අනුරාධපුර – පර්සි කුරුනේරු
අනුරාධපුර දිස්ත්රික්කයේ මේ දිනවල පවතින වියලි කාලගුණය හා සුළං හේතුවෙන් වැව් වල ජල මට්ටම සීඝ්රයෙන් පහත වැටීම නිසා තවත් සතියකින් පමණ පසු අනුරාධපුර තිසාවැව නුවරවැව හා තුරුවිල යන වැව් තුන සදහා මහවැලි ජලය නොලැබුණොත් අනුරාධපුර නගරය හා තදාසන්න ප්රදේශවල පදිංචි ජල පාරිභෝගිකයන් හැට දහසකට පමණ දිනක් හැර දිනක් පානීය ජලය සැපයීමට සිදුවනු ඇති බව ජාතික ජල සම්පාදන හා ජලාපවහන මණ්ඩලයේ නියෝජ්ය සාමාන්යාධිකාරී (උතුරුමැද) පද්මා ගුණවර්ධන පැවසුවාය.
මේ අනුව අනුරාධපුර පූජා නගරය හා නව නගරය, නාච්චාදූව මිහින්තලේ, තලාව, ශ්රාවස්තිපුර හා රඹෑව ඇතුළු ප්රදේශ ගණනාවක ජල පාරිභෝගිකයන්ට දිනක් හැර දිනක් ජලය සැපයීමට සිදුවනු ඇතැයි ඇය පවසන්නීය.
එනිසා ඉදිරි මාස් මෝසම් වැසි ලැබෙන තෙක් එම වැව් තුන සඳහා මහවැලි ජලාශ වලින් ජලය ලබා දෙන ලෙස ජාතික ජල සම්පාදන හා ජලාපවහන මණ්ඩලය විසින් වාරිමාර්ග දෙපාර්තමේන්තුව හා ශ්රී ලංකා මහවැලි අධිකාරිය මගින් ඉල්ලීම් කර ඇති බවත් ඇය පැවැසුවාය.
ඒ අනුව ඒ පිළිබඳව තීරණයක් ගැනීමට ජාතික ජල සම්පාදන හා ජලාපවහන මණ්ඩලය, වාරිමාර්ග දෙපාර්තමේන්තුව හා ශ්රී ලංකා මහවැලි අධිකාරියේ ජල පාලන කමිටුවේ සාකච්ජාවක් හෙට (21) කොළඹදී පැවැත්වීමට නියමිත බවත් ජාතික ජල සම්පාදන හා ජලාපවහන මණ්ඩලයේ නියෝජ්ය සාමාන්යාධිකාරීවරිය කීවාය.
එහිදී එම වැව් වලට ප්රමාණවත් ජල සැපයුමක් ලබා ගැනීමේ එකඟතාවයකට එළඹීමට නොහැකිවුවහොත් තවත් සතියකින් පමණ පසු අනුරාධපුර නගරය හා තදාසන්න ප්රදේශවල ජල පාරිභෝගිකයන් වෙත කලාපීය මට්ටමින් දිනකට වරක් පානීය අවශ්යතා සඳහා ජලය සැපයීමට සිදුවනු ඇති බවත් ඇය පැවසුවාය.
මේ අතර එම වැව් වලට ප්රමාණවත් තරම් මහවැලි ජලය හෝ නොලැබුණොත් එම වැව් වලින් පානීය ජලය සපයනු ලබන පාරිභෝගිකයන්, රාජ්ය හා පෞද්ගලික ආයතන වලට ඉදිරියේදී උද්ගත විය හැකි තත්ත්වය පිලිබදව දැනුම්වත් කිරීමට ජල සම්පාදන මණ්ඩලය තීරණය කොට ඇත.
එබැවින් පවත්නා තත්ත්වය සැලකිල්ලට ගෙන පානීය ජලය අරපිරිමැස්මෙන් පරිහරණය කරන ලෙසට සියලු ජල පාරිභෝගිකයන්ගෙන් ඉල්ලා සිටින බව පද්මා ගුණවර්ධන වැඩිදුරටත් පැවැසුවාය.
