අද (21) සහ හෙට (22) දිනවලදී ලංකා ඛනිජතෙල් නීතිගත සංස්ථාවෙන් ඉන්ධන බෙදාහැරීම් සිදුකරන බව ප්රකාශ කර තිබුණ ද, අද උදෑසන කොලොන්නාව පර්යන්තයට පැමිණි ඉන්ධන බවුසර් වෙත ඉන්ධන නිකුත් නොකිරීම හේතුවෙන් ඒවා ආපසු හැරී යන ආකාරය දක්නට ලැබුණි.
ඛනිජතෙල් නීතිගත සංස්ථාවේ කළමනාකාර අධ්යක්ෂ මයුර නෙත්තිකුමාර විසින් ඊයේ (20) ප්රකාශ කර තිබුණේ සති අන්තයේ ද අඛණ්ඩව ඉන්ධන බෙදාහැරීම් සිදුකරන බවය. එසේ වුවද, ඇනවුම් කළ ඉන්ධන ලබාගැනීමේ අපේක්ෂාවෙන් පැමිණි බවුසර් රථ හිමියන් පවසන්නේ තමන්ට ඉන්ධන නොලැබුණු බවය.
මේ සම්බන්ධයෙන් කළ විමසීමකදී කළමනාකාර අධ්යක්ෂ මයුර නෙත්තිකුමාර සඳහන් කළේ ඊයේ රාත්රිය වන විට සාමාන්ය දෛනික අවශ්යතාවය මෙන් දෙගුණයක ඉන්ධන ප්රමාණයක් නිකුත් කර අවසන් කර ඇති බව යැයි අද දෙරණ වාර්තා කර ඇත.
“ඊයේ රාත්රිය වන විට ඩීසල් මෙට්රික්ටොන් 10,000කට අධික ප්රමාණයක් සහ පෙට්රල් මෙට්රික්ටොන් 7,000ක් අපි නිකුත් කළා. සාමාන්යයෙන් දිනකට නිකුත් කරන්නේ ඩීසල් මෙට්රික්ටොන් 4,880ක් වැනි ප්රමාණයක්. ඒ අනුව අද දිනට නිකුත් කිරීමට තිබූ ඇනවුම් බොහොමයක් ඊයේ රාත්රිය වන විටම පිටත් කර හැරීමට අප පියවර ගත්තා,” යැයි ඔහු පවසා ඇත.
අද උදෑසන කාලයේදී ප්රමුඛතාවය ලබා දී ඇත්තේ අත්යාවශ්ය සේවා, ලංගම ඩිපෝ, විදුලි බලාගාර සහ ගුවන් යානා ඉන්ධන බෙදාහැරීම සඳහා බවත්, පස්වරු කාලයේදී අවශ්යතාවය පරිදි අනෙකුත් ස්ථාන සඳහා ඉන්ධන නිකුත් කරන බවත් හෙතෙම වැඩිදුරටත් සඳහන් කළේය.
සපුගස්කන්ද, කොලොන්නාව සහ මුතුරාජවෙල යන ප්රධාන පර්යන්ත තුනම විවෘතව පවතින අතර, මැයි මස මුල් සතිය දක්වා ප්රමාණවත් ඉන්ධන සංචිත පවතින බැවින් අනියත බියක් ඇති කරගත යුතු නැති බව ද සංස්ථාව අවධාරණය කරයි.
