දිනසේන රතුගමගේ –
ඉලංකෙයි තමිල් අරුසු කච්චි පක්ෂය ( ITAK ) විසින් මේ මස 19 වෙනිදා ත්රීකුණාමළයේදී පැවැත්වීමට නියමිතව තිබූ එම පක්ෂයේ ජාතික සමළුව පැවැත්වීම අත්හිටුවමින් යාපනය හා ත්රිකුණාමල අධිකරණ විසින් තහනම් නියෝගයක් 15 දා පනවා තිබේ.
මෙම තහනම් නියෝගය 15 දා සිට දින 14 ක් බලපැවැත්වෙන පරිදි නිකුත් කොට ඇති අතර එම කාලය ඇතුළත ඉලංකෙයි තමිල් අරුසු කච්චි පක්ෂයේ නායකයින් ඇතුළු ජෙයෂ්ඨ සාමාජිකයින්ට ප්රසිද්ධ සාකච්ඡා පැවැත්වීමද අධිකරණ මගින් තහනම් කොට ඇත.
යාපනයේ හා ත්රීකුණාමලයේ පදිංචි ඉලංකෙයි තමිල් අරුසු කච්චි පක්ෂයේම ජෙයෂ්ඨ සාමාජිකයින් දෙපිරිසක් විසින් ත්රීකුණාමලය හා යාපනය යන අධිකරණ වලට ඉදිරිපත් කළ පෙත්සම් දෙකක් සලකා බැලීමෙන් පසුව එම අධිකරණ විසින් මෙම තහනම් නියෝග පනවා තිබේ.
ඉලංකෙයි තමිල් අරුසු කච්චි පක්ෂයට නව නායකයෙකු තෝරා පත් කර ගැනීම පිණිස ඡන්දයක් පැවැත්වීමත් සමගම ඊට අපේක්ෂකයින් තුන් දෙනෙකු ඉදිරිපත් වූ අතර එදින සිට පක්ෂය තුළ විවිධ අර්බුද රැසක් නිර්මාණය වී ඇත.
පක්ෂයේ නව නායකත්වයට කිළිනොච්චි දිස්ත්රික්කයේ එස්.ශ්රීධරන් මන්ත්රීවරයා පත් වීමත් සමගම ඔහුට හා ඔහුගේ පාක්ෂිකයින්ට එරෙහිව සෙසු පාක්ෂිකයින් විසින් බොහෝ චෝදනා එල්ල කරමින් පක්ෂය තුළ විශාල බෙදීමක් ආරම්භ කොට තිබේ.
අනතුරුව පක්ෂයේ මහලේකම් තනතුරට පුද්ගලයෙකු තෝරා ගැනීම පිණිසද ඡන්දයක් පැවැත්වීමට සිදු වූ අතර එම ඡන්දයේ සිදු වූ අක්රමිකතා කීපයක් නිසා පත් වූ මහලේකම්වරයා පිලිගැනීමට පක්ෂයේ විශාල පිරිසක් අකැමැත්තක් දක්වූහ.
මේ අවස්ථාවේදී පක්ෂයේ නව නායකයා දෙමළ ජාතික සන්ධානයේ නායක ආර්.සම්පන්ධන් මන්ත්රීවරයා හමු වී උපදෙස් ලබා ගැනීමෙන් පසුව වවුනියාවේදී විශේෂ සාකච්ඡාවක් පවත්වා පක්ෂයේ මහ ලේකම් ධූරය වසරක කාලය බැගින් පුද්ගලයින් දෙදෙනෙකු අතර තට්ටු මාරු ක්රමයට සිදු කිරීමට තීරණය කළ අතර ඊට පක්ෂයේ බොහෝ පිරිසක් එකඟ වී සිටියහ.
මේ මස 19 වෙනිදා ජාතික සමළුව පවත්වා එහිදී මේ කාරණය තහවුරු කිරීමට පක්ෂ නායක ශ්රීධරන් මන්ත්රීවරයා උත්සහ කිරීමත් සමගම ඊට විරුද්ධ වූ පිරිසක් යාපනය හා ත්රීකුණාමලය අධිකරණ වෙත ගොස් පක්ෂයේ ජාතික සමළුව පැවැත්වීම වළක්වාලමින් තහනම් නියෝගයන් ලබාගෙන තිබේ.
