මනම්පිටිය නිමල් ජයරත්න –
පොලොන්නරුව බකමූණ පොලිස් බල ප්රදේශයේ යාය 25 ගම්මානයේ පොදු සුසාන භූමියට දහවල් කාලයේ ඇතුළු වී, සොහොන් කොත් මත බලි පූජා පවත්වමින් සිටි කාන්තාවන් දෙදෙනෙකු බකමූණ පොලීසිය විසින් අත්අඩංගුවට ගෙන තිබේ.
මීට සති දෙකකට පමණ පෙර මිහිදන් කරන ලද මෘතදේහයක සොහොන් ගැබක් සහ තවත් පැරණි සොහොන් කොතක් ස්ථාන දෙකකින් හාරා, ඒවා තුළට යම් කිසි ද්රව්යයක් ඇතුළු කර ඇති බව මූලික පරීක්ෂණවලදී අනාවරණය වී ඇත. සැකකාර කාන්තාවන් දෙදෙනා සොහොන් කොත් මත මැටිවලින් සෑදූ මිනිස් රූප තබා පහන් දල්වමින් සිටියදී, මාර්ගයේ ගමන් ගත් අයෙකු විසින් එය දැක ගම්වාසීන්ට දැනුම් දී තිබේ.
පසුව ගම්වාසීන් එක්ව සොයා බලා මේ පිළිබඳව බකමූණ පොලීසිය දැනුවත් කිරීමට පියවර ගෙන ඇත. ඒ අනුව වහාම ක්රියාත්මක වූ පොලිස් නිලධාරීන් කණ්ඩායමක් සුසාන භූමිය වෙත පැමිණ, බලි පූජාව සඳහා යොදාගත් ද්රව්ය සමඟ සැකකාර කාන්තාවන් දෙදෙනා අත්අඩංගුවට ගෙන තිබේ.
මෙසේ අත්අඩංගුවට පත්ව ඇත්තේ හිඟුරක්ගොඩ ප්රදේශයේ පදිංචි 49 හැවිරිදි කාන්තාවක් සහ බකමූණ, සරුබිම ප්රදේශයේ පදිංචි 38 හැවිරිදි කාන්තාවකි.
අත්අඩංගුවට ගත් සැකකාරියන් දෙදෙනා “පුද්ගලික හා පොදු සුසාන භූමි ආඥා පනත” යටතේ, සොහොන් කොත්වලට හානි සිදු කිරීමේ වරද මත හෙට (22) බකමූණ සංචාරක මහේස්ත්රාත් අධිකරණය වෙත ඉදිරිපත් කිරීමට නියමිතය. මෙම කාන්තාවන් මීට පෙරද මෙවැනි ගුප්ත ක්රියා සඳහා මෙම සුසාන භූමිය යොදාගෙන ඇති බවත්, මේ හේතුවෙන් ගම්මානය තුළ දැඩි භීතියක් හටගෙන ඇති බවත් ගම්වාසීහු පවසති. සිද්ධිය සම්බන්ධයෙන් බකමූණ පොලීසිය වැඩිදුර පරීක්ෂණ පවත්වයි.
