මිනිස්සු දෙවියන්ගෙන් ඈත් කිරීමට මේ ආවතේව කරුවෝ කටයුතු කරති. ඒ වගේම තවත් බාධාවක් නම් කිල්ලය.
කිල්ල යනු දෙවියන් අබිමුවට යෑමට බාධා කරන ස්වභාවික සිද්ධි සමූහයකි. මල්වර කිල්ල, අවමඟුල් කිල්ල, දරු ප්රසූත කිල්ල, දෙවියන්ගේ ලෙඩ කිල්ල, සමහර මස් මාංශ අනුභව කිල්ල ආදී කිලි අටෝරාශියකි.
බෞද්ධ , කිතුනු දෙවිවරුන්ගේ අබියසට යෑමට කිල්ල කිසිම බාධාවක් නොවේ
ඇත්තටම මේ කිල්ල කාගේ නිර්මාණයක්ද? එය කිසිසේත්ම දෙවියන්ගේ විය නොහැකිය. දෙවියන් මිනිස්සුන්ට වෙනස්කොට සලකනවා නම් සැලකිය යුත්තේ හොඳ සහ නරක ලෙසින් පමණි. මනුෂ්ය ජීවිතයේ ඉතාම ස්වාභාවික තත්වයන් ප්රතික්ෂේප කිරීමට තරම් දෙවිවරු අඥාන වෙතැයි සිතිය නොහැකිය.
පත්තිනි දේවාලයට ගිය දැරියක් මල්වර වූ බව එහිදී දැනගන්නට ලැබීම නිසා ඇතිවූ ගැටළුවක් ගැන විශාල කතාවක් සමාජ ජාලා අතර සංසරණය වෙයි. එම දැරියගේ පවුලේ අයටත්, දන්නා හඳුනනා අයටත්, සොයන බලන අයටත් පණිවුඩයක් දීමට කැමැත්තෙමි.
මල්වරවීම ස්වභාවික ජීව විද්යාත්මක සංසිද්ධියකි. එය ඔබට අවශ්ය වෙලාවට සිදුවන්නක් නොවේ. එය ශරීර අභ්යන්තරයේ සිදුවන විශාල ක්රියාදාම ගණනාවක ප්රථිඵලයක් ලෙස සිදුවන්නකි. දැරියක් මාතෘත්වය දරන්නට හැකියාව සම්පූර්ණ කර ඇති බවට දෙන සුබ පණිවුඩය මල්වරයයි.
මෙවන් සරල ස්වභාවික සංසිද්ධියක් ගැන මූලික දැනුම්දීම සිදුවන අවස්ථාවේ සියලු කාන්තාවෝ සිටියේ නිවසේ නොවේ.
පාසල, ක්රීඩාපිටිය, උත්සවයක, නෑ ගෙදරක, පන්සලක, පල්ලියක, අහස් යානයක ඕනෑම තැනක මෙන් දේවාලයකද සිටිය හැකිය.
ඉඳින් මේ දැරිය සිටියේ පත්තිනි දෙවියන්ගේ නිවහනේය. පත්තිනි මෑනියන්ට සියලු දුක් පෙනෙන්නේ නම් අප කලබල විය යුතු නැත. පත්තිනි මෑණියෝ මේ දැරිය තම නිවහනේදී මල්වරවන බව දැනගෙන සිටියා විය යුතුය. සියල්ල දත් පත්තිනි විසින් කිල්ල පනවා තිබ්බේ නම් දැරිය දේවාලයට පැමිණීම ඇය වළක්වනු ඇති.
එමනිසා නිකරුණේ ඔබේ දරුවාට මානසික අවපීඩනයක් වන ලෙස කිසිසේත් ක්රියා නොකරන්නයැයි කරුණාවෙන් ඉල්ලමි.
අවිද්යාවෙන් මත් වී ගෙදරට පවුලට, ගමට විපතක් වී යැයි සිතා දරුවාට අවමන් කිරීම, නිග්රහ කිරීම කවුරුන් හෝ කරන්නේ නම් දරුවා ඉන් බේරා ආරක්ෂා කරන්න. ඇය දැනටමත් බියවී සිටී නම් ඇයව සනසවන්න.
දෙවියන් පවා විශ්වධර්මතා වලට යටත් බව තේරුම් ගන්න. සොබාදහමේ කාර්යයන්ට දෙවියන් අත පොවන්නේ නැති බවත්,
දෙවියන් කරනවා තබා කරන්නට සිතන්නේවත් නැති දේවල් දෙවියන් කරන්නේ යැයි සිතා අන්ධ විශ්වාසයෙන් සිටින්නේ අප බැවින් දෙවියන්ට කිරීමට දෙයක් නැතිබව වටහාගන්න.
පත්තිනි අම්මාගේ නිවහනකදී නෑඹුල් දැරියක් මල්වරවීම පත්තිනි අම්මා කාන්තාවක් ලෙස පුදුමයට පත්නොවන බව තේරුම්ගෙන,
මෙය මහා පුදුමයක් කරගෙන සිටින මිනිස්සුන්ගෙන් ඔබේ දරුවා රැකගන්න. ඇගේ මානසික සුවය ආරක්ෂා කරගන්න.
