ගෙවුනු මාස හත ඇතුළත පොලිස් නිලධාරීන් තුන් සියයකගේ වැඩ තහනම් වී ඇතැයි මහජන ආරක්ෂාව සහ පාර්ලිමේන්තු කටයුතු පිළිබඳ අමාත්ය ආනන්ද විජේපාල කීවේය.
තරාතිරම කුමක් වුවත් නීති විරෝධීව වැඩ කරන ඕනෑම කෙනෙකුට නීතිය තදින් ක්රියාත්මක කරන බවකී අමාත්යවරයා ආගමන විගමන පාලකවරයා මේ වනවිට ඉන්නේ බන්ධනාගාරගතව බවත්, පොලිස්පතිවරයා බන්ධනාගාරගතව සිට ඇප මත නිදහස්ව සිටින බවත්, බන්ධනාගාර කොමසාරිස්වරයා තමන්ගේම දෙපාර්තමේන්තුව යටතේ ඇති බන්ධනාගාරයක බන්ධනාගාරගතව සිටි ඇප මත සිටින බවත් පැවසුවේය.
මේ ආයතන තුනම වැඩ බලන ප්රධානීන්ගේන් පාලනය වීම රටක් ලෙස අප සිටින තත්ත්වය පෙන්වා දෙන බව මහජන ආරක්ෂක ඇමතිවරයා පෙන්වා දුන්නේය.
” සමස්ථයක් ලෙස රාජ්ය සේවයේ අප ඉතා උසස් ප්රසාදිත මට්ටමක නෙමෙයි ඉන්නේ. රාජ්ය සේවයේ පොදුවෙ ගත්තාම ජනතාව තුළ විශ්වාසය තියන්න බැරි මට්ටමටම සමහර කාරණා මේ කාලය තුළ සිද්ධ වෙලා තියනවා.”
” රාජ්ය සේවයට බලපෑමකින් තොරව පිරිස් බඳවා ගැනීම, රාජ්ය සේවය කාර්යක්ෂම කිරීම. රාජ්ය සේවයේ සුළු පිරිසක් කරන වැරදි වැඩ නිසා සමස්ථ රාජ්ය සේවයටම හානියක් සිද්ධ වෙනවා.”
” ඒ තත්ත්වය වැළැක්වීමයි අපේ අරමුණ. පොලිස් දෙපාර්තමේන්තුවේ ජනවාරි මස සිට මේ දක්වා පොලිස් නිලධාරීන් 300ක් වැඩ තහනම් වෙලා තියනවා. ඒක විශාල ප්රමාණයක්. එහෙම වැඩ තහනමට ලක් වෙන්නේ තමන්ට ලැබුණ රැකියාව සම්බන්ධව ආදරයක් බැඳීමක් තමන් ලබන වැටුප ලැබෙන්නේ කෙසේ ද කියලා හැඟීමක් දැනීමක් නැති තැන.”
” සමහර අය අවරුදු 25ක් රාජ්ය සේවයෙ ඉඳලා තනතුරු වැටුප අහිමි කරන් සිරගත වෙන අවස්ථා අපි දැකලා තියනවා. අපේ ආගමන විගමන පාලක ජෙනරාල්වරයාට මුලට තියනවා වැඩ බලන කියලා. පොලිස්පතිවරයාට මුලට තියනවා වැඩ බලන කියලා… බන්ධනාගාර කොමසාරිස් ජෙනරාල්ට මුලට තියනවා වැඩ බලන කියලා. ”
” ඇයි වැඩ බලන ඇවිත් තියෙන්නේ. මේ දෙපාර්තමේන්තුවේ ආගමන විගමන පාලක ජෙනරාල්වරයා සිරගත වෙලා. පොලිසියේ පොලිස්පතිවරයා සිරගත වෙලා ඇප පිට ඉන්නවා. විමර්ශන යනවා. බන්ධනාගාර කොමසාරිස් ජෙනරාල්වරයා තමන්ගේම බන්ධනාගාරයේ සිරගත වෙලා ඇප පිට නිදහස්වෙලා ඉන්නවා. ප්රධාන ආයතනවල දැන් ඉන්නේ වැඩ බලන තනතුරු. ඇයි එහෙම වෙන්නේ.”
“අප ආයතනයක රැකියා ලබනකොට ඒක රැකියාවකට පමණක් ලඝු කරගත්තොත් අපි ඒක තාවකාලික අවස්ථාවක් හැටියට හිතුවොත් එවැනි දේ සිද්ධ වෙන්න පුලුවන්.”
එබැවින් රජයක් ලෙස තරාතිරම කුමක් වුව ද සියලු දෙනා එක සමානකොට සලකා නීතිය ක්රියාත්මක කරන බව ඇමතිවරයා පැවසුවේය.
