ශ්රියානි විජේසිංහ
“අපිට උවමනා අයට අපි වැඩියෙන් දෙනවා. අඩුවෙන් දෙන්න ඕනේ අය කවුද කියලා තීරණය කරන්නේ අපියි. ඒ ගැන කථා කරන්න කාටවක් අයිතියක් නෑ ” ලෙස කෘෂිකර්ම ඇමති ලාල් කාන්ත පසුගියදා පාර්ලිමේන්තුවේදී කළ ප්රකාශය ආණ්ඩුවේ නිල ප්රකාශයද යන්න වහාම හෙළි කරන්නැයි රජයේ වෛද්ය නිලධාරීන්ගේ සංගමය ආණ්ඩුවෙන් ඉල්ලීමක් කරයි.
ජනාධිපතිවරනයට පෙර සහ පසුවත් ජනාධිපතිවරයා දිගින් දිගටම පෙනී සිටියේ විශේෂඥ වෛද්යවරුන්, වෛද්යවරුන් සෞඛ්ය වෘත්තිකයින් මේ රටතුළ රැක ගත යුතුයි යන ස්ථාවරයෙන් සහ ඔවුන්ට රැඳී සිටීමට සුදුසු පරිසරයක් නිර්මාණය කළ යුතුයි යන මතයේ බවත් ඔවුන්ට අවශ්ය විසඳුම් තීන්දු තීරණ ගැනීමට ආණ්ඩුවේ ප්රමුඛතාව ලබා දෙන බවත් යැයි පෙන්වා දෙන සංගමයේ මාධ්ය ප්රකාශක වෛද්ය චමිල් විජේසිංහ වැඩිදුරටත් සඳහන් කර සිටිනුයේ වත්මන් ආණ්ඩුවේ ප්රතිපත්තියට සහ දැක්මට සපුරා පටහැනි ප්රකාශයක් ඇමති ලාල් කාන්ත කර ඇති බවය.
විශේෂඥ වෛද්යවරුන් සහ වෛද්යවරුන් සම්බන්ධයෙන් දිගින් දිගටම කියා සිටියේ ආර්ථික යුක්තිය ඉෂ්ඨ විය යුතු බවත් මේ අනුව සේවයට සරිලන වැටුපක් ලැබෙන්නේ නම් පමණක් ඔවුන් රටතුළ රඳවා ගත හැකිවනු ඇතැයි වෛද්ය චමිල් පෙන්වාදේ.
වඩා නිදහස් පරිසරයක දැනට ලබා ගන්නා වැටුප මෙන් විසි තිස්ගුණයක වැටුපක් සමග වෛද්යවරයෙකුට රාජකාරි කිරීමේ හැකියාව විදේශ රටවල තිබියදී තවදුරටත් මේ රට තුළ රැඳී සිටින්නේ මේ රට හරිපාරේ ගමන් කරනු ඇතැයි යන විශ්වාසයෙන් යැයිද හෙතෙම අවධාරණය කළේය.
ජනාධිපතිවරයා සිය අයවැය කථාවෙත් යළි යළිත් අවධාරණය කළේ වෘත්තිකයන් රටතුළ රඳවා ගත යුතු බවවන නමුත් ලාල්කාන්ත ඇමතිවරයා කළ ප්රකාශයෙන් ගම්ය වන්නේ මේ රටතුළ වෛද්යවරුන් තවදුරටත් රටතුළ රඳවා ගැනීමට අවශ්ය නොමැති බවය යන්න යැයි මාධ්ය ප්රකාශකවරයා පෙන්වාදේ.
ලාල් කාන්ත ඇමතිවරයා සඳහන් කරනුයේ අවශ්ය නම් ඉන්න නැතිනම් යන්න වැනි අදහසක් බවත් , ඔහු කියන පරිදි වෛද්යවරුන්ට රට හැර යා හැකි නමුත් එසේ ගිය දවසට මේ රටේ රෝහල්, ශල්යගාර, බාහිර රෝගී අංශ, සායන ඇමතිවරුන්ට බලා ගැනීමට සිදුවන බවත්ය.
