මිනුවන්ගොඩ බ්රැන්ඩික්ස් (Brandix) ආයතනය තුළ මේ වනවිට නිර්මාණය වී ඇති කොරෝනා පොකුර වැලිසර, කන්දකාඩු වැනි තැන්වල නිර්මාණය වූ කොවිඩ් පොකුරට වඩා භයානක බවත් මෙය බාහිර සමාජයට විශාල ලෙස විවෘත වී ඇති බැවින් සමස්ත රටේම ජනතාව මේ පිළිබඳව දැඩි ලෙස අවධානය යොමු කළ යුතු බවත් කොවිඩ් වැළැක්වීමේ සියලු සෞඛ්යාරක්ෂක පිළිවෙත දැඩි සේ අනුගමනය කළ යුතු බවත් වසංගත රෝග විද්යා අංශයේ අධ්යක්ෂ විශේෂඥ වෛද්ය සුදත් සමරවීර මහතා පවසයි.
ඒ මහතා මේ බව පැවසූවේ කොවිඩ්-19 පිළිබඳව අවධානය ගිලිහී යාම රටට බලපාන්නේ කෙසේද? සම්බන්ධයෙන් අද (05) සෞඛ්ය ප්රවර්ධන කාර්යාංශයේ පැවති මාධ්ය හමුවට එක් වෙමිනි.
මීට පෙරද වැලිසර, කන්දකාඩු ආශ්රිතව මෙවැනි විශාල කොරෝනා පොකුරු නිර්මාණය වුවත් ඔවුන් කඳවුරු තුළම සිටි බැවින් එහි අවදානම අවම වූ නමුත් බ්රැන්ඩික්ස් ආයතනයේ සේවය කරන මෙම පිරිස දිනපතා නිවාසවල සිට සේවා ස්ථානයට පැමිණි අතරම වැඩි වශයෙන් සමාජයට මුහු වූ පිරිසක් බැවින් මෙහි අවදානම වඩාත් විශාල වන බව ඒ මහතා මෙහිදී අවධාරණය කරන ලදී.
එමෙන්ම මෙහිදී පළමුව හඳුනා ගත් කොරෝනා ආසාදිත කාන්තාව හට මෙය වැළඳීමේ මූලාශ්රය මේ වනවිටත් ආවරණය නොවීම මත මෙය සමාජගත වීමේ අවදානම වඩාත් ඉහළ වන බවද වෛද්යවරයා පැවසීය.
මිනුවන්ගොඩ බ්රැන්ඩිසික්ස් ආයතනයේ දැනට සිදු කළ පී.සී.ආර් පරීක්ෂණයන්ට අනුව මෙම පොකුරින් පුද්ගලයන් 71 දෙනෙකු කොරෝනා ආසාදිත පුද්ගලයන් බවට හඳුනා ගෙන ඇත.
එමෙන්ම පවතින තත්ත්වය අනුව අද දිනයේ එම ආයතනයේ PCR පරීක්ෂණ දෙදහස් සිදුකිරීමට තීරණය කර තිබේ.
පසුගිය දින කිහිපය තුළ මෙම ආයතනය සමග යම් සම්බන්ධ වූ අයෙක් සිටී නම් ඔවුන් නිවාස තුළම රැඳී සිටින ලෙසත් යම් ස්වසන අපහසුතාවක් හෝ පූර්ණ රෝග ලක්ෂණයක් පවතී නම් ඔවුන් තම ප්රදේශයේ සෞඛ්ය වෛද්ය නිලධාරී දැනුවත් කර වහාම රෝහල්ගත වීම සිදු කරන ලෙසත් වෛද්ය සමරවීර මෙහිදී සඳහන් කළේය.
වත්මන් තත්ත්වයත් සමගින් අත්යවශ්ය කටයුතු සඳහා පමණක් සමාජයට පැමිණ හැකි තරම් නිවාසවලම රැදෙන ලෙසත් ජනතාව විශාල වශයෙන් ඒකරාශී වන අවස්ථා හැකි පමණින් සීමා කරන ලෙසද ඒ මහතා මෙහිදී උපදෙස් ලබා දෙන ලදී.
ඉදිරියේ පැවැත්වීමට නියමිත විභාග කටයුතු නොපැවැත්වීමට මේ වන විටත් කිසිදු තීරණයක් නොමැති බවත් පවතින තත්ත්වය මත ඉදිරි දින දෙක තුළදී ඒ පිළිබඳව නිශ්චිතව ම දැනුම් දෙන බව ද පැවසීය.
මෙම තත්ත්වය තවදුරටත් සමාජගත වීම ජනතාවගේ සාමාන්ය හැසිරීම මත තීරණය වන බවත් නිසි සෞඛ්යාරක්ෂිත ක්රමවේදයන් අනුගමනය කරමින් ජනතාව තම සහය නිරන්තරයෙන් ලබා දෙන ලෙස ඉල්ලා සිටින බවද ඒ මහතා මෙහිදී පැවසීය.
