සමගි ජනබලවේගය ඩයනා ගමගේ ගේ හෝ ඇයගේ හිතවතාගේ බූදලයක් නොවන බව සමගි ජනබලවේගයේ ප්රධාන ලේකම් රන්ජිත් මද්දුම බණ්ඩාර අවධාරණය කළේය.
ඊයේ (10) විශේෂ පුවත්පත් සාකච්ඡාවකට එක්වෙමින් රන්ජිත් මද්දුමබණ්ඩාර සහ මහාචාර්ය ජී.එල් පීරිස් සමගි ජන බලවේගයේ හිමිකම සහ නීත්යානුකූලභාවය සම්බන්ධ දීර්ඝ පැහැදිලි කිරීමක් කරන්නේ මෙම පක්ෂයේ හිමිකාරිත්වය පිළිබඳ අයිතිය කියන පාර්ලිමේන්තු මන්ත්රී ධූරය අහිමිකළ ඩයනා ගමගේ හා සම්බන්ධ පක්ෂයේ හිටපු සභාපති සේනක ද සිල්වා විසින් විශේෂ පුවත්පත් සාකච්ඡාවක් කැඳවා රන්ජිත් මද්දුමබණ්ඩාර සහ සජිත් ප්රේමදාස පක්ෂයේ තනතුරුවලින් නීත්යානුකූලව නෙරපා ඉදිරි කටයුතු කරන බවට කළ ප්රකාශයත් සමගය.
එහිදී රන්ජිත් මද්දුම බණ්ඩාර මෙසේ සිය පැහැදිලි කිරීම කළේය.
“සමගි ජන බලවේගය ඩයනා ගමගේට අයිති පක්ෂයක් නෙමෙයි. මේ පක්ෂයේ භාරකරත්වයේ නිලධාරී මණ්ඩලයෙ හිටියේ මංගල සමරවීර මැතිතුමා සහ ශ්රීපති සූරියආරච්චි මැතිතුමා. ඊට පස්සේ ඩයනා ගමගේ ගේ හිතවතෙක් මේ පක්ෂයේ සභාපති වෙලා තියනවා.
අප මේ පක්ෂය ගැන ගනුදෙනුව කළේ 2019 -2020 දි. අපේ රටෙ දේශපාලන පක්ෂයක් පිහිටුවන්න අවුරුදු හතරක් යනවා. සාමාන්යයෙන් මේ රටේ ක්රමය තමයි ලියාපදිංචි දේශපාල පක්ෂයක් අරන් ඒකට මේක අනුගත කරන එක. ශ්රි ලංකා පොදු ජන පෙරමුණත් ඒ විදිහට තමයි කටයුතු කළේ.
මේ සම්බන්ධව ප්රශ්නයක් පැන නැගුනා 2020 දි. එක්සත් ජාතික පක්ෂයේ හිතවතුන් පිරිසක් අධිකරණයට ගියා මේ පක්ෂය නීත්යානුකූල නෑ කියලා. අධිකරණය තීන්දු කළා, නෑ මේ පක්ෂය නීත්යානුකූලයි කියලා. එහෙම කියලා එක්සත් ජාතික පක්ෂයේ හිතවතා ගෙනාපු නඩුව අයින් කරලා දැම්මා.
මැතිවරණයට ඉස්සරවෙලා අපට ලිඛිතව මැතිවරණ කොමිෂන් සභාවෙන් ලිපියක් දීලා තියනවා මේ පක්ෂය නීත්යානුකූලව ලියාපදිංචි කළ පක්ෂයක්, මේ පක්ෂයේ සභාපති සහ නායකයා සජිත් ප්රේමදාස, මේ පක්ෂයේ මහ ලේකම් රන්ජිත් මද්දුමබණ්ඩාර කියලා.
ඒ අනුව තමයි අපි පහුගිය මැතිවරණයෙ දි නාම යෝජනා ඉදිරිපත් කළේ. සමගි ජන බලවේගයෙන් මමයි ඒ නාම යෝජනාවලට අත්සන් කළේ. ඉතින් දැන් මේ පක්ෂයට ඔය කියන කාටවත් අයිතියක් නෑ . එහෙමනම් ජී.එල්. පිරිස් මැතිතුමා ශ්රී ලංකා පොදු ජන පෙරමුණේ සභාපති. එතුමාටත් කියන්න පුලුවන්නේ මේ පක්ෂය මගේ කියලා.
එතුමා බුද්ධිමත් නිසා තමයි ඒක නොකියන්නේ.
මේ පක්ෂයට කිසිම කෙනෙකුට නීත්යානුකූල අයිතියක් ඇත්තෙත් නෑ. කාටවත් මුකුත් කරන්නත් බෑ.
පක්ෂයේ නීත්යානුකූලභාවය සම්බන්ධව නෛතික විග්රහයක් කරන මහාචාර්ය ජී.එල්. පීරිස් කියන්නේ මෙවැන්නකි.
අපේ ජාතික පෙරමුණේ ඉස්සරලා හිටියේ ඩයනා ගමගේ මැතිණිය නෙමෙයි. ඊට ඉස්සරවෙලා හිටියේ මංගල සමරවීර සහ ශ්රිපති සූරියආරච්චි.
අපේ රටේ නීතියේ කොහෙවත් සඳහන් වෙන්නේ නෑ පුරවැසි භාවය නැති පුද්ගලයෙකුට . පක්ෂයක් ලියාපදිංචි කිරීම සම්බන්ධව ඉල්ලීමක් කරන්න බෑ කියලා. හැබැයි පුරවැසියෙක් වෙන්නේ නැතිව කරන්න බැරි දේවල් තියනවා. මැතිවරණයක් තරග කරන්න බෑ… මැතිවරණයක දී ඡන්දය දෙන්නත් බෑ… පාර්ලිමේන්තුවේ අසුන් ගන්න බෑ… පාර්ලිමේන්තුවේ දි ඡන්දය දෙන්න බෑ… ඒ සියල්ලටම අනිවාර්යයෙන් ශ්රි ලංකාවේ පුරවැසියෙක් විය යුතුයි.
දැන් ඩයනා ගමගේ මැතිණිය සමගි ජන බලවේගයේ කිසිම මන්ත්රීවරයෙකු ගේ නාම යෝජනා අත්සන් කරලා නෑ. එමනිසා අබමල් රේණුවක අවදානමක් නෑ ශ්රී ලංකා නීතිය යටතේ සජබෙ මන්ත්රිවරුන්ට. ඔවුන් සම්පූර්ණයෙන් සුරක්ෂිතයි.
