කථානායක අසෝක සපුමල් රන්වලට එරෙහිව විශ්වාසභංගයක් ගෙන ඒමට සමගි ජන බලවේගය අද (13) කටයුතු ආරම්භ කර තිබේ.
සමගි ජන බලවේගය ප්රකාශ කරන්නේ වත්මන් කථානායකවරයා පසුගිය මැතිවරණයට තරග කිරීමට පෙර ද, 2024 පාර්ලිමේන්තු මැතිවරණයට තරග කරන අවස්ථාවේ දී ද, පාර්ලිමේන්තුවට තේරී පත්වී කථානායක ධුරයට තෝරා පත්කර ගන්නා අවස්ථාවේදී ද කථානායක ධුරයේ රාජකාරී භාරගත් පසුව ද ඔහු වෙත නොමැති මොරටුව විශ්වවිද්යාලයෙන් ලබාගත් රසායනික ඉංජිනේරු විද්යා පිළිබඳ BSc උපාධියක් සහ ජපානයේ වසේදා සරසවියෙන් ලබාගත් ආචාර්ය උපාධියක් ද ඇති බව හුවා දක්වමින් සදාචාරාත්මක නොවන ලෙස රටට බොරු කී බවය.
තමන්ට නොමැති ආචාර්ය උපාධියක් හුවා දක්වමින් සිටින අතර ඒ සම්බන්ධයෙන් ජනතාවගෙන් විරෝධයක් එල්ලවන අවස්ථාවේදී හා තොරතුරු විමසීමේ දී නිහඬව සත්ය වසන් කර ඇති නිසා මෙම විශ්වාසභංග යෝජනාව ඉදිරිපත් කිරීමට කටයුතු කරන බව සමගි ජන බලවේගය පවසයි.
මෙම විශ්වාසභංග යෝජනාව සඳහා සමගි ජන බලවේගයේ නායක සජිත් ප්රේමදාස මහතා, එහි මහලේකම් රංජිත් මද්දුම බණ්ඩාර , විපක්ෂයේ ප්රධාන සංවිධායක ගයන්ත කරුනාතිලක, පාර්ලිමේන්තු මන්ත්රීවරුන්වන ජේ. සී අලවතුවල, අජිත් පී පෙරේරා, සුජිත් සංජය පෙරේරා, චතුර ගලප්පත්ති, ජගත් විතාන සහ හර්ෂණ රාජකරුණා යන පාර්ලිමේන්තු මන්ත්රීවරුන් අත්සන් කරනු ලැබීය.
