වීසා කාලය ඉක්මවා රැඳී සිට මුදල් ඉපැයීම සඳහා විවිධ කුඩා රැකියා කරන විදේශිකයන්ගේ කටයුතු මැඩපැවැත්වීමට අවශ්ය සම්පත් නොමැති බවත් ඒ හේතුවෙන් ඔවුන් කුඩා රැකියා කරමින් රට තුළ රැඳී ඉන්නා බවත් ආමන විගමන දෙපාර්තමේන්තුවේ ආරංචි මාර්ග පවසයි.
ආගමන විගමන දෙපාර්තමේන්තුවේ විමර්ශන කණ්ඩායමක් විසින් ඊයේ (04) කොළඹ සහ දෙහිවල ප්රදේශවල සිදුකළ වැටලීම්වලදී වීසා කාලය ඉක්මවා ශ්රී ලංකාවේ රැඳී සිටිමින් අන්තර්ජාලය ඔස්සේ රැකියා කරන විදේශිකයන් 15 දෙනෙකුගෙන් යුත් කණ්ඩායමක් අත්අඩංගුවට ගෙන තිබේ.
ඔවුන්ගෙන් එකොළොස් දෙනෙකු බිහාර්, ආන්ද්ර ප්රදේශ්, උත්තරාකන්ඩ්, ගුජරාට් සහ මහාරාෂ්ට්ර ප්රාන්තවල ඉන්දියානුවන් වන අතර අනෙකුත් සිවුදෙනා නේපාල ජාතිකයන්ය. ඔවුන් වයස අවුරුදු 20 ත් 30 ත් අතර පසුවන්නන් බව ආගමන විගමන දෙපාර්තමේන්තුව පවසයි.
ඔවුන්ගෙන් ඇතැමෙක් නේවාසික වීසා මත ද තවත් පිරිසක් සංචාරක වීසා මත ද පැමිණ ඇති බව මූලික විමර්ශනවලදී අනාවරණය වී ඇත.
ආගමන විගමන දෙපාර්තමේන්තුවේ ජ්යෙෂ්ඨ නිලධාරියෙකු පැවසුවේ සැකකරුවන්ගෙන් මිරිහාන රැඳවුම් මධ්යස්ථානයේ දී වැඩිදුර ප්රශ්න කිරීම් සිදු කර අධිකරණ කටයුතුවලින් අනතුරුව පිටුවහල් කිරීමට නියමිත බවය.
ආගමන විගමන පාලක ජනරාල් හර්ෂ ඉලුක්පිටියගේ උපදෙස් මත මෙම විමර්ශන සිදු කෙරේ.
මහජන ආරක්ෂක අමාත්යාංශයේ නිලධාරියෙක් පැවසුවේ ඇතැම් විදේශිකයින් පහසුවෙන් ස්වදේශිකයන් ඉක්මවා ගොස් සුලු රැකියා කරන බවය. එම පිරිස් හඳුනා ගැනීම සඳහා අදාළ සියලු ආයතන සම්බන්ධ කර ගනිමින් සම්බන්ධීකරණ ප්රවේශයක් සකස් කිරීමේ අවශ්යතාව ඔහු අවධාරණය කළේය.
මේ වන විට විදේශිකයන්ගේ මෙවැනි නීති විරෝධී ක්රියා මැඩලීමේ මානව සම්පත් හිඟය හේතුවෙන් විමර්ශන බලධාරීන් දුෂ්කරතාවන්ට මුහුණ පා සිටිති.
