රටේ ස්වාධිපත්ය විනාශ කර රට විකුණා දැමීම සහතික කරන සිපෙටිකෝ ඉන්ධන පිරවුම්හල් සමාගම් වෙත පැවරීමේ බිහිසුණු තීන්දුවට වෘත්තීය සමිති එරෙහි වීමට පෙර මේ රටේ සෑම පුරවැසියෙක්ම පුරවැසි වගකීමක් ලෙස සලකා විරුද්ධ විය යුතු බව සමගි ඒකාබද්ධ වෘත්තීය සමිති සන්ධානයේ කැඳවුම්කරු ආනන්ද පාලිත පවසයි.
ඔහු පවසන්නේ මේ බිහිසුණු තීන්දු හමුවේ මාධ්ය හැසිරෙන නිද්රා ශීලී පිළිවෙත වටහාගත නොහැකි බවය.
ලංකා ඛනිජතෙල් නීතිගත සංස්ථාවට අයත් පිරවුම්හල් මාස හයකට වැඩි කාලයක් ඉන්ධන ගෙන ඒමේ කොන්දේසිය මත සමාගම් වලට පැවරීම සඳහා රජය ගෙන ඇති තීන්දුව පිළිබඳව ලංකාසර කළ විමසීමක දී ඔහු මේ බව ප්රකාශ කළේය.
වැඩිදුරටත් ඔහු මෙසේ ද පැවසීය.
“මේ ක්රියාව දේශද්රෝහී ක්රියාවක්. රනිල් බලයට ආවොත් මෙවැනි විනාශයන් කරනවා. ඒ විනාශයේ එක් පියවරක් තමයි මේක.“
“ මේ යෝජනාව හෙට කැබිනට් එකට දැම්මත් එය කැබිනට් අනුමැතියෙන් ක්රියාත්මක කරන්න පුලුවන් එකක් නොවෙයි. එය ක්රියාත්මක කරන්න නම් නම් ඛණිජතෙල් පනත වෙනස් කළ යුතුයි. “
“අප දන්නවා මේ පනත වෙනස් කිරීමට උත්සාහ කළ ඉතිහාසරයක් රනිල් වික්රමසිංහට තිබුණා. ඔහු අගමැති ධූරය දරන කාලයෙ 1961 අංක අංක 28 දරන පණත තිබිය දී අංක 33 දරන විශේෂ පනතක් ඔහු ගෙනාවා. ඉන් ඉන්ධන බෙදා හැරීම සඳහා සමාගම් වලට බලය දුන්නා. එහි ප්රතිඵලයක් ලෙස තමයි අයිඕසී ලංකාවට ආවෙ.“
“දැන් ඒ පනත අත්හිටුවා තිබෙනවා. නමුත් 2021 මැයි මාසයේ 2/4 සංශෝධනය කැබිනට් එකට ඉදිරිපත් කර පිවරවුම්හල් දෙන්න සූදානම් කළා. මේ ඔහු සිපෙටිකෝ පිරවුම්හල් විකුණන්න ගත්තු පළවෙනි උත්සාහය නොවෙයි කියන්නෙ ඒ නිසා. “
“රනිල් මොන තරම් දැඟලුවත් එයාට අවශ්ය විදිහට රටේ නීතිය වෙනස් කරන්න බෑ. 1961 අංක අංක 28 දරන පණත පාර්ලිමේන්තුවට ඉදිරිපත් කරලා වෙනස් කළ යුතුයි පිරවුම්හල් එහෙම සමාගම්වලට දෙන්නම්.“
