පසුගිය සතියේ මොස්කව් නගරයෙන් පිටත ක්රොකස් සිටි ශාලාවට ප්රහාර එල්ල කිරීම සඳහා අබිරහස් පුද්ගලයෙකුගෙන් නියෝග ලැබී ඇති බවත් ප්රහාරයෙන් පසු යුක්රේනයට පලා යන ලෙස තමන්ට එම අබිරහස් පුද්ගලයාගෙන් උපදෙස් ලැබුණු බවත් ත්රස්ත ප්රහාරය එල්ල කිරීම පිළිබඳ සැක පිට අත් අඩංගුවට ගත් ප්රධාන සැකකරුවන් හෙළි කර ඇතැයි රුසියානු විමර්ශන කමිටුව අද (29) නිවේදනය කර අතැයි රුසියානු මාධ්ය වාර්තා කරයි.
ජීවිත 144 ක් විනාශ කර 200 කට අධික පිරිසක් බරපතල තුවාල සහිතව රෝහල් ගත කළ මේ බිහිසුණු අපරාධයට සම්බන්ධ පුද්ගලයින් සිවු දෙනෙක් පසුගිය සෙනසුරාදා යුක්රේන දේශසීමාව ආසන්නයේදී ආරක්ෂක අංශ විසින් අත්අඩංගුවට ගනු ලැබීය. ඔවුන් ටජිකිස්තානයේ ජාතිකයන් ලෙස හඳුනාගෙන ඇති අතර මුලින් නිලධාරීන් මේ සිවු දෙනා හැඳින්වූයේ “රැඩිකල් ඉස්ලාම්වාදීන්” ලෙස ය.
අත් අඩංගුවට ගත් පුද්ගලයින්ගේ මූලික සාක්ෂි වලදී සහ පසුව කරන ලද ප්රශ්න කිරීම් වලදී ඔවුන් පවසා ඇත්තේ “අනවර්ථ නාමයකින් තමන්ව හඳුන්වා දුන් පුද්ගලයෙකු” ප්රහාරයේ කටයුතු සම්බන්ධීකරණය කළ බවය. මෙම පුද්ගලයා සමග සැක කරුවන් සන්නිවේදනය කර ඇත්තේ ටෙලිග්රාම් හරහා යවන ලද හඬ පණිවිඩ මගින් බව ඔවුන් ප්රකාශ කර ඇත.
ප්රහාරය සම්බන්ධීකරණය කළ අපරාධකරු ඝාතකයින්ට උපදෙස් දී ඇත්තේ අපරාධයෙන් පසු රුසියානු යුක්රේන දේශ සීමාව දෙසට හැකි ඉක්මනින් පැමිණ එය තරණය කර යුක්රේනයේ කියෙව් නගරයට විත් පොරොන්දු වූ මුදල් ලබා ගන්නා ලෙස යැයි රුසියාවේ නීතිය ක්රියාත්මක කිරීමේ ඒජන්සිය කීවේය.
ඉස්ලාමීය රාජ්ය කොරාසන් (ISIS-K) ත්රස්තවාදී කණ්ඩායම මෙම සමූහ ඝාතනයේ වගකීම භාරගෙන තිබිණි. එක්සත් ජනපදය සහ යුරෝපා සංගමය අවධාරනය කර ඇත්තේ මෙම අපරාධයට වගකිව යුතු එකම වරදකරු ISIS-K බවත් යුක්රේනය කිසිදු ආකාරයකින් ඊට සම්බන්ධ නැති බවත්ය.
කෙසේ වෙතත්, මොස්කව් තවමත් සැක සහිත ය. ජනාධිපති ව්ලැඩිමීර් පුටින්, විදේශ අමාත්ය සර්ජි ලැව්රොව් සහ එෆ්එස්බී සහ විමර්ශන කමිටුවේ ප්රධානීන් සියල්ලෝම අපරාධයට කියෙව්හි මැදිහත්වීම පෙන්වා දෙන බහුවිධ හෝඩුවාවන් ඉදිරිපත් කරති.
විදේශ අමාත්ය සර්ජි ලැව්රොව් යුක්රේනයේ නිර්දෝෂීභාවය පිළිබඳ බටහිර අවධාරනයම සැක සහිත බව පැවසුවේය.
බ්රහස්පතින්දා විමර්ශන කමිටුව හෙළි කළේ සැකකරුවන් හතර දෙනා යුක්රේනයෙන් cryptocurrency ආකාරයෙන් “සැලකිය යුතු මුදල්” ලබාගෙන ඇති බවය. ප්රහාරය සූදානම් කිරීම සඳහා එම අරමුදල් යොදවා ඇති බව ඒජන්සිය පවසයි.
