-
සියලුම චෝදනා තරයේ ප්රතික්ෂේප කරනවා… කිසිම ගෙවීමක් කරන්නේ නැති බවත් දන්වනවා… හිරු ඇමති ලාල්ට ලිඛිතව දන්වයි….
කෘෂිකර්ම අමාත්ය කේ.ඩී ලාල්කාන්තගේ වත්කම් බැරකම් ප්රකාශයට අදාලව හිරු ප්රවෘත්ති වාර්තාකරණය සම්බන්ධයෙන් ඔහුගේ නීතීඥවරයා එවන ලද එන්තරවාසියට ප්රතිචාර දක්වමින්, එම එන්තරවාසිය මගින් ඉදිරිපත් කරන සියලුම චෝදනා තරයේ ප්රතික්ෂේප කරන බවත්, එහි සදහන් ඉල්ලීම් ද ඉටු නොකර බැහැර කරන බවත් හිරු මාධ්ය ජාලයේ නීතිවරුන් අමාත්යවරයා වෙත ලිඛිතව දන්වා තිබේ.
නිවැරදි කිරීමේ අයිතිය පිළිගනිමින් සිය සේවාදායකයා පසුගිය 18 වැනිදා හිරු ටී.වී සහ හිරු මාධ්ය ජාලයට අයත් අනෙකුත් සියලුම මාධ්ය ඔස්සේ වහාම නිවැරදි කිරීමක් සිදුකළ බව එම ලිඛිත දැන්වීමේ දී නීතිඥවරු අමාත්යවරයා වෙත ප්රකාශ කර ඇත.
2023 අංක 09 දරන දූෂණ විරෝධී පනත යටතේ ලාල් කාන්ත අමාත්යවරයාගේ වත්කම් ප්රකාශයෙහි දෝෂ පවතින බවත්, එම වත්කම් බැරකම් ප්රකාශය නීතියට අනුකුලව ඉදිරිපත් කර නැති බවත් දන්වන හිරු නීතිඥවරු දැඩි ස්වරයකින් ඇමතිවරයා වෙත දන්වා ඇත්තේ සිය සේවාදායකයාට එරෙහිව නීතිමය ක්රියාමාර්ග ආරම්භ කළහොත් ආයතනික පුරවැසියෙක් ලෙස සිය සේවාදායකයා සතු අයිතිවාසිකම් භාවිත කරනු ඇති බවය.
නීතිඥවරුන් ඇමතිවරයා වෙත දන්වා ඇත්තේ ඇමතිවරයා අනිවාර්ය ව්යවස්ථාපිත ප්රතිපාදන හිතාමතා උල්ලංඝණය කිරීම සම්බන්ධයෙන් නීත්යානුකූලව කටයුතු කරන බවය.
ලාල් කාන්ත ඇමතිවරයා පොදු දේපලවලට හානි කිරීම සහ පුරවැසියන්ට එරෙහිව ප්රචණ්ඩත්වය ඇවිස්සීම වැනි කරුණුවලට සිය වගකීම භාර ගනිමින් ප්රසිද්ධ දේශපාලන වේදිකාවලදී ප්රකාශ කර ඇති බවත්, මේ තත්ත්වය තුළ ඇමතිවරයා කිසියම් හෝ නීතිමය කටයුත්තක් ආරම්භ කළහොත් ඔහු කීර්ති නාමයක් නැති පුද්ගලයෙක් බව අධිකරණය ඉදිරියේ ඔප්පු වනු ඇති බවත් එම නීතිඥවරු කියා සිටිති.
එමෙන්ම හිරු මාධ්ය නාලිකාවේ විකාශන අයිතියට අනිසි ලෙස බාධා කිරීමේ ඕනෑම උත්සාහයකට එරෙහිව නීති මගින් කටයුතු කරනු ඇති බවත් නීතිඥවරු ලාල් කාන්ත ඇමතිවරයා වෙත දන්වා ඇත.
