මත්ද්රව්ය ව්යාපාරයේ යෙදෙන සමාජ විරෝධී පුද්ගලයින්ට එම ව්යාපාරවලින් ඉවත් වී වෙනත් රැකියා සොයා ගන්නා ලෙස පොලිස්පති නීතිඥ ප්රියන්ත වීරසූරිය අද (16) මත්ද්රව්ය ජාවාරම්කරුවන්ට අනතුරු ඇඟවූයේය.
පොලිස්පති ප්රියන්ත වීරසූරිය මූලික අධ්යාපනය ලැබු දොඩන්ගොඩ කළුනෑහින්න කනිෂ්ඨ විද්යාලයේ දී පොලිස්පතිවරයා පිළිගැනීම සඳහා සංවිධානය කර තිබුණු උත්සවය අමතමින් පැවසුවේ තමන් මනුෂ්යයන්ව මරන්නට යෝජනා නොකරන බවත්, වඩාත් යහපත් දේ මේ ජාවාරම්කරුවන් ස්වයංව මෙම රැකියාවලින් ඉවත් වී වෙනත් රැකියාවන් තෝරා ගැනීම බවත්ය.
එහිදී පොලිස්පතිවරයා මෙසේ ද පැවසුවේය.
ජනාධිපති තුමා හෙට වැඩසටහනක් පටන් ගන්නවා. ඒකාබද්ධ වැඩසටහනක්. ජාතික වැඩසටහනක්. රටම එකට ඉවත් වෙනු… මත්ද්රව්යයෙන් ඉවත් වෙනු කියන එක. මත්ද්රව්ය රටට ව්යසනයක්. ලෝකයට ව්යසනයක්.
ගමේ ඉඳන් පවුලේ ඉඳන් තම තමන්ගේ සහෝදරයින්ගෙ දුවා දරුවන්ගේ ඉඳලා රටම මත්ද්රව්යවලට විරුද්ධව එකට පෙළ ගහන්න මේ උත්සාහ කරන්නේ. ඒකට නායකත්වය දෙන්නේ ගරු ජනාධිපති තුමා. ඒකේ වැඩසටහන අපි 17 වැනිදා පටන් ගන්නවා. ජාතික වැඩසටහන 31 වැනිදා එනවා.
ගම්වල නගරවල මේ ව්යසනය නවත්වන්න පෙළ ගැසෙන්න ඕන. මෙතන ඉන්න අහිංසක දරුවන්ගේ අනාගතය නැති කරගන්න වටපිටාවක් සමාජය තුළ හැදිලා තියනවා. ඒකට අවශ්ය දායකත්වය ගමේ පන්සලේ පාසලේ සිට සියලුම රාජ්ය ආයතන ලබා දෙන්න අවශ්යයයි. ඒකට අදාල චක්රලේඛ තව ටික දිනකින් නිකුත් වෙනවා. රටම එකට එකතු වෙන්න ඕන.
