13 හැවිරිදි පුංචි කොල්ලෙක් ගැන දැන් ලෝක ක්රිකට් ලෝලීන් උනන්දුවෙනි. මේ කොල්ලා ඊයේ (25) සෞදි අරාබියේ ජෙඩා නුවරදී පැවැති IPL වෙන්දේසියේදී ඉන්දීය රුපියල් කෝටි 1.1කට රාජස්ථාන් රෝයල්ස් කණ්ඩායම විසින් මිලට ගනු ලැබුවේය. අයිපීඑල් ඉතිහාසයේ කණ්ඩායමක් හා ගිවිසුම්ගත වුන ලාබාලම ක්රීඩකයා ලෙස ඉතිහාසගතවන මෙම කොළුවා මිලදී ගැනීමට දිල්ලි කැපිටල් කණ්ඩායම සහ රාජස්ථාන් රෝයල්ස් කණ්ඩායම අතර පැවැති තියුණු තරගයක් පැවතිනි. අවසානයේ ජය ගත්තේ රාජස්ථාන් රෝයල්ස් කණ්ඩායමය.
පොඩිඑකා වෛභව් සූර්යවංශී ය. ඉපදී ඇත්තේ 2011 වසරේ මාර්තු 27 ය. අයි.පී.එල් කොන්ත්රාත්තව ලබා ගන්නා දිනට ඔහුගේ වයස අවුරුදු 13 යි දවස් 243කි. අපේ නම් තවම 15න් පහළ කණ්ඩායමක තවත් අවුරුදු දෙකක් ක්රීඩා කළ හැකි 8 පන්තියේ ඉගෙන ගන්නා පොඩි එකෙකි.
පොඩි උන් ලොකු ක්රිකට් ගහපු අවස්ථා ඇත. අපට මතක කාලයේ එහෙම අත්දැකීම් තිබේ. අර්ජුන රණතුංග ජාතික කණ්ඩායමට තේරෙන්නේ වයස අවුරුදු 16 දී ය. සහීඩ් ඇෆ්රිඩි අවුරුදු 17 දී පකිස්ථාන පිල නියෝජනය කරමින් ලෝකය හෙල්ලුවේය. පාසල් වයසේ ක්රීඩකයින් ගණනාවක් ජාතික කණ්ඩායම්වලට ක්රීඩා කරනු දැක ඇත්තෙමු.
ඇස් උඩ යන වෙනස එය නොවේ. මේ පොඩි එකාට තවම අවුරුදු 13ක් පමණක් වීමය. අවුරුදු 13ක පොඩි එකෙක් ලෝකයේ ජව සම්පන්නම ක්රීඩකයින් එකට එක් කරන, ප්රහාරාත්මකම සහ වේගවත්ම ප්රධාන ක්රිකට් සැනකෙළිය වූ අයිපීඑල් තරගාවලියේ කණ්ඩායමක් නියෝජනය කරනු ඇසීමය. ඔහු වෙනුවෙන් කණ්ඩායම් දෙකක් පොර බැදීමය. මේ කතා ඇසීමත් ක්රිකට් ලෝකය පුදුම කරන්නේය.
කවුද මේ වෛභව් සූර්යවංශී –
වෛභව් සූර්යවංශි බිහාර් යොවුන් ක්රීඩකයෙකි. වමතින් පන්දුවට පහර දෙන ඉදිරිපෙළ පිතිකරුවෙකි. ඔහු රාජස්ථාන් රෝයල්ස් කණ්ඩායම මිලදී ගන්නේ ඉන්දීය රුපියල් එක් කෝටි දස ලක්ෂයකයට. අපේ සුපිරි ක්රීඩක මහීෂ් තීක්ෂණගේ ලන්සුව වූයේත් ඒ මිලය.
වෛභව් දැනටමත් ඉන්දීය වයස අවුරුදු 19 න් පහළ කණ්ඩායම නියෝජනය කරන්නේය. මිට මාස දෙකකට පෙර ඕස්ට්රේලියානු වයස අවුරුදු 19 න් පහළ කණ්ඩායමට එරෙහිව ඉන්දීය වසය අවුරුදු 19න් පහළ කන්ඩායම නියෝජනය කරමින් වෛභව් චෙන්නායි හි පැවති සිව්දින තරගයකදී ශතකයක් ලබා ගත්තේ මීට මාස දෙකකට කලිනි.
ලන්සු තරගය…
භෛව් වෙනුවෙන් ලන්සු තැබීම ආරම්භ වන්නේ ඉන්දීය රුපියල් ලක්ෂ තිහකිනි. එතැන් සිට රාජස්ථාන් රෝහල් සහ දිල්ලි කැපිටල්ස් කණ්ඩායම් ලන්සු තැබීමේ සටන ඇරඹූහ.
“ඔහු නාග්පූර් හි අපගේ ඉහළ කාර්ය සාධන මධ්යස්ථානයට ගොස් ගෙනාවා. ඔහු ගැන එහි අත්හදා බැලීම් කළා. එහි අපගේ පුහුණු කිරීමේ ක්රියාවලිය තුළ ඔහු ඇත්තෙන්ම අපව විශ්මයට පත් කළා. වෙන්දේසිය අවසන් වූ පසු RR ප්රධාන විධායක නිලධාරී ජේක් ලුෂ් මැක්ක්රම් ( Jake Lush McCrum) පැවසීය.
“ඔහු ඇදහිය නොහැකි දක්ෂයෙක්, ඇත්ත වශයෙන්ම ඔබ විශ්වාසයක් තිබිය යුතුය, ඔහු IPL මට්ටමින් ඉහළටත් යා හැකියි. එබැවින් ඔහුව ඉදිරියට ගෙන යාමට ඉදිරි මාස කිහිපය තුළ බොහෝ වැඩ සිදුවනු ඇති. ඔහු වැනි දක්ෂයෙක් පැන්චයිස් ක්රිකට්වලට ලැබීම ගැන සතුටුයි.” ඔහු තව දුරටත් පැවසුවේය.
පට්නා සිට කිලෝමීටර් 100ක් පමණ ඊසාන දෙසින් පිහිටි නගරයක් වන සමස්තිපූර්හි වෙසෙන වෛභාව් සූර්යවංශී, මේ වසර මුලදී මුම්බායිට එරෙහිව ඔහුගේ පළමු පන්තියේ මංගල තරගයේ සිට රංජි කුසලාන තරඟ පහකට සහභාගී වී තිබේ. දැනට බිහාර් වෙනුවෙන් සයිඩ් මුෂ්ටාක් අලි කුසලානයේ T20 තරඟ ක්රීඩා කරයි. ඔහු පසුගියදා නොවැම්බර් 23 වැනිදා රාජස්තානයට එරෙහිව විස්සයි20 තරගයක් ක්රීඩා කර තිබිණි.
ඔහුගේ මේ දක්වා ක්රිකට් ක්රීඩාවේ විශේෂත්වය වන්නේ ඕස්ට්රේලියානු වයස අවුරුදු 19න් පහළ කණ්ඩායමට එරෙහිව ඉන්දීය 19න් පහළ කණ්ඩායාම නියෝජනය කරමින් පන්දු 58කදී ලබාගත් ශතකයයි. ඔහු ලකුණු 104කට දැවී ගියේය. එම පහරින් සූර්යවංශී යොවුන් වියේදී ශතකයක් රැස් කළ ලාබාලතම ක්රීඩකයා බවට පත් කළේය. ශතකය රැස් කරනවිට ඔහුගේ වයස අවුරුදු වසර 13කුත් දින 187කි. බංගලිදේශයේ වත්මන් නායක නජ්මුල් හොසේන් ශාන්තෝ විසින් තබා තිබූ වසර 14 යි දින 241 ක වාර්තාව ඔහු විසින් බිඳ දැමුවේය.
බිහාර් හි පැවති 19 න් පහළ තරඟාවලියක් වන රන්ධීර් වර්මා තරඟාවලියේදී සූර්යවංශි නොදැවී ත්රිත්ව ශතකයක් ලබා ගත්තේය. ඔහු නොදැවී ලබා ගත් ලකුණු ගණන ලකුණු 332 කි. ඔහු සිය ක්රීඩාව ගැන හිටපු ඉන්දීය ආරම්භක පිතිකරු වසීම් ජැෆර්ගෙන් වරින් වර උපදෙස් ලබා ගනී. ඔවුන් මුලින්ම මුණගැසී ඇත්තේ වර්ෂ 2023 නොවැම්බර් මාසයේදී බංග්ලාදේශයේ පැවති 19න් පහළ සුදු පන්දු තරඟාවලියකදීය.
කෙසේ වෙතත් ඔහුගේ විධිමත් පුහුණුකරු වන්නේ ඔහුගේ පියා වන සංජීව් සූර්යවංශි ය. සංජීව් ද ක්රිකට් ක්රීඩකයෙකි, නමුත් ඔහුට ඉහළ මට්ටමට යාමට නොහැකි වූ විට, ඔහු පුහුණුකරණය වෙත යොමු වූයේය. ඔහු දැන් වෛභව් සමඟ වැඩ කිරීමට පටන් ගෙන ඇත.
