මැදපෙරදිග කලාපයේ උද්ගතව ඇති යුදමය වාතාවරණය හේතුවෙන් මෙරට ඉන්ධන මිල ගණන් ඉහළ යාමෙන් ජනතාවට සහ සමස්ත ආර්ථිකයට සිදුවන බලපෑම අවම කිරීම සඳහා රජය විසින් දැවැන්ත සහන පැකේජයක් ප්රකාශයට පත් කර තිබේ.
පසුගිය 2026-03-30 වැනිදා පැවති අමාත්ය මණ්ඩල රැස්වීමේදී, මුදල්, ක්රම සම්පාදන සහ ආර්ථික සංවර්ධන අමාත්යවරයා ලෙස ජනාධිපතිවරයා විසින් ඉදිරිපත් කළ මෙම විශේෂ යෝජනාවලිය සඳහා කැබිනට් අනුමැතිය හිමිවී ඇත.
පොදු ප්රවාහන සහ ඉන්ධන සහන
ඉන්ධන මිල ඉහළ යාමේ පීඩනය අවම කිරීම සඳහා පොදු ප්රවාහනය සඳහා භාවිත කරන 92 ඔක්ටේන් පෙට්රල් ලීටරයක් සඳහා රුපියල් 20ක් දක්වාත්, ඔටෝ ඩීසල් ලීටරයක් සඳහා රුපියල් 100ක් දක්වාත් දැවැන්ත සහනයක් ලබාදීමට රජය තීරණය කර ඇත.
අඩු ආදායම්ලාභීන්ට සහ විවිධ කර්මාන්ත සඳහා හිමිවන විශේෂ සහන
පොදු ඉන්ධන සහනයට අමතරව, බලශක්ති අර්බුදයෙන් සෘජුවම බලපෑමට ලක්ව ඇති කාණ්ඩ වෙනුවෙන් පහත සඳහන් විශේෂ සහන හිමිවනු ඇත:
- අස්වැසුම ප්රතිලාභීන්ට (2026 අප්රේල් මාසය සඳහා): පවුලේ සාමාජික සංඛ්යාව නොසලකා,
- අන්ත දිළිඳු කාණ්ඩයේ පවුලක් වෙත රුපියල් 7,500ක අමතර මුදලක්.
- දුප්පත් කාණ්ඩයේ පවුලක් වෙත රුපියල් 5,000ක අමතර මුදලක්.
- සංක්රාන්තික පවුලක් වෙත රුපියල් 2,500ක අමතර මුදලක්.
- විදුලි පාරිභෝගිකයින්ට: ඉන්ධන මිල ඉහළ යාම සහ වියළි කාලගුණය හේතුවෙන් තාප බලාගාර ජනනය සඳහා යන අමතර පිරිවැය ජනතාව මත නොපටවා, ඒකක 90ට අඩුවෙන් භාවිත කරන පාරිභෝගිකයින්ගේ අදාළ අමතර පිරිවැය ඉදිරි මාස 03ක කාලය සඳහා රජය විසින් දරනු ඇත.
- ගොවි ජනතාවට (යල කන්නය සඳහා): * හෙක්ටයාරයකට ලබාදෙන රුපියල් 25,000ක පොහොර සහනාධාරය රුපියල් 30,000 දක්වා ඉහළට.
- අතිරේක භෝග සඳහා වූ රුපියල් 15,000 සහනාධාරය රුපියල් 18,000 දක්වා ඉහළට.
- කිලෝග්රෑම් 50 යූරියා මිටියක් රුපියල් 10,200ක ස්ථාවර මිලකට ගොවිජන සේවා මධ්යස්ථාන හරහා ලබා දීම.
- ධීවර ප්රජාවට: * එක්දින යාත්රා සඳහා මාස 03කට බලපැවැත්වෙන පරිදි දිනකට ඉන්ධන ලීටර 25ක් දක්වා (මසකට උපරිම දින 25ක්) ලීටරයකට රුපියල් 50 බැගින් සහනාධාරයක්.
- බහුදින යාත්රා සඳහා රුපියල් 150,000ක එකවර ගෙවන දීමනාවක් ඉදිරි මාස 3 තුළ ලබා දීම.
- කුඩා තේ වගාකරුවන්ට: ශ්රී ලංකා තේ මණ්ඩලයෙන් දැනට දෙන රුපියල් 4,000ක සහනාධාරයට අමතරව, පොහොර කිලෝග්රෑම් 50 මිටියක් සඳහා රුපියල් 5,000ක එක්වරක් පමණක් ගෙවන අමතර දීමනාවක් ලබා දීම.
