හිටපු රාජ්ය අමාත්ය සිවනේසතුරෙයි චන්ද්රකාන්තන් හෙවත් පිල්ලෙයාන් අපරාධ පරීක්ෂණ දෙපාර්තමේන්තුව විසින් ඊයේ (08) රාත්රියේ මඩකලපුවේ දී අත් අඩංගුවට ගෙන තිබේ.
නැගෙනහිර විශ්වවිද්යාලයේ හිටපු උපකුලපති ලෙස මහාචාර්ය රවීන්ද්රනාත් සුබ්රමනියම් 2006වසරේ අතුරුදන් වීම සම්බන්ධව යට ගසා තිබූ විමර්ශන නව රජය යටතේ යළි ආරම්භ කිරීමත් සමගම එම විමර්ශනවලට අදාලව මෙම අත් අඩංගුවට ගැනීම සිදුකර ඇත්තේ ඊයේ රාත්රියේය.
2006 දෙසැම්බර් 15 වැනිදා කොළඹ – 07, විද්යා මන්දිරයේ පිහිටි සම්මන්ත්රණයකින් පසු අධිආරක්ෂිත කලාපයක් තුළදී මහාචාර්ය රවීන්ද්රනාත් සුබ්රමනියම්ගේ අතුරුදන් වීම සිදුවිය.
මහාචාර්ය රවීන්ද්රනාත්ට දිගින් දිගටම එල්ල වූ තර්ජන සම්බන්ධයෙන් ආරක්ෂක අමාත්යංශයේ එවකට ලේකම් ගෝඨාභය රාජපක්ෂ සහ විශ්වවිද්යාල ප්රතිපාදන කොමිෂන් සභාවේ සභාපතිවරයා දැනුවත් කිරීමෙන් පසු ඔහුට කොළඹ සිට සිය රාජකාරි කටයුතු සිදුකිරීමට අවස්ථාව සලසා දී තිබිණි.
ඒ අතරතුර ඔහු ශ්රී ලංකා විද්යාභිවර්ධන සංගමයේ සම්මන්ත්රණයකට සහභාගි වී තිබූ අතර 2006. දෙසැම්බර් මස 15 වැනිදා පවත්වා ඇත්තේ ද එවැනි සම්මන්ත්රණයකි.
වර්තමාන ආණ්ඩුව බලයට පත්වීමෙන් පසු පරීක්ෂණ කඩිනම් කරන ලෙස ජනාධිපති අනුර කුමාර දිසානායක විසින් විමර්ශන අංශවලට උපදෙස් ලබාදුන් ලැයිස්තුවේ මහාචාර්ය රවීන්ද්රනාත්ගේ අතුරුදන් වීම ද විය.
මෙම අපරාධයට සම්බන්ධව තවත් පුද්ගලයින් කිහිප දෙනෙක් අත් අඩංගුවට ගැනීමට ඇති බව අපරාධ පරීක්ෂණ දෙපාර්තමේන්තුව කියයි.
