දිනසේන රතුගමගේ –
මන්නාරමේ ඉදිකිරීමට ගිය සුළං බල විදුලි බලාගාරයේ දෙවන අදියරයේ ඉදි කිරීම් කටයුතු තාවකාලිකව දින දාහතරක කාලයකට නවතා දමන ලෙසට මන්නාරම අධිකරණය විසින් ඊයේ (12) තනම් නියෝගයක් නිකුත් කළේය.
අධිකරණය විසින් මෙම බලාගාරයේ ඉදි කිරීම් කටයුතු නවතාලීම නිසා එම බලාගාරය ඉදි කිරීම පිණිස ත්රිකුණාමලයේ සිට මන්නාරමට ගෙනගය ටර්බයින් සංරචක ඇතුලු මෙවලම් ප්රවාහනය කිරීමද නතර කරණ ලෙස අධිකරණ තීන්දුවේ සඳහන් කොට තිබේ.
මන්නාරමේ සුළං බලයෙන් ක්රියාත්මක වන විදුලි බලාගාරයේ දෙවන අදියරයේ ඉදිකිරීම් කටයුතු පිණිස ටර්බයින් සංරචක ඇතුලු මෙවලම් ත්රිකුණාමළයේ සිට මන්නාරමට රැගෙන යමින් තිබූ වාහන පෙළකට මහජනතාවගෙන් විශාල බාධාවක් එල්ල වීමත් සමගම මන්නාරමේ සිවිල් සංවිධාන කීපයක් එක්ව මන්නාරමේ නීතිය හා සාමය ආරක්ෂා කර ගැනීම පිණිස මෙම බලාගාරයේ ඉදි කිරීම් කටයුතු තාවකාලිකව නවතා දමන ලෙසට මන්නාරම අධිකරණයෙන් ඉල්ලා තිබුණි.
මන්නාරමේ දේශපාලාන අධිකාරිය හා සිවිල් සංවිධාන නියෝජිතයින් ජනාධිපතිවරයා සමග සාකච්ඡා කොට අවසන් විසඳුමකට පැමිණෙන තුරු බලාගාරයේ දෙවන අදියරයේ ඉදිකිරීම් කටයුතු නතර කරන ලෙස මන්නාරම අධිකරණය නියෝග කොට තිබේ.
මන්නාරමේදී විරෝධතාවය දැක් වූ පිරිසට එරෙහිව ක්රියා කිරීම පිණිස මන්නාරම පොලීසිය අධිකරණයෙන් නියෝගයක් ඉල්ලා සිටි නමුත් දින ගණනාවක් මුලුල්ලේ උතුරේ බොහෝ නගර වල මෙම බලාගාරයට එරෙහිව විරෝධතා පැවැත්වෙන බැවින් මන්නාරමේදී විරෝධතාවය දැක්වූ පිරිසට පමණක් එරෙහිව අධිකරණ නියෝගයක් ලබා දීම යුක්ති සහගත නොවන බවට අධිකරණය තීන්දු කොට තිබේ.
එමෙන්ම ටර්බයින් සංරචක ඇතුලු මෙවලම් රැගෙන මන්නාරමට පැමිණ ඇති සියලුම වාහන දැඩි ආරක්ෂාවක් මධ්යයේ ආපසු යැවීමට පියවර ගන්නා ලෙසටද මන්නාරම අධිකරණය මන්නාරම පොලීසියට දැණුම් දී ඇත.
