අමායා උඩුවැරැල්ල –
අලගල්ල කන්ද තරණය කිරීමට ගිය සරසවි සිසුවෙක් අද බරපතල අනතුරකට මුහුණ දුන්නේය. ඒ ගලකින් පහළට ලිස්සා ඇදවැටීමෙනි. කිලෝ මීටර තුනකට වඩා ඉහළ කන්දේ දී අනතුරට ලක් වූ සිසුවා ගලවාගෙන රෝහල්ගත කරන්නේ කෑගල්ල බෙරගල 08 වන සිංහ රෙජිමේන්තු කඳවුරේ නිලධාරීන් පිරිසකි.
අනතුරට ලක් වන්නේ ඔරින්ග්ස්ටන් ඇන්ඩ්රෑඩෝ නැමැති 24 හැවිරිදි තරුණයෙකි. ඔහු අම්පාර කල්මුණේ පදිංචිකරුවෙකි. ඔහු මේ වනවිට මාවනැල්ල රෝහලේ ප්රතිකාර ගනිමිනි.
වාර්තාවන පරිදි සිද්ධිය මෙසේය.
වයඹ විශ්වවිද්යාලයේ තාක්ෂණික පීඨයේ දෙවන වසරේ සිසුන් 09 දෙනෙකුගෙන් යුතු කණඩායමක් ඊයේ (09) අලගල්ල කන්ද තරණය කිරීමට ගොස් තිබිණි. මේ කන්ද පිහිටා ඇත්තේ කෑගල්ල දිස්ත්රික්කයේ රඹුක්කන පොලිස් බල ප්රදේශයට මායිම්වය.
අලගල්ල කන්දේ කඳවුරු බැඳ ඊයේ රැය පහන් කළ පිරිස අද ආපසු කන්දෙන් පහළට බැසීම ආරම්භ කර තිබිණි. මේ ගමනේ දී ගලක් මතින් ගමන් කරමින් සිටි සිසුවෙක් ගලෙන් පහළට ඇද වැටී තිබෙන බව පරීක්ෂණ මගින් අනාවරණය වී ඇත.
අඩි 10 ක් පමණ පහළට ඇද වැටී බරපතළ තුවාල ලබා සිටි සිසුවා සිටි ස්ථානයට කන්ද පාමුල සිට දුර කිලෝ මීටර් තුනකි. මෙම අනතුර කෑගල්ල බෙරගල සිංහරජිමේන්තු හමුදා කඳවුරට දැනුම් දුන් පසු හමුදා සාමාජික කණ්ඩායමක් සිද්ධිය වූ ස්ථානයට පැමිණ තිබේ. අනතුරුව එම ස්ථානයේදීම සිසුවාට මූලික ප්රතිකාර ලබා දී ඔහු පහළට රැගෙන පැමිණ රෝහල් ගත කිරීමට පියවර ගෙන තිබිණි.
