දිනසේන රතුගමගේ –
තමන්ගේ ජීවිතයට මරණීය තර්ජන එල්ල වෙමින් පවතින නිසා වහාම තමන්ට උතුරු පළාතෙන් වෙනත් ප්රදේශයකට ස්ථාන මාරුවීමක් ලබා දෙන ලෙස මන්නාරම රෝහලේ වෛද්ය අධිකාරී එම් හනීෆා සෞඛ්ය ලේකම්වරයාගෙන් 25 දා ඉල්ලීමක් කොට තිබේ.
මන්නාරම රෝහලේදි දරු ප්රසූතියට පැමිණි මව්වරුන් තුන් දෙනෙකු මියගියේ තමාගේ සේවා කාලයෙදී බැවින් ඊට උරණ සිටින විශාල පිරිසක් සංවිධානය වී තමන්ට මේ අන්දමට මරණීය තර්ජන එල්ල කරණ බව ඔහු සිය ලිපියේ සදහන් කොට තිබේ.
මේ සම්බ්න්ධයෙන් පැවති පරීක්ෂණ වල ප්රතිපල හා ඒ ඔස්සේ ලබා දෙන ලද දඩුවම් ඉතා සුළු බව කියමින් මන්නාරමේ ජනතාව තමන්ට එරෙහිව නැගී සිටින බවද ඔහු පවසයි.
අවසන් වරට මවක් මිය ගිය අවස්ථාවේදී රෝහලට කඩා වැදුණු පිරිසක් තමන්ට පහර දීමට උත්සහ කළ අතර ඔවුන්ගේ ප්රහාර කීපයක් තමන් වෙත වැදුණු බවද දැන් වරින් වර රෝහලට පැමිණෙන හා දුරකතන ඇමතුම් ලබා ගන්නා පිරිස තමන්ව මරා දමන බවට තර්ජනය කිරීම නිසා සිය ජීවිතය බේරා ගැනීමට ඇති එකම විකල්පය උතුරු පළාතෙන් වෙනත් රෝහලකට ස්ථාන මාරුවීමක් ලබා ගෙන යාම බවද ඔහු සිය ලිපියේ සදහන් කොට ඇත.
මේ සියලු සිදුවීම් සම්බන්ධයෙන් තමන් මන්නාරම පොලීසියට හා වෙනත් වගකිවයුතු නිලධාරීන්ට දැනුම් දී ඇතත් ඒ සියලු දෙනාට තමන්ට ආරක්ෂාව ලබා දීමටම පමණක් කටයුතු කළ නොහැකි නිසා තමන්ව වහාම වෙනත් පළාතකට මාරු කොට යවන ලෙස ඔහු ඉල්ලා ඇත.
