පේරාදෙණිය විශ්වවිද්යාලයේ කලා පීඨයට අනුබද්ධව පුරාවිද්යා දෙපාර්තමේන්තුව විසින් පවත්වාගෙන යන පුරාවිද්යා කෞතුකාගාරයේ මිල කළ නොහැකි කෞතුක වස්තු විශාල ප්රමාණයක් අතුරුදහන් වීම සම්බන්ධව අපරාධ පරීක්ෂණ දෙපාර්තමේන්තුව විසින් විශේෂ පරීක්ෂණයක් ආරම්භ කර ඇත.
අතුරුදහන් වූ භාණ්ඩ අතර පුරාණ ඇත්දළ නිර්මිතයන්වන කන් හැඳි 06ක් ඇතුළු වටිනා කෞතුක භාණ්ඩ ගණනාවක් වෙතැයි තහවුරු කරගෙන ඇත.
එම අපරාධය සම්බන්ධ ස්ථානීය පරීක්ෂණ සඳහා අපරාධ පරීක්ෂණ දෙපාර්තමේන්තුවේ පොලිස් කණ්ඩායමක් අද (03)පෙරාදෙණිය විශ්වවිද්යාලය වෙත පැමිණ තිබිණි.
මෙම පුරාවිද්යා කෞතුකාගාරය ආරම්භ කිරීමේ පුරෝගාමියා වූයේ මහාචාර්ය සෙනරත් පරණවිතානයන්ය. ඔහු කළ පුරාවිද්යා කැණීම් ආශ්රිතව සොයා ගත් වටිනා කෞතුක භාණ්ඩ පෙළක් මෙම කෞතුකාගාරයේ තැන්පත් වී ඇත.
වාර්තාවන පරිදි මෙම පුරවිද්යා කෞතුකාගාරයේ ලේඛන වසර ගණනාවකින් යාවත්කාලීන වි නැති බවත්, දශක ගණක් තිස්සේ කෞතුකාගාරයේ පුරාවස්තු සොරකම් කිරීම සිදුකරමින් ඇති බවත් මූලික විමර්ශන වලදී හෙළි වී ඇත.
පේරාදෙණිය විශ්වවිද්යාලයේ නියෝජ්ය උපකුලපති,මහාචාර්ය ටෙරන්ස් මදුජිත් කියා සිටියේ මේ සම්බන්ධව විධිමත් පරීක්ෂණයක් පොලිසිය විසින් කරනු ඇතැයි අපේක්ෂා කරන බවය.
