මනම්පිටිය නිමල් ජයරත්න –
සෝමාවතී ජාතික වනෝද්යානයේ සෝමාවතිය රජමහා විහාරස්ථානය අසල වෙඩි වැදුණු වන අලියෙකුට අඛන්ඩව ප්රතිකාර කිරීමේ කටයුතු දින කිහිපයක් පුරා සිදු කරන බව සෝමාවතිය අඩවි ආරක්ෂක කාර්යාලය සඳහන් කරයි.
ඉදිරි වම් අතට සහ පිටුපස දකුණු පාදයට වෙඩි වැදී තුවාල සිදුව ඇති අතර එම වන අලියා උසින් අඩි නමයක් පමණ වන අවුරුදු 35 වයස පිරිමි අලියෙකු බව සෝමවතිය අඩවි ආරක්ෂක අමිත ශ්රී නාලක සඳහන් කළේය.
මෙම වන අලියාට වෙඩි වැදීමෙන් තුවාල සිදුව ආබාධිත තත්ත්වයෙන් පසුවන බවත්,අලියා දැඩි වේදනාවෙන් යුතුව සෝමාවතිය මහා විහාරස්ථානය ආසන්නයේ සැරිසරමින් සිටින බවට ලද තොරතුරක් අනුව, වන අලියා නිර්වින්දනය කොට ඊයේ දිනයේ ( 22 ) සිට ප්රතිකාර කිරීම් කටයුතු අඛණ්ඩව සිදුකරන බවත් අඩවි ආරක්ෂකවරයා අප කළ විමසීමකදී පැවසීය.
එම වන අලියාට වනජීවී දෙපාර්තමේන්තුවේ ගිරිතලේ වනජීවී පශුවෛද්ය සමීර කලිගුආරච්චි ඇතුළු වනජීවි නිලධාරි කණ්ඩායමක් අඛණ්ඩව ප්රතිජීවක ඖෂධ ලබාදෙමින් ප්රතිකාර කරමින් සිටින බවද ඔහු පැවසීය.
සෝමාවතී අඩවිය ආරක්ෂක ජී.ඒ.ටී. මනහර, අඩවි ආරක්ෂක අමිත ශ්රී නාලක ඇතුළු වනජීවී නිලධාරී කණ්ඩායමක් අලියාට, වෛද්ය උපදෙස් පරිදි ආහාර සහ ප්රතිජීවක ඖෂධ වර්ගය ලබාදීමේ කටයුතු අඛණ්ඩව සිදුකරයි.
