මනම්පිටිය නිමල් ජයරත්න –
රෝගී දරුවෙකු ඇතුළු දරුවන් දෙදෙනකු සමඟ ජීවත්වීමට ස්ථිර නිවසක් නොමැති කමින් පොලොන්නරුව ඇලහැර මින්නේරිය රක්ෂිතයට මායිම්ව වන අලි ගහන පරිසරයක වන සතුන්ගෙන් බේරීම සඳහාත් කෝන්ගසක් උඩ අටවාගත් පැල්පතක ජීවත්වන දරු පවුලක් පිළිබඳ සංවේදී කතාවක් පොලොන්නරුව ඇලහැර බකමූණ ඔරුබැඳිසියඹලාව ගම්මානයෙන් වාර්තා විය.
අවුරුදු තුනහමාරක් වයසැති ලියුකේමියාවෙන් පෙළෙන තම දරුවා සමග අවුරුදු 8ක තවත් පිරිමි දරුවෙකු සහ අවුරුදු 32ක බිරිය සමඟ අඩිතිහක් පමණ උසැති කෝං ගසක් උඩ අටවාගත් පැල්පතක ජීවත් වන මෙම තරුණ පියා 34 වියති චමින්ද සඳරුවන් නැමැත්තෙකි.
බිරියගේ දෙමව්පියන් සමග දේපළ පිළිබඳ ඇතිවූ ආරවුලකින් අනතුරුව මෙලෙස හුදෙකලා වූ මෙම දරුපවුල මීට මාසයකට ආසන්න කාලයක සිට කෝං ගසක් උඩ රාත්රි කාලයේ ජීවිතය ගතකරන අතර කෝං ගසපහළ තවත් පැල්පතක් ඉදිකර ඒ තුළ දහවල් කාලයේ ජීවත්වෙති.
විවිධ කුලීවැඩවල නිරතවෙමින් චමින්ද සඳරුවන් තම ලියුකේමියාවෙන් පෙළෙන අවුරුදු තුනහමාරේ දරුවාට අවශ්ය ප්රතිකාර ගැනීමට වියදම් සොයා ගන්නා ආකාරය සිත් කම්පා කරන්නේය.
තමන්ට රජයෙන් ලැබෙන සමෘද්ධි සහනාධාරය නොලැබෙන බවත්, පොරොත්තු ලේඛණයට නම ඇතුළත් වී ඇති බවත්, ලියුකේමියාවෙන් පෙළෙන දරුවා වෙනුවෙන් රුපියල් 1500ක රෝගාධාර දීමනාවක් ලබාදෙන බවත් ඔහු කියයි.
චමින්ද සඳරුවන් ඇතුළු මෙම දරුපවුල ජීවත් වෙන අහල පහල කිහිප දෙනෙකු ඔවුනට ආහාරපාන ආදියෙන් ඉඳහිට සංග්රහ කරන අතර ලියුකේමියාවෙන් පෙනෙන දරුවාට ප්රතිකාර ගැනීමට යන වියදම් සොයාගැනීමට චමින්දට මහත් සටනක් කිරීමට සිදුව තිබේ.
මාසයකට රුපියල් 12,500 ක් වැනි මුදලක් ඒ සඳහා අවශ්ය වන බව 32 ඒ .ජී.එරන්දි පියුමිකා තරුණ මව අප සමග පැවසුවේ හැඬු කඳුලිනි. 
“මගේ අවුරුදු තුනහමාරේ පුතාට ලියුකේමියාව රෝගය නිසා මහරගම අපේක්ෂා රෝහලෙන් තමයි දැනට බෙහෙත් හේත් ගන්නෙ. මාසෙකට දෙතුන් වතාවක් යන්ඩ ඕනෙ. එක පාරක් යන්න එන්න රුපියල් 12,500 ක් විතර වියදම් වෙනවා. රෝහලේ බෙහෙත් නැති හින්දා අපිට ෆාමසි වලින් තමයි බෙහෙත් ටික ගන්නේ. ඉතිං ඒ නිසා අපි ගොඩක් අසරණ වෙලා ඉන්නේ.”
“මහත්තයා දැනට කුලී වැඩ කරන්නේ… හැමදාමත් කුලි වැඩ නෑ. අපි මහගෙදර තමයි ජීවත් වුනේ. එතන පොඩි ගැටලුවක් වෙලා තමයි මෙතෙන්ට ආවේ. අපිට පොඩි ඉඩම් කෑල්ලක් තියෙනවා, නමුත් ගේ හදාගන්න වත්කමක් නෑ. දැනට පැල්පතක දවාලෙට ඉන්නවා, රෑට අලි එන හින්දා කෝං ගහ උඩ හදාගත් පැල්පතක දරුවන් එක්ක ජීවත් වෙනවා.”
“ඒත් කුප්පි ලාම්පු පත්තු කරන්න අනාරක්ෂිත නිසා, 4 වසරේ පුතාට පාඩම් කරන්ඩ විදිහකුත් නෑ, අපිට ජීවත් වෙන්න අමාරුයි. මේ අහල පහල අය තමයි මොනවා හරි කන්ඩ දෙයක් ගෙනත් දෙන්නේ. ” ඇය කීවාය.”
මෙම අසරණ පවුල පිළිබඳ ඇලහැර ප්රාදේශීය ලේකම් සී.එම්. කරුණාරත්නගෙන් දුරකථනයෙන් කළ විමසීමකදී ඇය සඳහන් කළේ මෙම අසරණ පවුල සඳහා ස්ථිර නිවසක් ඉදිකිිරීමට කවුරුන් හෝ ඉදිරිපත් වන්නේ නම් ඒ සඳහා අවශ්ය වැලි කලුගල්. ඇතුළු මූලික අමුද්රව්ය ලබාදීමට හැකි බවත් දැනට අඩු ආදායම් පවුල් සඳහා නිවාස ඉදිකිරීමේ ව්යාපෘති නොමැති බවත්ය. රෝගාධාර දීමනා දැනට එම පවුල වෙත ලබාදීමට කටයුතු කරන බව ඇය කීවාය.
දුක් ගංගාවක් මැද අනාරක්ෂිතව කෝං ගසක් උඩ ජීවිතය ගතකරන මේ අසරණ පවුල වෙනුවෙන් ඔබට යමක් කිරීමට හැකිනම් මේ අලුත් අවුරුද්දේ එකතු වන්න. 0714627589 අංකයෙන් ඔවුන්ව සම්බන්ධ කරගත හැකිය.
