NDB බැංකුවේ සිදුව ඇති බව කියන මූල්ය වංචාවන්, පද්ධතිමය අතපසුවීම් සහ මූල්ය අධීක්ෂණයේ පවතින දුර්වලතා පිළිබඳ සොයා බැලීමට ස්වාධීන ජාත්යන්තර වෝහාරික පරීක්ෂණයක් පවත්වන ලෙස ඉල්ලා පාර්ලිමේන්තු මන්ත්රී රවී කරුණානායක ජනාධිපති අනුර කුමාර දිසානායක වෙත විශේෂ ලිපියක් යොමු කර තිබේ.
කරුණු 05ක් මුල් කරගනිමින් යොමු කර ඇති මෙම ලිපිය මගින් මන්ත්රීවරයා පෙන්වා දෙන්නේ, ශ්රී ලංකා මහ බැංකුව ප්රධාන නියාමකයා ලෙස මූල්ය රෙගුලාසිවලට අනුකූල වීම සහ අවදානම් නිරීක්ෂණ යාන්ත්රණයන් සහතික කිරීමට අපොහොසත් වී ඇති බවයි.
මෙම වංචනික ගනුදෙනු හේතුවෙන් රජයට ලැබිය යුතු විශාල බදු ආදායමක් අහිමි වී ඇති බව පෙන්වා දෙන රවී කරුණානායක, එම පාඩුව කඩිනමින් ගණනය කර අයකර ගැනීමට පියවර ගත යුතු බවද අවධාරණය කරයි.
ස්වාධීන වෝහාරික විගණනයක අවශ්යතාවය
මෙම පරීක්ෂණය සඳහා ආයතනයක් පත් කිරීමට මහ බැංකුව ගෙන ඇති තීරණය සම්බන්ධයෙන් ගැටලු පවතින බව පවසන මන්ත්රීවරයා, එහි ස්වාධීනත්වය සහ විනිවිදභාවය ආරක්ෂා කර ගැනීම සඳහා මුදල් අමාත්යවරයා ලෙස ජනාධිපතිවරයා මැදිහත් විය යුතු බව සඳහන් කරයි.
ඒ අනුව මන්ත්රීවරයා සිය ලිපිය මගින් ජනාධිපතිවරයාගෙන් ඉල්ලා සිටින ප්රධාන කරුණු මෙසේය:
- ජාත්යන්තර කණ්ඩායමක් පත් කිරීම: කිසිදු පක්ෂපාතීත්වයකින් තොර, ජාත්යන්තරව පිළිගත් ස්වාධීන වෝහාරික පරීක්ෂණ කණ්ඩායමක් පත් කිරීම.
- විදේශීය සහය ලබා ගැනීම: ඉන්දීය රිසර්ව් බැංකුව (RBI), ජපාන බැංකුව (BOJ), එංගලන්ත බැංකුව (BOE), සිංගප්පූරු මූල්ය අධිකාරිය (MAS) හෝ මැලේසියානු මහ බැංකුවේ සහය මේ සඳහා ලබා ගැනීම.
- විෂය පථය පුළුල් කිරීම: මහ බැංකුවේ නියාමන අතපසුවීම්, තාක්ෂණික පද්ධතිවල දුර්වලතා, ප්රාග්ධන වෙළෙඳපොළ අධීක්ෂණ අසාර්ථකත්වයන් සහ 2023 අංක 16 දරන මහ බැංකු පනත යටතේ වගවීමේ රාමුව පරීක්ෂා කිරීම.
- සුදුසුකම් පරීක්ෂා කිරීම: බැංකුවල විගණන කමිටු සාමාජිකයින්ට බැංකු ක්ෂේත්රයේ ප්රමාණවත් පළපුරුද්දක් නොමැති වීම තුළින් මහ බැංකුවේ “සුදුසු සහ යෝග්ය” (Fit and Proper) නිර්ණායකවල සඵලතාවය පිළිබඳ පවතින ගැටලුව විමර්ශනය කිරීම.
- IMF දැනුවත් කිරීම: මූල්ය අංශයේ පාලනය ශක්තිමත් කිරීමට රජය ගන්නා පියවර ජාත්යන්තර මූල්ය අරමුදල (IMF) වෙත නිල වශයෙන් දැනුම් දීම.
රජයේ මුදල් පිළිබඳ කාරක සභාවේ (CoPF) සහාය මෙම ක්රියාවලිය සඳහා ලබා දීමට සූදානම් බවත්, ස්වාධීන වෘත්තීය ආයතන හඳුනා ගැනීමට සහ නිර්දේශ කිරීමට තම කාරක සභාවට දායක විය හැකි බවත් රවී කරුණානායක වැඩිදුරටත් සඳහන් කරයි. බැංකු පද්ධතිය කෙරෙහි පවතින විශ්වාසය සහ මූල්ය ස්ථාවරත්වය ආරක්ෂා කර ගැනීමට මෙම පියවර කඩිනමින් ගත යුතු බව මන්ත්රීවරයා සිය ලිපිය මගින් අවධාරණය කර ඇත.
