කීර්ති ප්රනාන්දු –
ලංකන් ගුවන් සමාගම සතුව ඇති යානා 24න් අඩක් මේ වනවිට ධාවනය සම්බන්ධව ගැටලු ඇති වී තිබෙන බවත්, ඉන් 07ක්ම පවතින්නේ ධාවනයෙන් ඉවත් කර අංගනයේ බවත් ගුවන්තොටුපල වෘත්තීය සමිති හෙළි කරයි දෙයි.
වංචා දූෂණ කොමිස් ඩීල් නවත්වා නිසි කළමනාකරණයකින් යුතුව කටයුතු කිරීමෙන් ගොඩගතහැකිව තිබෙන ශ්රී ලංකන් ගුවන් සමාගම දැන් විකුණා දැමීම එකම විකල්පය බවට පත් කර ඇති බවත් බිහිසුණු ගුවන් අනතුරකින් කතාව නිමා වන්නට ඉඩ නොහැර මේ ආයතන ගොඩනැගීමට දැක්මක් නැතිනම් දෙවියන්ගේ නාමයෙන් විධිමත් ලෙස පුද්ගලකරණය කිරීම හෝ සිදුකරන ලෙසත් වෘත්තීය සමිති ක්රියාකාරිකයෝ ඉල්ලති.
“දැන් ශ්රී ලංකන් ගුවන් යානා ගුවන්ගතවීමත් අවදානමක් බවට පත්වෙලා. ඇයි අවදානමට මුහුණ දෙන්න වුනේ. “
“ ප්රධානම හේතුව වැරදි කළමනාකරණ ක්රියාමාර්ග. එය අමාත්යාංශයේ සිට භාරගත යුතු දෙයක්. දේශපාලන ගේම් ගහන වෘත්තිය සමිති එක්ක ආණ්ඩුවේ ඕන එපාකම් කරන වත්මන් කළමනාකරණයට එහෙම කරන්න ඕනකමක් සහ දැක්මක් නෑ. “
“ මේ ආයතනය ස්වභාවික මරණයකට පත්වෙන්න හැරලා තියෙන්නේ. ඇයි මේ ගුවන් යානා කාර්මික දෝෂවලට ලක්වෙන්නේ. කාරණා දෙක්ක තියනවා. එකක් මේ වනවිට මේ ගුවන් යානා බොහොමයක කල්බදු කාලය ඉවර වෙන්න ලඟයි. ඒ සඳහා නව ගුවන් යානා නැවත කල්බදු ක්රමය යටතේ ගත යුතුයි. මෙතෙක් භාවිතා කළ ගුවන් යානා අප ඇතුළත් වූ ගිවිසුම් ප්රකාරව නිසි ලෙස නඩත්තු කර අප යානය භාරගත් මට්ටමින් නැවත අදාල ගුවන් සමාගමට භාර දිය යුතුයි. ඒ නඩත්තුව සඳහා වියදම් කරන්නෙ ශ්රී ලංකන් සමාගම විසින් උපයන මුදල්.”
“නමුත් අනිවාර්යයෙන් කළ යුතු අලුත්වැඩියා සහ නඩත්තු සඳහා ශ්රී ලංකන් සමාගමට මුදල් වෙන් කරන්න අමාත්යාංශයෙන් සහ භාණ්ඩාගාරයෙන් අනුමැතිය දෙන්නේ නෑ. නැවතත් කියන්නේ මේ වෙන් කරන්න හදන්නේ භාණ්ඩාගාරයෙ මුදල් නෙමෙයි. ශ්රී ලංකන් ගුවන් සමාගම විසින් මෙහෙයුම්වලින් උපයන මුදල්.”
“මේ වැලැක්වීම ඇතුළෙ කාරණා දෙකක් වෙනවා. එකක් කල්බදු සම්පූර්ණවන ගුවන් යානා නඩත්තු කරලා එම ගුවන් යානා කල්බදු පදනම මත ගත්ත සමාගම්වෙත ගිවිසුම් ප්රකාරව දෙන්න බැරිවෙනවා. ඒ කියන්නේ ගුවන් සමාගමක් විදිහට අපේ තියන ගෞරවය සහ විශ්වාසය ලෝකය ඉදිරියේ සාහසික ලෙස විනාශ කරනවා. “.
“ දෙවැනි එක ගුවන් යානා ධාවන තත්ත්වයෙන් ඉවත් වෙලා ඉබේටම ගුවන් සේවය විනාශ වෙනවා. එහෙම ගර්හිත කරාල කිසිම වටිනාකමක් නැති ගුවන් සේවයක් අන්තිමට තුට්ටු දෙකට විකුණගන්න එක මොනතරම් පහත් වැඩක් ද කියලා තේරුම් යන්න මේ රටට තව සෑහෙන කාලයක් යන එකක් නෑ.”
“ඊලඟට කිසිම ඉඩක් දෙන්නේ නෑ මේ ආන්ඩුව අලුත් ගුවන් යානා කල්බදු ක්රමය යටතේ ගන්න. ඒ කල්බදු ක්රමය යටතේ යානා ගන්න වෙන් වන්නේ ගුවන් සමාගමේ මුදල්. ඒත් ඔවුන් රටට කියනවා ඒක සුදු අලියෙක් නඩත්තු කරන්න තියන අනවශ්ය වැය බරක් කියලා.”
“තියන ගුවන් යානා නඩත්තුවක් නැතිව ගුවන් ගත කරගත නොහැකිව ගාල් කරලා නව ගුවන් යානා කල්බදු ක්රමයට ගන්න තියන ඉඩකඩ අහුරලා දැම්මම ගුවන් සේවයක් එතන නෑ…”
මේ සම්බන්ධව අදහස් දැක්වූ වෘත්තීය සමිති ක්රියාකාරිකයෙක් ලංකාසරට පැවසීය.
මේ තත්ත්වය තුළ මේ රජය කිසිම ආකාරයකට ශ්රී ලංකන් ගුවන් සමාගම පවත්වාගැනීම නොකරන බවත් විශාල අනතුරක් සිදුකර රටත් ගුවන් සමාගමත් ව්යසනයකට පත් නොකර හැකි ඉක්මනින් ගැනීමට සූදානම්වන පියවර වඩාත් විනිවිදභාවයකින් යුතුව ඩීල් නොගසා සිදුකරන ලෙසත් වෘත්තීය ක්රියාකාරිකයෝ ඉල්ලති.
