ශ්රී ලංකා යුද්ධ හමුදාවේ නව නියෝජ්ය මාණ්ඩලික ප්රධානි ලෙස ගජබා රෙජිමේන්තුවේ මේජර් ජෙනරල් සී.ඩී. රණසිංහ ඊයේ (18) දින යුද්ධ හමුදා මූලස්ථානයේ පැවති කෙටි උත්සවයකදී රාජකාරි භාරගන්නා ලදී.
එම අවස්ථාව සඳහා ජ්යෙෂ්ඨ නිලධාරින්, නිලධාරින්, මාණ්ඩලික නිලධාරින් සහ සෙසුනිලයන් පිරිසක් සහභාගී වූහ.
මෙම ධූරයේ රාජකාරි කටයුතු භාරගැනීමට ප්රථම මේජර් ජෙනරල් සී.ඩී. රණසිංහ 2021 වර්ෂයේ සිට මාස 21 කට අධික කාලසීමාවක් ආරක්ෂක සේනා ආඥාපති – වන්නි ධූරය හෙබවූවේය.
වත්මන් යුද්ධ හමුදාධිපති ලුතිනන් ජෙනරල් විකුම් ලියනගේ 4 ගජබා රෙජිමේන්තුවේ විධායක අධිකාරි ධූරය හොබවන කාලසීමාවේ මේජර් ජෙනරල් සී.ඩී. රණසිංහ එම ඒකකයේ ඛණ්ඩභාර නිලධාරි ධූරය හොබවනු ලැබීය.
වර්ෂ 2009 මැයි මාසයට පෙර පැවති මානුෂීය මෙහෙයුමේ අවසන් අදියර පැවති කාලසිමාවේදි ඔහු 14 ගජබා රෙජිමේන්තුවේ අණදෙන නිලධාරි ධූරය ද හොබවනු ලැබීය.
මේජර් ජෙනරල් සී.ඩී. රණසිංහ පන්නිපිට්ය ධර්මපාල විද්යාලයේ ආදි ශිෂ්යයෙකි. පාසල් කාලය තුළ දක්ෂ ක්රීඩකයෙක් වූ ඔහු වර්ෂ 1987 දි කෙඩෙට් නිලධාරියෙකු ලෙස යුද්ධ හමුදාවට බැඳුනේය.
වර්ෂ 1988 දෙසැම්බර් මස 10 දින දෙවන ලුතිනන් නිලයේ අධිකාරියට පත්ව ශ්රී ලංකා යුද හමුදාවේ කීර්තිමත් පාබල රෙජිමේන්තුවක් වන ගජබා රෙජිමේන්තුවට අනුයුක්ත කෙරුණු අතර මේ වනවිට වසර 35 ක නිකැළැල් සේවා කාලයක් සම්පූර්ණ කර ඇත.
යුද බිමේදී සතුරා හමුවේ දැක්වූ නිර්භීතකම ඇගයීමට ලක්කරමින් ඔහු ‘රණ වික්රම පදක්කම’ සහ ‘රණ ශූර පදක්කමෙන්’ පිදුම් ලබා ඇත.
දීපරේඛා රණසිංහ සමඟ විවාහ වී සිටින ඔහු දියණියන් දෙදෙනෙකුගේ සහ එක් පුතනුවෙකුගේ පියෙකි.
