මනම්පිටිය නිමල් ජයරත්න –
දිඹුලාගල මැණිකඇල ප්රදේශයේ ගව ගාලකින් අද (23) අළුයම සොරකම් කරගත් ගැබ්බර එළදෙනුන් දෙදෙනෙක් පන්නාගෙන යෑමට ඇති වූ අපහසුතාවයක් නිසා අසල වෙල් යායක දී පිදුරු දමා පුලුස්සා මරා දැමීමේ තිරිසන් පුවතක් වාර්තා වේ.
සොරුවිල 41 හැවිරිදි තිදරු පියෙකු වූ සෙල්වරාජා දයානන්ද නැමැති අයගේ ගව ගාලෙන් මෙම ගැබ්බර එළදෙනුන් සොරකම් කරගෙන ඇත.
තමන් මේ පිළිබඳව මනම්පිටිය පොලිසියට පැමිණිලි කළ බව ඔහු පැවසුවේය. එළ දෙනුන් දෙදෙනාට දස වද දී මරා දමා පිදුරු දමා පුලුස්සා ඇති ආකාරය ඔහු වේදනාවෙන් අප සමග කියා සිටියේය. මින් පෙරත් තමන්ගේ ගව ගාලෙන් ගවයන් හොරකම් කරගෙන ගොස් තිබූ නමුත් මෙවැනි අමානුෂික සිද්ධියක් තමන්ගේ ඇස් දෙකට පෙනී නොතිබුණු බවත් ඔහු කීවේය.
මෙම අපරාධය කළ පුද්ගලයින් යැයි සැක කරන අය පලාගොස් ඇති නිසා ඔවුන් අත්අඩංගුවට ගැනීමට විශේෂ විමර්ශනයක් පතවත්වන බව මනම්පිටිය පොලිසිය පැවසීය.
