කීර්ති ප්රනාන්දු –
මේ වන විට කුකුළු මස් මිල අඩු වෙමින් පවතින බවත් ශීත කළ කුකුළු මස් මිල දිගටම පැවතියේ අඩු මිලක් යටතේ බවත් සමස්ත ලංකා කුකුළු ව්යාපාරිකයන්ගේ සංගමයේ සභාපති අජිත් ගුණසේකර ලංකාසරට පැවසීය.
ශ්රී ලංකාවේ කුකුළු මස් පාරිභෝගිකයන්ගේ සියයට 75ක් පමණ භාවිත කරන සම සහිත ශීත කළ කුකුල් මස් කිලෝවක මිල මේ වන විට රුපියල් 1300කට මිලදි ගත හැකි බව සභාපතිවරයා පැවසුවේය. ඉදිරි සති කිහිපයේදී මෙම කුකුළු මස් වර්ගය රුපියල් 1250ක් දක්වා අඩු විය හැකි බවද කියා සිටියේය. සම රහිත ශීත කළ කුකුළු මස් මිල රු. 1400 -1450ත් අතර මිලක් යටතේ අලෙවි කරන බවද කීවේය.
නැවුම් කුකුළු මස් කිලෝවක් පසුගිය කාලයේ 1750ක් පමණ වුවත් එය සමස්ත පරිභෝජනයෙන් 20%ක් 25%ක් අතර ප්රමාණයක් මිලට ගන්නා බවද ඔහු කියා සිටියේය. පසුගිය කාලයේ සුලු හා මධ්ය පරිමාණ ගොවීන් වැඩි වශයෙන් උත්සව සමය අළලා තම ගොවිපල කටයුතු පටන් ගන්නා බවත් මේ වන විට එම ගොවිපල වැඩි වශයෙන් වැසී ඇති සමය බැවින් එම මස් මිල වැඩි වී ඇති බවත් සභාපතිවරයා පැහැදිලි කළේය.
පසුගිය සමයේ නැවුම් මුහුදු මාළු මිල දෙගුණයකින් වැඩි වූ බැවින් එම පාරිභෝගිකයන් නැවුම් කුකුළු මස් මිලදි ගැනීමට පෙළඹී ඇති නිසා කුකුළු මස් මිල වැඩිවීම සිදු වු බව කියා සිටියේය.
මේ වන විට නැවුම් කුකුළු මස් මිලත් 1450ක් – 1490 දක්වා අඩු වී ඇතැයිද ඔහු කියා සිටියේය.
කුඩා හා මධ්යම පරිමාණයේ ගොවිපළ නිෂ්පාදන වන නැවුම් කුකුළු මස් නිෂ්පාදකයන්ගේ භාණ්ඩ මිල පාලනය තමන්ට කළ නොහැකි බවත් ශීත කළ කුකුළු මස් නිෂ්පාදකයන් සමඟ සාකච්ඡා කොට හැකි තරම් අවම මිලකට කුකුළු මස් අලෙවි කිරීමට එකඟ වී ඇති බවත් සභාපතිවරයා කීවේය.
මේ අතර මාළු ව්යාපාරිකයින්ගෙන් මාළු මිල ගණන් වැඩිවීමට හේතුව විමසූ විට ඔවුන් ඊට කාරණා දෙකක් කීහ. එකක් නම් මේ දවස්වල මුහුදේ රළු ස්වභාවය හේතුවෙන් මුහුදු යන ධීවර කාර්මිකයින් ප්රමාණය අඩු වීමය. දෙවැනි කාරණය කුකුළු මස් මිල ඉහළ යෑම හේතුවෙන් එම පාරිභෝගිකයන් ද මාළු පරිභෝජනයට යොමු වීම නිසා ඉල්ලුම ඉහළ යෑමය.
කෙසේ වෙතත් මේ වනවිට මස් සහ මාළු පරිභෝජනය අපහසු තත්ත්වයකට ජනතාව පත් වී සිටිති.
