ඊයේ (10) පැවති ඔස්කාර් සම්මාන උළෙලේදී 46 හැවිරිදි වෘත්තීය රෙස්ලින් ක්රීඩකයෙකු සහ නළුවෙකු වන ජෝන් සීනා වෙත සියල්ලන්ගේම අවධානය යොමු ව තිබේ. ඒ, සම්මාන උළෙලේ විකාශනය අතරතුර හොඳම ඇඳුම් නිර්මාණය සඳහා වන සම්මානය පිරිනැමීමට ඔහු ව වේදිකාවට කැඳවන අවස්ථාවේ ඔහුට තමාගේ ඇඳුම අමතක වී ඇති ආකාරයක් දකින්නට තිබූ බැවින් ය.
සැබවින්ම ජෝන් සීනා හොලිවුඩයේ පැවැත්වෙන වසරේ කීර්තිමත්ම උත්සවයේ වේදිකාව මත පෙනී සිටියේ නිරුවත්ව ය. සම්මාන උළෙල මෙහෙය වූ ජිමී කිමෙල් 1974 වසරේ ඇකඩමි සම්මාන උළෙලේ දී සිදු වූ මෙවැනිම සිදුවීමක් සිහිපත් කරමින් “අද නිරුවත් මිනිසෙකු වේදිකාව හරහා දිව ගියහොත් ඔබට එය සිතාගත හැකිද? එය පිස්සුවක් නොවේද? ” යි පැමිණ සිටි පිරිසගෙන් විමසා තිබේ. ඉන් පසුව ජිමී කිමෙල් සහ ජෝන් සීනා අතර පැවති හාස්යජනක සංවාදය පැමිණ සිටි සියල්ලන් සිනා සයුරකට ඇද දැමීය.
කිමෙල් අවසානයේ ජෝන් සීනාට හොඳම ඇඳුම් නිර්මාණය සඳහා වන සම්මානය පිරිනමන ලෙස ඉල්ලා සිටි අතර ඔහු ජයග්රාහකයාගේ නම සඳහන් ලියුම් කවරයෙන් තම ඉදිරිපස ආවරණය කරගනිමින් වේදිකාව හරහා මයික්රෆෝනය වෙත ගමන් කර තිබුනි. ඉන් පසුව ඔහු “ඇඳුම් පැලඳුම්, ඒවා ඉතා වැදගත් සමහර විට එතන තියෙන වැදගත්ම දේ වෙන්න පුළුවන්” යැයි ප්රකාශ කලේය. කිමෙල් නම් කරන ලද නාමයෝජනා ප්රකාශයට පත් කළ අතර ඒ අවස්ථාවේ දී කිමෙල් තිර ආවරණයකින් සීනාගේ සිරුර ආවරණය කර ගැනීමට සහය වී තිබේ. හොඳම ඇඳුම් නිර්මාණයේ සම්මානය ජයග්රහණය කලේ පුවර් තිංග්ස් චිත්රපටයේ ඇඳුම් නිර්මාණය වෙනුවෙන් හොලී වඩිංටන් ය.
කෙසේ වෙතත් විදෙස් මාධ්ය, ජෝන් සීනා ඒ අවස්ථාවේ සම්පූර්ණයෙන් නිරුවත්ව නොව සිරුරේ පැහැයට සමාන ඇඳුමක් ඇඳ සිටි බව වාර්තා කර තිබෙනවා.
