නීතියට උඩින් කිසිවෙක් නැති බවත්, ගල්කිස්ස උසාවියේ දී ප්රස්තුත සිද්ධියට මැදිහත් වූ පොලිස් නිලධාරියාට අගතියක් වෙනවා නම් පොලිසිය භාර ඇමතිවරයා ලෙසත් පොලිස් දෙපාර්තමේන්තුව ලෙසත් හැකි උපරිම මැදිහත්වීම සිදුකරන බව මහජන ආරක්ෂාව පිළිබඳ ඇමති ආනන්ද විජේපාල පැවසුවේ.
අද (12) ත්රී කුණාමලය කුච්චවේලි ප්රදේශයේ පැවති වැඩහටනකින් අනතුරුව මාධ්යයට අදහස් දක්වමින් ආනන්ද විජේපාල ඇමතිවරයා පොලිස් නිලධාරින්ට පැවසුවේ තමන්ගේ රාජකාරිය නොබියව කරන ලෙසත්, එවැනි නිලධාරීන් වෙනුවෙන් තමන් පෙනී සිටිනා බවත්ය.
ඇමතිවරයා මෙසේ ද පැවසුවේය.
අපි පොලිස් දෙපාර්තමේන්තුවේ සියලුම නිලධාරීන්ට මේ වෙලාවේ ප්රකාශ කරන්න අවශ්යයයි… ඒ නිලධාරියාට යම් අගතියක් අසාධාරණයක් වෙනවා නම් පොලිසිය භාර ඇමතිවරයා හැටියටත්, පොලිස් දෙපාර්තමේන්තුව හැටියටත් පෙනී සිටින්න අවශ්යයයි. ඒ වෙනුවෙන් මැදිහත්වීම් කරනවා.
කෙසේ වුවත් ඒ වෙලාවේ ආරවුලට සම්බන්ධ වූ නීතිඥයාගේ හැසිරීම ගැන අපි මේ වෙලාවේ කණස්සල්ල පල කරනවා. ඔහුගේ අශෝභන හැසිරීම අධිකරණයට කළ අපහාසයක් විදිහටයි අපි සලකන්නේ. ඒ නිසා ඒ ආකාරයෙන් රාජකාරියට බාධා කරමින් අශෝභන ලෙස හැසිරුණ ඒ නීතිඥයා සම්බන්ධයෙනුත් ඉදිරි ක්රියාමාර්ග ගන්නවා.
අපි හැමදාමත් කීවා වගේ නීතියට උඩින් කිසිම කෙනෙක් නෑ. අපි හැමදාම කිව්වේ ඒකයි. තරාතිරම නොබලා කටයුතු කරනවා. අපි පොලිස් දෙපාර්තමේන්තුවේ සියලුම නිලධාරීන්ට කියන්නේ. ඔබගේ රාජකාරි නොබියව කරන්න. ඔබ වෙනුවෙන් අපි පෙනී සිටිනවා.
මහජන ආරක්ෂක ඇමතිවරයා පැවසුවේය.
