මාධ්ය සහ තැන් තැන්වල පලවෙන කතා දැක්කම ඔබේ ප්රියතම අපේක්ෂකයාට ඡන්දය දෙන්න විටෙක ඔබටම ලැජ්ජා හිතෙනවා ඇති.
ඒවුණාට ඕනෑම බූරැවෙක් වෙනුවෙන් ඡන්දය පාවිච්චි කරන්න දෙවරක් සිතන්න එපා. ඒ සදහා අපට සදාචාරාත්මක අයිතියක් තියෙනවා. (මක් නිසාද යත් අපෙත් වැඩි වෙනසක් නැති නිසා).
ලඟදී ජාත්යන්තර පර්යේෂණ වාර්තාවක් කියලා එකක් පල වුනා. ඒකෙ හැටියට බුද්ධිමත්ම මිනිසුන් ජීවත් වෙන රටවල් ශ්රේණිගත කිරීමෙන් ලංකාවට ලැබිලා තියෙන්නේ 136 වැනි තැන. මේක දැකපු මගේ බුද්ධිමත් මිතුරො නම් පරල වුනා. පච වාර්තාවක් කිව්වා. ඒවුනාට මෙහේ සිද්ධ වෙන සන්තෑසි දිහා බලන කොට නම් පුදුමෙකුත් නෑ. පුදුමෙ නම් අපිටත් පසු පසින් තව රටවල් අසූවක් ඉන්න එක. ඕනනම් ඒ ගැන හිතලා අපිට සතුටු වෙන්නත් පුලුවන්.
මේ වාර්තාව සත්ය නම් හෙට වෙන කොට බුද්ධි මට්ටම සීඝ්රයෙන් ඉහළ නංවා ගන්න අපිට මැජික් අරිෂ්ටයක් නෑනෙ. ඒ හින්දා අපේ බුද්ධි මට්ටමට සරිලන කවුරැන් හෝ තක්කඩියෙකුට බය නැතුව ඡන්දය දෙන්න අපිට සාධාරණ හේතුවක් තියෙනවා.
ඔබේ ප්රියතම අපේක්ෂකයාට කුඩු, එතනෝල් චෝදනා ඇතැයි කියා ලැජ්ජාවට පත් නොවන්න. මන්ද මේ කිසිවක් සම්පූර්ණයෙන් තුරන් කළ රටක් මෙලොව නැති නිසා. මතට ඇබ්බැහි වීම මත් ලෝලියාගේ දුර්වල කමක් මිස වෙළෙන්දාගේ වැරැද්දක් නෙමෙයි. ඔවුන් බලෙන් මේවා අලෙවි නොකරන අතර ඉල්ලුමට සැපයුම දී කරන්නේ සමාජ සේවයක් බව ද අමතක නොකරන්න.
ඔබේ අපේක්ෂකයා අහිංසක පාතාලයෙක්, මිනීමරැවෙක්, ස්ත්රී දූෂකයෙක්, ළමා අපචාරකයෙක් වුනාට කම් නෑ. මොකද ඔබේ බිරිඳ ළමයි තාම යහතින් ඉන්නවනේ. උන්ට මුකුත් වෙනකන් අනිත් උන්ට මොක වුනත් ඒ ගැන කරදර වෙන්න එපා. අනුන්ගේ රෙද්දවල් ගැන කරදර නොවීම මහත්මා ගකියක්. අනික ඔය ඝාතනයට, අපහරණයට ලක් වුණා කියන උන්ගෙ චරිතෙත් හොද නැතුව ඇති.
මැරයො අපිට කොච්චර ආදරේද අපි මැරයොන්ට කොච්චර ආදරේද කියලා මෑතකදි සබරගමුවේ කළගුණ දත් ජනයා හෙළු ඒ උණු කඳුළු අපට මතක් කර දුන්නා. අනෙක මේ වගේ අමන කම් අනාගතයේ සිදුවීම වැලැක්වීමට නම් පාර්ලිමේන්තුව තුළ නීති සම්පාදනය සදහා මේවා පිළිබඳ පුද්ගලිකවම අත්දැකීම් තියෙන පිරිසක් සිටීමත් අත්යාවශ්යයිනේ.
ඔබ කැමතිම අපේක්ෂකයාට දූෂණ වංචා චෝදනා එල්ල වී ඇත්නම් අප නියෝජනය කිරීම සඳහා අනිවාර්යයෙන් පාර්ලිමේන්තුවේ සිටිය යුතු සුදුසුම පුද්ගලයා ඔහුයි. මේ රටේ ජනගහනය මිලියන විසි දෙකෙන් වැඩිමනක් ඉන්නෙ දූෂිත පුරවැසියන්. බස් එකේ, බැංකුවේ, රෝහලේ සහ පාසලේ දී නිරන්තරයෙන් අපිට අපවම මුණ ගැසේනවා. ඉතිං අපව පාර්ලිමේන්තුව තුළ නියෝජනය කිරීමට දූෂිත නොවන අයෙකුට කිසිම සදාචාරාත්මක අයිතියක් නෑ. මිලියන විසි දෙකක් දූෂිතයන් පාලනය කිරීම සදහා හොදම දූෂිත නායකයන් දෙසීයයක් තෝරා ගමු.
අපේක්ෂකයින් මින් ඉහත දුන් පොරොන්දු කඩ කර තිබීම උන් හා උරණ වීමට කිසිදු සාධාරණ හේතුවක් නොවන බව ද කරැණාවෙන් සලකන්න. පොරොන්දු ඉටු නොකිරීම මනුස්ස ගතියක්. සමාව දීම දේව ගතියක්. අනික ඔබට මේ දේව වරය ලැබෙන්නේ මැතිවරණයක් දාට පමණය. එබැවින් දෙවියෙකු වීමට ඇති අගනා අවස්ථාව පැහැර නොහරින්න.
ජාති ආගම් භේද අවුලවන අපේක්ෂකයෝ රටට මහගු සම්පතක්. වාර්ගික ගැටළු තිබීම නිසා එම රටට ගැටුම් නිරාකරණය කිරීම සදහා විදේශීය විනිමය ගලා එනවා. ගැටුම් සමනය කරන එන්.ජී.ඕ.ත් පෝසත් වෙනවා. රැකියා අවස්ථා වැඩිවෙනවා. එබැවින් එවැන්නන් වැඩි වැඩියෙන් පාර්ලිමේන්තුවේ සිටීම රටේ ආර්ථික දියුණුවට රැකුලක්. රටේ ආර්ථික නැංවීමට ඔබේ කතිරය ගහන්න. ඉතිං ඔබත් ජාතියක් අවුළුවා ජාතික වීරයෙක් වෙන්න.
අවසාන වශයෙන් ගත් විට ඡන්දය යනු මෙලෝ තෙරැමක් නැති මගුලක්. පසුගිය හැත්තෑ දෙවසර තුළ මහමැතිවරණ දුසිමක් තිබ්බත් හැදුණු රටක් නැති. අනෙක තව වසර පහකින් තවත් මැතිවරණයක් ඒවි. ඒ නිසා මෙවර වැරැද්දක් වුනොත් ඊළඟ වාරයේදී නිවැරදි කර ගන්න පුලුවනි. ඒ නිසා කරපු වැරදි නැවත කරන්න බය වෙන්න එපා.
එක්කො ඡන්දෙ දාන්නම යන්නෙ නැතුව, ඔබ කවදත් ආසා කරපු බතින් බුලතින් දහඩියෙන් ලෙයින් පිරැණු ඒ සිහින රාජ්ය බිහිකිරීමේ මහා පුණ්ය කර්මයට දායක වීමටත් ඔබට පුලුවන්.
හෙටින් බිහිවන නව ලෝකය ඔබේම නිර්මාණයක්. ඉතිං අනිද්දා සිට නහයෙන් නාඩන්න. හොදම හොරැන් තෝරා ඡන්දය දෙන්න.
