ශ්රි ලංකා නාවිකය හමුදාව ඉතාම විනය ගරුක හමුදාවක් බවත්, ශ්රී ලංකාව පුරා වෙරළ තීරයේ ආරක්ෂාව සඳහා සහතික වී ඇති මේ විනය ගරුක හමුදාව හා කලහකාරී ලෙස හැසිරුණ ඉන්දීය ධීවරයින් පිරිසක් අතර ඇති වූ ගැටුමක් හේතුවෙන් ඇති වූ සිදුවීම වැනි සිද්ධිවලට හේතුව නීති විරෝධීව ශ්රී ලංකා මුහුදු සීමා ආක්රමණය කිරීමෙන් අනතුරුව ප්රචන්ඩ ලෙස හැසිරෙන ඉන්දීය ධීවරයින් බවත් ආරක්ෂක ලේකම් සම්පත් තුයියකොන්තා අද මාධ්ය හමුවේ දී ප්රකාශ කළේය.
ඔහු මේ බව ප්රකාශ කළේ ආරක්ෂක අමාත්යාංශයේ අද පැවති විශේෂ මාධ්ය හමුව අමතමිනි. ඊයේ කලහකාරී ඉන්දීය ධීවරයින් පිරිසක් විසින් ඇති කළ ගැටුමක් අතර තුර නාවික හමුදා සෙබලෙකුගේ ගිනි අවිය පත්තු වී ධීවරයින් දෙදෙනෙක් තුවාල ලැබීමෙන් අනතුරුව මේ සිද්ධිය පිළිබඳ නිල පැහැදිලි කිරීම සිදුකිරීමට මෙම මාධ්ය හමුව පැවැත්වූයේය.
එහිදී ආරක්ෂක ලේකම්වරයා මෙසේ ද පැවසුවේය.
” ආරක්ෂක ලේකම්වරයා ලෙසත් ආරක්ෂක අමාත්යාංශය ලෙසත් නාවික හමුදාව ලෙසත් ශ්රී ලංකාවේ මුහුද ආරක්ෂා කිරීමට අපි රට වෙනුවෙන් බැඳිලා ඉන්නවා. උතුරු ප්රදේශයෙ විතරක් නෙමෙයි, මුළු රටේම මුහුදු තීරය ආවරණය වන පරිදි පරීක්ෂණ මෙහෙයුම් සිදුකරනවා.
“මෙම සිද්ධියට ආදාල ඉන්දීය ට්රෝලර් යාත්රාව අනවසරයෙන් අපේ මුහුදු තීරයට පැමිණ තියනවා. උතුරු විධානයේ නාවික හමුදාවේ අණ පරිදි මේ යාත්රාව පරීක්ෂණයට භාජනය කරලා තියනවා. ඒ පරීක්ෂණයට අදාලවන විදිහට ඒ ගොල්ල බෝට්ටුව හසුරුවා නෑ, ඒ හින්දා ඒ බෝට්ටුවට ගොඩවන්නට නාවික හමුදාව උත්සාහ කරද්දී යම් ගැටුම්කාරී තත්ත්වයක් ඇතිවෙලා තියනවා. ”
“නාවික හමුදා සොල්දාදුවන් දෙදෙනෙක් පමණයි යාත්රාවට ගොඩවෙලා තියෙන්නේ. ඒ අවස්ථාවේ දී ගැටුම්කාරී තත්ත්වයක් ඇති කරලා තියනවා. ඒ ඇති කරලා තියෙන්නේ ඒ අය. මේ පරීක්ෂාවට ඉතාම නීත්යානුකූලව කරගෙන යන පරීක්ෂාවක්. ඒක කරන්න ඉඩ නොදීම නිසා තමයි ඒ ගැටුම්කාරී තත්ත්වය වාර්තා වෙන්නේ. අපි අනවසර මසුන් ඇල්ලීමට එහා ගිහින් හැම විටම කල්පනා කරනවා නීති විරෝධී මත්ද්රව්ය ජාවාම් නීති විරෝධී අවි ජවාරම්, නීති විරෝධී මිනිස් ජාවාරම් මේ මුහුදු තීරය ඔස්සේ සිදුවීම ගැන. ”
“මෑතක දී අපි ඔය සීමාවන් ඇතුලෙ අනවසරයෙන් පැමිණි යාත්රා මගින් ගෙනා මත්ද්රව්ය විශාල ප්රමාණයක් අරන් තියනවා. ඒ අනුව අපට සිදුවෙනවා ඉන්දීයානු වේවා, ශ්රී ලංකා වේවා, වෙනත් රටක වේවා, අනවසර ඕනෑම යාත්රාවක් පරීක්ෂා කරන්න. ඒ සඳහා අපි සෑම විටම බැඳී ඉන්නවා. එම යාත්රාවන් පරීක්ෂාව අපේ රාජකාරි වගකීමක්. ”
“නීතිගරුක හමුදාවක් හැටියට අපි අපේ මූලික විධානයන්ට යටත්ව නීතිගරුවක ඒ පරීක්ෂා කරන්නේ. ඒකට අනුගතව මේ පරීක්ෂාවට ඉඩ දෙනවා නම් මේ ගැටුම් ඇති වෙන්නේ නෑ. මෙවැනි ගැටුම් ඇතිවුනේ නෑ මින් පෙර. යාත්රාව පරීක්ෂා කීරීමට යෑමේදී මේ තත්ත්වය ඇති වෙලා තියනවා.” ආරක්ෂක ලේකම්වරයා කීවේය.
