දූෂණ චෝදනා මත අල්ලස් කොමිසම විසින් සැක පිට අත් අඩංගුවට ගෙන රක්ෂිත බන්ධනාගාරගත කර සිටි හිටපු අමාත්ය සී.බී. රත්නායක ඇප මත මුදා හැරීමට කොළඹ ප්රධාන මහේස්ත්රාත් අධිකරණය අද (16) නියෝග කළේය.
නඩුව කොළඹ අද කොළඹ ප්රධාන මහේස්ත්රාත් අසංග එස් බෝදරගම හමුවේ කැඳවනු ලැබූ අවස්ථාවේ දී අල්ලස් කොමිසම වෙනුවෙන් පෙනී සිටි සහකාර නීති අධ්යක්ෂිකා සුලෝචනා හෙට්ටිආරච්චි පැවසුවේ සිද්ධියට අදාල සියලුම ප්රකාශ සටහන් කරගෙන අවසන් බවය.
ඒ අනුව කරුණු සලකා බලා නඩුව යළි කැඳවීමට සුදුසු දිනයක් දන්වන ලෙසද ඇය අධිකරණයෙන් ඉල්ලා සිටියාය.
එහිදී සැකකරු වෙනුවෙන් පෙනී සිටි ජනාධිපති නීතිඥ කාලිංග ඉන්ද්රතිස්ස අධිකරණයෙන් ඉල්ලා සිටියේ ඇප පනත ප්රකාරව සුදුසු ඇප කොන්දේසියක් මත සැකකරු ඇප මත මුදා හරින ලෙසය.
සියලු කරුණු සැලකිල්ලට ගත් කොළඹ ප්රධාන මහේස්ත්රාත්වරයා සැකරු ලක්ෂ 20 බැගින් වූ ශරීර ඇප දෙකක් මත මුදා හරින ලෙස නියෝග කළේය. අධිකරණය විසින් සැකකරුගේ විදේශ ගමන් තහනමක් ද පනවා නඩුව යළි මාර්තු මස 06 වැනිදා කැඳවීමට දින නියම කළේය.
සී.බී. රත්නායක බන්ධනාගාරයෙන් ඇප මත නිදහස්ව එන අවස්ථාවේ ඔහුගේ ආධාරකරුවන් ඔහුට ගෞරව දක්වමින් වැඳ වැටෙමින් පිළිගන්නා ආකාරය දක්නට ලැබිණි.
