මේ වනවිට ඊශ්රයාලයේ ගුවන් කලාපය වසා දමා ගුවන් තොටුපල අක්රීය කර ඇති බැවින් යුද්ධයේ යම් කිසි තීව්ර අවස්ථාවක් ඇතිවුවහොත් ඊශ්රයාලයේ සිටින ශ්රී ලාංකිකයන් යළි ලංකාවට ගෙන්වා ගැනීම සඳහා ජෝර්දානය අතුළු යාබද රටවල්වෙත ගුවන් යානා යොමු කරමින් සිදුකළ යුතු මෙහෙයුම පිළිබඳව මේ වනවිටත් එම රටවල තානාපති කාර්යාල හා සාකච්ඡා කරමින් සැලසුම් කර ඇතැයි විදේශ කටයුතු ඇමති විජිත හේරත් අද (19) පාර්ලිමේන්තුවේ දී පැවසුවේය.
අවශ්ය ඕනෑම මොහොතක ඊශ්රයාලයේ සේවය කරන ශ්රී ලාංකිකයින් ලංකාවට ගෙන්වා ගැනීමට සූදානම් බව ද ඇමතිවරයා අවධාරණය කළේය.
මේ වනවිට ඉරාන ප්රහාර මැද තුවාල ලැබ සිටින ශ්රී ලාංකිකයින් සිවු දෙනාගෙන් තිදෙනෙකුගෙ තත්ත්වය බරපතල නොවන බවත්, කකුලකට වීදුරුවක් කඩාගෙන වැටීම නිසා යම් බරපතල තත්ත්වයක් සහිතව මේ වනවිට ප්රතිකාර ලබන බවත් කී ඇමතිවරයා මේ සියලුම වින්දිතයින්ගේ සුබ සාධනය වෙනුවෙන් කළ යුතු සියලුම දේ තානාපති කාර්යාල පැය 24 තුළම සිදුකරන බව පාර්ලිමේන්තුවට දන්වා සිටියේය.
මේ වනවිට ලංකාවට පැමිණීම සඳහා ඉල්ලීම් කර ඇත්තේ ව්යාපාරික කටයුතු සඳහා ඊශ්රයාලයට ගිය පුද්ගලයින 2ක් පමණක් බැවින් ඔවුන් ගෙන්වා ගැනීම සඳහා මේ වනවිට වැඩපිළවෙළක් සකස් කර ඇති බව කී ඇමතිවරයා අනෙක් ශ්රී ලාංකිකයින් ඊශ්රයාලය තුළ පවතින ආරක්ෂක ක්රමවේදය තුළ තානාපති කාර්යාලය හා සම්බන්ධ වෙමින් පවතින තත්ත්වය කළමනාකරණය ගැනීමට කටයුතු කරනු මිස මේ වනතෙක් නැවත ලංකාවට පැමිණීමට අවශ්ය බව දන්වා නැතැයි ද කීවේය.
ඊශ්රයාලයේ රැකියාවලට ගිය ශ්රී ලාංකිකයින් විසි දහසක් පමණ සිටින බවත් ඉරානයේ රැඳී ඉන්නේ ශ්රී ලාංකිකයින් 35ක් පමණක් බවත් ඇමතිවරයා පෙන්වා දුන්නේය.
