සේනපුර පුනරුත්ථාපන වෘත්තිය පුහුණු හා සාක්ෂරතා මධ්යස්ථානය ආරම්භ කෙරුණේ කන්දකාඩුව ප්රතිකාර හා පුනරුත්ථාපන මධ්යස්ථානයට සමගාමීවය. රටේ නන් දෙසින් මත්ද්රව්ය මත් කුඩු වලට ඇබ්බැහි වූවන් උසාවි නියෝග මත පුනරුත්ථාපනය කිරීම සඳහා ප්රථමයෙන් යොමු කරනු ලබන්නේ කන්දකාඩුව ට ය. කන්දකාඩුවේ මාස හයක ප්රතිකාර සහ පුනරුත්ථාපනය ලබන රැඳවියන් අනතුරුව යොමු කරනු ලබන්නේ සේනපුර සාක්ෂරතා සහ වෘත්තීය පුහුණු පුනරුත්ථාපන මධ්යස්ථානය වෙත ය.
මෙම මධ්යස්ථානවල පුනරුත්ථාපනය කරනු ලබන්නේ ධරුණු ගණයේ කුඩු සහ මත්ද්රව්ය සඳහා ඇබ්බැහි වූවන්ය. මොවුන් මෙම මධ්යස්ථාන වෙත නීත්යානුකූලව යොමුකොට පුනරුත්ථාපනය කිරීම සඳහා වසරක කාලයක් ගත කරන විට එහි පාඩුව අත්විඳින්නේ රටේ ප්රභූ පැලැන්තියේ සිටින ප්රබල මත්ද්රව්ය ජාවාරම් කරුවන් ය.
පුනරුත්ථාපන මධ්යස්ථාන තුළ සිටින රැඳවියන් සමඟ බාහිර කිසිදු පුද්ගලයෙකුට සම්බන්ධතාවයක් ඇතිකර නොගත හැකි පසුබිමක් සකස් කර තිබුණද විවිධ මාර්ග ඔස්සේ බාහිර සමාජයේ සිටින ජාවාරම්කරුවන් කඳවුරු තුළ සිටින පුනරුත්ථාපනය ලබන රැඳවියන් සමග සම්බන්ධතා පවත්වන බවට විවිධ අවස්ථා වලදී තොරතුරු අනාවරණය වී තිබිණි තවද බාහිර සමාජයේ අංක එකේ මත්කුඩු ජාවාරම්කරුවන්ට සහය දක්වන පිරිස් පුනරුත්ථාපනය වීම හරහා ඔවුන්ගේ ව්යාපාර පවත්වාගෙන යාමට ප්රබල බාධාවක් වී ඇති බව ද දැන ගන්නට තිබිණි.
ඒ සමගම රජය මගින් පවත්වාගෙන යනු ලබන මෙවන් පුනරුත්ථාපන මධ්යස්ථානවල සේවය හා කාර්යභාරය මත පෞද්ගලික මට්ටමින් මුදලට පවත්වාගෙන යන පුනරුත්ථාපන කඳවුරුවලට විශාල අර්බුදයක් ඇතිවන බවට ද තොරතුරු අනාවරණය විය. එවන් පසුබිමක් තුළ ඊයෙ (23) නැවත සේනපුර වෘත්තීය හා සාක්ෂරතා පුනරුත්ථාපන මධ්යස්ථානයේ අරගලකාරී ස්වරූපයක් දක්නට ලැබිණි.
මේ සම්බන්ධයෙන් පුනරුත්ථාපන අධ්යක්ෂ ජනරාල් විශ්රාමික මේජර් ජෙනරාල් දර්ශන හෙට්ටිආරච්චිගෙන් විමසුවෙමු.
ඔහු කී කතාව මෙසේය.
“. සේනපුර වෘත්තීය පුහුණුව ලැබූ රැඳවියන් 125 දෙනෙකු ඉකුත් සතියේදී සමාජයට මුදා හැරීමට අපට හැකියාව ලැබුණා. මේ වන විට තුන්සියයකට ආසන්න පිරිසක් තවමත් පුහුණුව ලබමින් සිටිනවා ඔවුන් ඉල්ලා සිටින්නේ පවතින ආර්ථික තත්ත්වයන් තුළ සිය නිවාස වල වෙසෙන පවුලේ සාමාජිකයින් දැඩි අපහසුතාවයන්ට ලක් ව සිටින බවත් ඔවුන් වෙනුවෙන් මුදල් හම්බකර ජීවත් වීමට පහසුකම් සලසා දීම සඳහාත් සේනපුරෙන් වහාම පිටව යා යුතු බවයි.
මේ තත්ත්වය එකවරම ඇති වූයේ නෑ. වෘත්තිය පුහුණු ලබන රැඳවියන් අතරින් සුළු කොටසක් බාහිර සමාජය සමඟ සම්බන්ධතා ඇති කර ගනිමින් විවිධ දෑ එම ස්ථානය තුළට ගෙන්වා ගැනීමට විවිධ උපක්රම යොදා තිබුණා. ඒ සඳහා ඇතැම් අවස්ථාවල සුළු දඬුවම් ලබා දීමට පවා සිදුව තිබුණා එවන් අවස්ථාවක පිරිසක් එක්ව වෘත්තිය පුහුණු මධ්යස්ථානයේ ඉදිරිපස ගේට්ටුව අසලට ගොස් විරෝධතාවයක් පවත්වමින් ඔවුන්ට මෙයින් පිටව යායුතු බවට උද්ඝෝෂණය කරන්නට ඊයේ කටයුතු කොට තිබුණා. කන්දකාඩු සිදුවීමෙන් පන්නරයක් ලබා සිටින අප මේ අවස්ථාවේ පොලිසිය කැඳවා රැඳවියන්ගේ ආරක්ෂාව තර කරන්නට කටයුතු කළා. මේ මොහොත වනවිටත් සේනපුරට පොලිස් ආරක්ෂාව ලබා දී තිබෙනවා
රැඳෙවියන් ප්රධාන ගේට්ටු වලින් පැන යන්න උත්සාහ කරන්නෙත් නැහැ. ඔවුන් ඉල්ලා සිටින්නේ කඩිනමින් ඉන් පිටව යාමට ඉඩ ලබාදෙන ලෙසයි. ප්රතිකාර හා පුනරුත්ථාපන මධ්යස්ථානය වෙත රැඳවියන් භාරගන්නේ උසාවි නියෝග මත. සේනපුරෙන් මොවුන් මුදාහැරීම සිදුවන්නේත් උසාවි නියෝග මත ම පමණයි.
කවුරු කෙසේ කුමක් කිවත් පුනරුත්ථාපන මධ්යස්ථාන තුළට රැඳවියන් ඇතුළු කර ගැනීමෙන් අනතුරුව ඔවුන්ගේ ජීවිතවල වගකීම තිබෙන්නේ අපටයි. එහෙයින් නීත්යනුකූල ලෙස වෘත්තිය පුහුණු ලබාදීමෙන් අනතුරුව මේ පිරිස් නිවෙස් කරා යැවීමට කටයුතු යොදන්න අපට සිදුවෙනවා. කවුරු කෙසේ කුමක් කීවත් ඒ සියල්ල සිදුවන්නේ නීත්යානුකූලව පමණයි.
කදවුර තුළ කෑම හිඟයි ස්නානයට පහසුකම් නැහැ පීඩාකාරී තත්ත්වයක් පවතින්නේ කියන කාරණා සියල්ලම මා ප්රතික්ෂේප කරනවා.
