ඊයේ (06) රාත්රියේ මාවනැල්ල, පදියදොර ප්රදේශයේ දී පොලීසිය විසින් සිදුකළ වෙඩිතැබීමකින් පුද්ගලයෙකු මියගොස් තිබේ.
පොලිස් වාර්තා අනුව සිද්ධිය මෙසේය.
මාවනැල්ලේ පදියදොර පදිංචි කාන්තාවක් දෙදෙනෙකන් ඊයේ රාත්රියේ මාවනැල්ල පොලිසියේ හදිසි ඇමතුම් අංකයට ඇමතුමක් දී පදියදොර ප්රදේශයේ පදිංචි ජයතිලක නොහොත් කසිප්පු රාජා සහ ඔහුගේ පුතා මංගල යන කඩු රැගෙන පැමිණ නිවෙස්වලට පහර දී ශනාක මධුශාන් නැමැති තරුණයෙක් ඝාතනය කිරීමට සොයන බවත් හැකි ඉක්මනින් මැදිහත්වන ලෙසත් දන්වා තිබේ.
එ් අවස්ථාවේ රාජකාරියේ යෙදුන පොලිස් සැරයන්වරුන් දෙදෙනෙක් වහාම පොලිස් යතුරුපැදියෙන් ආරවුල සිදුවූ ස්ථානය වෙත ගොස් තිබේ.
ඒ වනවිටත් කඩු රැගෙන සිටි කසිප්පු රාජා සහ ඔහුගේ පුතා පොලිස් නිලධාරින් දෙදෙනාට කඩුවලින් කොට තිබේ. තුවාල ලද පොලිස් නිලධාරින් රෝහල්ගත කර ඇත.
ඉන් අනතුරුව ජංගම රාජකාරියේ සිටි තවත් පොලිස් නිලධාරීන් පිරිසක් සිද්ධිය වූ ස්ථානයට පැමිණ තිබේ. ඔවුන් සමග ආරවුලකට යන කසිප්පු රාජාගේ පුතාට පොලිසිය වෙඩි තබා ඇති බවත් එම වෙඩි පහර වැදී ඇත්තේ කසිප්පු රාජාට බවත් පොලිසිය පවසයි.
වෙඩි වැදී තුවාල ලද පුද්ගලයා මාවනැල්ල රෝහල වෙත ඇතුළත් කිරීමෙන් පසු මිය ගොස් තිබේ.
කසිප්පු රාජාගේ පුතා මේ වනවිට ප්රදේශයෙන් පලා ගොස් ඇති අතර එම සැකකරු අත්අඩංගුවට ගැනීම සඳහා මාවනැල්ල පොලීසිය විසින් විශේෂ මෙහෙයුමක් ආරම්භ කර තිබේ.
