දිනසේන රතුගමගේ –
යාපනය නගරයේ සුප්‍රසිද්ධ ස්වර්ණාභරණ අලෙවි සැල් දෙකක් පවත්වා ගෙන යන ව්‍යාපාරිකයෙකු හා එම වෙළද සැලක සේවය කළ සේවිකාවක් එකම දිනක, යාපනයේ ස්ථාන දෙකක, ගෙළ වැළලාගෙන මියගොස් සිටිය දී ඔවුන්ගේ මළ සිරුරු දෙක ඊයේ (14) සොයා ගත් බව යාපනය පොලීසිය පැවසීය.
යාපනය නාවන්තුරේ ප්‍රදේශයේ පදිංචි 22 හැවිරිදි තරුණියක් මෙම සවර්ණාභරණ අලෙවි සැලක සේවය කොට ඇති අතර ඇය නාවන්තුරේ ප්‍රදේශයේදීම ගෙළ වැළලාගෙන මියගොස් තිබේ.
මේ සිද්ධිය දැනගත් වහාම ස්වරණාභරණ වෙළද සැල් දෙකේ අයිතිකරු එම ස්ථානයට ගොස් දුක් වී පවුලේ ඥාතීන්ට අවසන් කටයුතු කරගෙන යාම සදහා මුදල් ආධාරයක්ද ලබා දී ඔහු ආපසු පැමිණ ඇත.
එම සිද්ධියෙන් පැය දෙකකට පමණ පසුව ව්‍යාපාරිකයා යාපනයේ ආනයිපාණ්ඩි නාවලර් වීදියේ පිහිටි පදිංචිව සිටි නිවස තුළ ගෙළ වැළලාගෙන මියගොස් සිටියදී පොලිසියට ඔහුගේ මළ සිරුර සොයා ගැනීමට හැකි වී තිබේ.
මෙම ව්‍යාපාරිකයා වයස අවුරුදු 48 ක ව්‍යාපරිකයෙකු වන අතර ඔහුගේ බිරිය හා දරුවන් හතර දෙනා කොළඹ පදිංචි වී සිටින බවට පොලිසිය විසින් තොරතුරු අනාවරණය කරගෙන තිබේ.
මේ දෙදෙනා එකම දිනයක සියදිවි හානි කර ගැනීමට හේතුව මෙතෙක් අනාවරණය වී නොමැති නමුත් තරුණිය ගෙළ වැළලාගෙන මියයාමෙන් පසුව තරුණියගේ ඥාතීන් කීප දෙනෙකු ව්‍යාපාරිකයා එම මරණයට වගකිව යුතු බව ප්‍රකාශ කරමින් ඔහුට බැන වැදී පහර දීමට උත්සහ කළ බවට නාවන්තුරේ ගම්වාසී පිරිසක් ප්‍රකාශ කළහ
පොලීසිය විසින් සොයා ගන්නා ලද මළ සිරුරු දෙකම පරික්ෂණ කටයුතු සදහා යාපනය ශීක්ෂණ රෝහල වෙත බාර දී ඇති අතර යාපනය පොලිසිය සිද්ධිය සම්බන්ධයෙන් පරීක්ෂණ පවත්වා ගෙන යයි.
