ශ්රියානි විජේසිංහ –
මේ දිනවල පවතින වෛරස් රෝගයන් හේතුවෙන් ඇතිවන වේදනාවන් සමනය කර ගැනීම සඳහා හිතුමතේට වේදනානාශක පානය කිරිමෙන් වළකින්නැයි රිජ්වේ ආර්යා ළමා රෝහලේ විශේෂඥ වෛද්ය හැරිස් පතිරගේ ජනතාවට දැනුම් දී සිටියි.
වේදනාවන් සමනය කර ගැනීමට පැරසිටමෝල් ඖෂධය පමණක් නියමිත මාත්රාවන් පමණක් ලබා ගත යුතු නමුත් ඇතැමුන් වේදනාව අඩුකර ගැනීමට යැයි සිතා අධි මාත්රාවන්ගෙන් පැරසිටමෝල් ගැනීමෙන් අක්මාවට හානිවිම් සිදුවිය හැකි බවද හෙතෙම පෙන්වාදේ.
එසේම වේදනාවන් සමනය කර ගැනීම සඳහා ඇස්ප්රීන් කාණ්ඩයේ ඖෂධයන් භාවිත නොකල යුතු බව විශේෂඥවරයා පවසා සිටින අතර යම් හෙයකින් එවැනි ඖෂධ ලබා ගැනීමෙන් ඩෙංගු රෝගීන්ට රක්තපාත තත්තවයන් පැමිණිය හැකි බවත් චිකන්ගුන්යා රෝගීන්ට විවිධ සංකූලතාවන් ඇතිවිය හැකි බවත් අවදාරණ කරයි.
උණ අඩුකර ගැනිම හා වේදනාවන් සමනයට පැරසිටමෝල් ලබා ගත යුත්තේද සාමාන්යයෙන් කිලෝග්රෑම් 1ට මිලිග්රෑම් 15ක් වැනි ප්රමාණයකි. අවුරුද්දක දරුවෙකු කිලෝ ග්රෑම් 10ක් බර නම් දිය යුත්තේ එක් මාත්රාවකදී මිලිග්රෑම් 150ක් පමණි. එය දිනකට පැය 6න් 6ට හතර සැරයක් විය යුතු බවද වෛද්ය පතිරගේ සඳහන් කරයි.
චිකන්ගුන්යා හා ඩෙංගු යන රෝග දෙකම ඊඩිස් මදුරු විශේෂයෙන් බෝවන වයිරසයක් බැවින් මදුරුවන් බෝවිය හැකි ස්ථානයන් විනාශ කිරිමට කටයුතු කරන්නැයිද විශේෂඥවරයා ජනතාවගෙන් ඉල්ලා සිටියි.
