සිතුම් චතුරංග –
හිටපු පාර්ලිමේන්තු මන්ත්රී ජේ.ශ්රී රංගා මැයි 12 වැනිදා දක්වා යළි රිමාන්ඩ් බන්ධනාගාර ගතකරන ලෙස වවුනියාව මහධිකරණ විනිසුරු එම්. මොහොමඩ් නිහාල් අද නියෝග කළේය.
රිය අනතුරක් සිදුකොට ප්රභූ ආරක්ෂක අංශයේ සැරයන්වරයකු මරණයට පත්කිරීම සම්බන්ධව අධිකරණයෙන් චෝදනා ලැබ අධිකරණය මඟහරිමින් හා එම නඩුවිභාගයේ සාක්ෂිකරුවන් වෙත බලපෑම් කරමින් සිටි සැකකාර මන්ත්රීවරයාට එරෙහිව පසුගිය 17 වැනිදා වව්නියාව මහාධිකරණය වරෙන්තුවක් නිකුත් කරනු ලැබුවේය.
ඒ වනවිට කළුබෝවිල ශික්ෂණ රෝහලට ඇතුළත් වී ප්රතිකාර ගනිමින් සිටි මන්ත්රීවරයා රෝහලේ දි අත්අඩංගුවට ගෙන වව්නියාව මහාධිකරණයට ඉදිරිපත් කිරීමෙන් පසු ඔහුගේ ඇප අවලංගු කර රිමාන්ඩ් බන්ධනාගාරගත කරනු ලැබුවේය.
2011 වසරේ මාර්තු 30 වැනි දින සැකකාර මන්ත්රීවරයා මැදවච්චිය සිට සෙට්ටිකුලම ප්රදේශයට ගමන් කරමින් සිටින අවස්ථාවක සෙට්ටිකුලම රෝහල ඉදිරිපිට සිදුවූ එම රිය අනතුරින් අලව්ව, නවතල්වත්ත ප්රදේශයේ පදිංචි තිදරු පියකුවූ සැරයන් (36759) ජී.උදය ජයමිණි පුෂ්පකුමාර නිලධාරියා මියගොස් සිටි අතර සාවද්ය තොරතුරු වාර්තාකරමින් සැරයන්වරයා රියපදවා ජීවිතක්ෂයටපත්වූ බවට පවසා එවකට පොලිස් නිලධාරීන් හා එක්ව විමර්ශන අවසන් කොට ඇති බවට අධිකරණයේ ප්රකාශ විය.
එම අනතුර සම්බන්ධයෙන් මියගිය සැරයන්වරයාගේ බිරිය සිදුකළ පැමිණිල්ලකට අනුව පොලිස් විශේෂ විමර්ශන ඒකකයේ නිලධාරීන් පැවැත්වූ විමර්ශනයකදී එවකට පාර්ලිමේන්තු මන්ත්රී ජේ.ශ්රී රංගා විසින් රිය පදවා අනතුර සිදුකොට ඇති බවට අනාවරණයවූ අතර මහධිකරණයේ අධිචෝදනා ලබා සිට ඇපමත මුදාහැරිනු ලැබීය.
අදාල නඩු විභාගයේදී සාක්ෂි ලබාදුන් දෙදෙනකු හට දුරකථනයෙන් බලපෑම් කරමින් අනතුරව එම සාක්ෂිකරුවන් වෑන් රථයක නංවාගෙන වෙනත් ස්ථානයකට ගොස් සාක්ෂි ලබානොදෙන ලෙසට බලපෑම් කිරීම සම්බන්ධයෙන් එල්ලවූ චෝදනා සම්බන්ධයෙන් විමර්ශන වාර්තාව හා දුරකථන විශ්ලේෂණ වාර්තා පොලිසිය විසින් අධිකරණයට ඉදිරිපත් කළ අතර එහිදී මහධිකරණ විනිසුරුවරයා නියෝග කළේ සැකකාර හිටපු මන්ත්රීවරයාට එරෙහිව වින්දිතයින් ආරක්ෂා කිරීමේ පනත යටතේ පැහැරගෙන ගොස් සාක්ෂිකරුවන්ට බලපෑම් කිරීම සම්බන්ධයෙන් නඩු ගොනු කරන ලෙසත්ය.
තොරතුරු වසන්කිරීම ඇතුළු චෝදනා ලබාසිටි එවකට හිටපු සෙට්ටිකුලම පොලිස් ස්ථානාධිපති පොලිස් පරීක්ෂක සුගත් රොෂාන් සංජීව මහතා අධිකරණයේ පෙනී සිටිමින් වරද පිළිගත් අතර ඒ සම්බන්ධ තීන්දුව ප්රකාශයටපත්කිරීම ලබන නඩුවාරයේදී සිදුකරන බවද මහධිකරණ විනිසුරුවරයා දැණුම්දෙනු ලැබීය.
හිටපු වවුනියාව කොට්ඨාස භාර පොලිස් අධිකාරී අමරසිරි සේනාරත්න (විශ්රාමික නියෝජ්ය පොලිස්පති) වවුනියාව හිටපු සහකාර පොලිස් අධිකාරී හරිස්චන්ද්ර බණ්ඩාර (විශ්රාමික ජ්යෙෂ්ඨ පොලිස් අධිකාරී) පොලිස් සැරයන් ප්රියදර්ශන හේරත්, පොලිස් කොස්තාපල් ඩබ්ලිව්.ජි.පද්මපාල යන නිලධාරීන් මෙම නඩුවිභාගයේ අධිචෝදනා ලැබූ සෙසු පිරිස වෙති.
ලංකාදීප –
